Samoa
This article was added by the user . TheWorldNews is not responsible for the content of the platform.

To’a 8 ua molia ina ua maua fualaau faasaina i se osofaiga a Leoleo i Pago Pago

Pago Pago - AMERIKA SAMOA

Pe tusa ma le to’a 8 ni tagata na pu’e faapagota e se vaega faapitoa o Leoleo sa fa’aaupegaina ina ua maua vaega o fualaau faasaina i se osofaiga sa faia i le aso Faraile o le vaiaso na te’a nei i Pago Pago, lea e aofia ai se fale ma ni ta’avale se 2.

O le osofaiga a le vaega faapitoa o Leoleo faaaupega a le Matagaluega o e Puipuiga o le Saogalemu Lautele, sa faavae mai lea i se poloaiga mai le Fa’amasinoga latou te sailia ai se fale i Pago Pago atoa ai ma ni ta’avale se 2. 

O le fale ma ta’avale e 2 e pei ona taua e Leoleo, o nofoaga ia sa masalomia le avea ma nofoaga autu o fefaatauaiga o fualaau faasaina o le aisa i totonu o Pago Pago.

Na faamaonia mai e le Sui Komesina o Leoleo ia Foifua Foifua Jr i le Samoa News le osofaiga a se vaega faapitoa o Leoleo sa faatinoina i Pago Pago i le aoauli o le aso Faraile o le vaiaso na te’a nei, Novema 11th, ma maua ai se vaega o fualaau faasaina o le aisa. 

E leai ni a’upega na maua i le taimi o le osofaiga a Leoleo.

E pei ona taua e le malo, o le fale e pei ona osofaia i Pago Pago atoa ai ma ta’avale e 2 e pei ona taua, ua leva ona i lalo o mea vaai a Leoleo, o nofoaga ia o loo avea ma nofoaga autu o fefaatauaiga o le pauta faasaina o le aisa.

O faamatalaga na tuuina atu e ni molimau faatuatuaina i Leoleo sa taua ai e faapea, o le fale e pei ona osofaia i Pago Pago, o iina lea e fai ma nofoaga e aga’i uma atu i ai i latou o loo tulei ma faatauina atu le pauta o le aisa e faamautu ai a latou kiliva. 

O ta’avale e 2 e pei ona taua, e fa’aaoga e i latou o loo feoa’i i ta’avale i le kilivaina solo lea o le aisa i nofoaga eseese o loo i ai tagata o loo mana’omia.

I le taeao o le aso Faraile o le vaiaso na te’a nei, na agai atu ai loa se vaega faapitoa o Leoleo i Pago Pago ma latou faataunu’uina le poloaiga a le Fa’amasinoga e sailia ai le fale o Semi Aiava i Pago Pago, atoa ai ma ta’avale e 2 o loo feoai ai ni ali’i se to’alua o loo masalomia i le tuleiina atu o fualaau faasaina.

Pe a ma le to’a 4 na pu’e faapagota e Leoleo i Pago Pago ma auina atu loa i latou nei i le Ofisa o Leoleo i Fagatogo mo suesuega. Sa maua atu ai fo’i i le fale i Pago Pago o le isi ta’avale o loo taua i totonu o le poloaiga a le Fa’amasinoga.

Na aga’i atu le isi vaega faapitoa o Leoleo i le isi nofoaga i Pago Pago ma latou pu’e faapagota mai ai isi alii e to’a 3, ae o isi alii e to’alua na pu’e faapagota i luga o le auala ma auina uma atu ai i latou nei i le Ofisa autu o Leoleo i Fagatogo mo suesuega atili.

Na sailia e Leoleo tino o i latou sa pu’e faapagota ma maua i ai vaega o fualaau faasaina.

O mau faamaonia uma lava e aofia ai fualaau faasaina o le aisa atoa ai ma mea e fa’aaoga e ula ai le aisa sa maua i le taimi o le osofaiga, na auina uma atu lava i le ofisa autu o Leoleo i Fagatogo mo suesuega ma faamaumauga a Leoleo.

I totonu o le poloaiga a le Fa’amasinoga e pei ona taua e le Sui Komesina, o loo taua ai suafa o i latou e to’a 8 e tatau ona sailia ma pu’e faapagota, ona o i latou ia o loo masalomia le aafia i le tulei atoa ai ma le faatauina atu o le pauta o le aisa i tagata lautele e aofia ai ma tagata o le afioaga i Pago Pago.

O le mae’a ai ona fesiligia e Leoleo o i latou na pu’e faapagota ma auina atu i le ofisa autu o Leoleo i Fagatogo, na auina atu ai loa i latou uma i le toese i Tafuna ma taofia ai mo le 48 itula, e faatali ai le taimi e ma’ea ai ona sainia tusi saisai ma pepa molia faasaga ia tei latou.

ULUA’I ILOILOGA A I LATOU UA MOLIA

E to’a 7 latou na pu’e faapagota mai e Leoleo i le latou osofaiga i Pago Pago na tutula’i i luma o le Fa’amasinoga Faaitumalo i le taeao o le aso Gafua na te’a nei. 

O i latou e to’a 7 e aofia ai ni ali’i se to’a 5 faapea ai ma ni tamaitai se to’a 2. O se tasi o tamaitai, o ia lea o Meriko Lomu, o loo taua e le malo i latou tagi, o ia lea o loo autu i ai le pisinisi o le faatauina atu o le aisa i totonu o Pago Pago.

O alii e to’a 5 ua molia e aofia ai Gogo Sitanilei, Desmond Tupa’i, Dimitri Tua-Fruean, Iopu Loe ma Vaatausili Toimoana. O tamaitai e to’alua e aofia ai Lomu ma Lasiera Loke.

O loo tu’uaia uma i latou nei e to’a 7 i le moliga e tasi o le umia faasolitulafono lea o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mo le umi e le itiiti ifo i le 5 tausaga ae le sili atu i le 10 tausaga, pe faasala foi i le salatupe e le sili atu i le $20,000 lona mamafa.

E to’a 3 i latou e ta’i $5,000 lea ua faatulaga e le Faamasinoga e tatala ai le tagata e to’atasi i tua. O i latou nei e aofia ai Tupa’i, Toimoana ma Loke.

O Loe e $10,000 le tupe lea ua fa’atulaga e le Fa’amasinoga e totogi ona faatoa mafai lea ona tatala o ia i tua mai le Toese i Tafuna. 

O Sitanilei ma Tua-Fruean e ta’i $20,000 lea ua fa’atulaga e le Fa’amasinoga e totogi ona faatoa mafai lea ona tatala i laua i tua, ae o Lomu e $30,000 lea ua faatulaga e le Fa’amasinoga e tatala ai o ia i tua. 

Afai ae mafai ona tatala i latou nei i tua mai le Toese i Tafuna, ua poloaina e le Fa’amasinoga i latou ina ia aua ne’i toe taumafai le isi e toe faafesoota’i le tasi a o faagasolo ai taualumaga o a latou mataupu.

Ua poloaina fo’i e le Fa’amasinoga i latou nei ina ia aua ne’i toe maua se isi o i latou i le fale o Aiava i Pago Pago, poo nofoaga fo’i o loo masalomia le tulei ma le faatauina ai o le aisa i totonu o le afioaga i Pago Pago.

TAGI A LE MALO

I le itula e 2:10p.m i le aoauli o le aso Faraile, Novema 11, 2022, na faatulaga ai loa e se vaega o Leoleo faapitoa sa latou osofaiga i Pago Pago i le fale o Semi Aiava ma le faamoemoe e tatau ona maua atu i ai tagata e to’a 8 o loo taua o latou igoa i totonu o le poloaiga a le Fa’amasinoga ina ia saili i latou ma maua, ona o lo latou aafia ai i le tulei faasolitulafono o le pauta faasaina i totonu o le afioaga.

O le to’a 3 na muamua maua e Leoleo e aofia ai Sitanilei, Lomu ma Tupa’i. O i latou ia sa maua e Leoleo o tietie i totonu o le ta’avale a Sitanilei i le taimi na taofi ai e Leoleo le ta’avale a Sitanilei i luma o le nofoaga o le Chinatown i Pago Pago. 

O le ta’avale a Sitanilei, o le isi lea ta’avale e 2 i ai ta’avale o loo taua i totonu o le poloaiga a le Fa’amasinoga e tatau ona saili pe le o maua ai ni fualaau faasaina, aupega, pulufana faapea ai ma mea e faaaoga i le tuleiina atu o fualaau faasaina.

Ina ua faatonu e Leoleo ia Lomu e oso i fafo ma le ta’avale, na vaaia e Leoleo le tago o Lomu ma tia’i ese se mea sa uu i lona lima. Na saili e Leoleo le mea na togi ese e Lomu ma iloa ai, o se pepa iila laititi o loo i ai vaega o le pauta faasaina o le aisa.

Na faatonu foi e Leoleo ia Tupa’i e oso i fafo ma le ta’avale, peita’i ina ua tula’i ese Tupa’i, sa vaaia e Leoleo se paipa tioata o loo i ai vaega o le pauta faasaina o le aisa i totonu o loo taatia i luga o le nofoa i le vaega sa nofo ai Tupa’i.

Na saili e Leoleo totonu o le ta’avale a Sitanilei ma maua ai paipa tioata e 2 o loo i ai vaega o le pauta faasaina o le aisa; o se sikaleti mariuana, o pepa iila laiti e 2 o loo i ai vaega o le pauta faasaina o le aisa, o se masini e fua ai le mamafa, o straws ua uma ona ta tipi tulimanu, o se oti atigi pusa, faapea ai ma ni telefoni se 2.

Ina ua fesiligia e Leoleo ia Sitanilei e faatatau i mea na maua i lana ta’avale, sa ia teena ai le i ai o sona iloa i mea sa maua i le ta’avale. Na faailoa e Sitanilei i Leoleo, o mea uma na maua i totonu o lana ta’avale, o mea a Lomu.

Ina ua fesiligia e Leoleo ia Lomu ma Tupa’i e tusa ai o vaega o fualaau faasaina sa maua ia te i laua, sa a teena ai le faia o ni a laua faamatalaga.

Na aga’i atu le osofaiga a Leoleo i le fale o Semi Aiava i Pago Pago ma maua atu ai le isi to’a 4 o loo taua i le poloaiga a le Fa’amasinoga.

O i latou nei e aofia ai Loke, Iopu, Toimoana ma Tua-Fruean.

Ina ua saili e Leoleo ia Tua-Fruean, sa maua i ai se paipa tioata o loo i ai vaega o le pauta faasaina i totonu. Ina ua fesiligia ia Tua-Fruean e tusa ai o le paipa tioata sa maua ia te ia, sa ia faailoa i Leoleo, e le o ia e ana le paipa tioata.

Na taua e Tua-Fruean e faapea, o le taeao po lava o le aso lea na tuu atu ai e Lomu le paipa tioata o loo i ai le aisa ia te ia ao latou i ai i le fale o Aiava. Sa ia taua atili foi e faapea, e masani ona fesoasoani ia Lomu i le taimi e alu ai i le nofoaga o le Filifili e toe tului mai lana sapalai o le pauta o le aisa.

Sa ia taua e faapea, ua lata i le 3 tausaga talu ona tulei e Lomu le fualaau faasaina i Pago Pago. O le po lea na tula’i mai ai le mafui’e, o le taimi mulimuli lava lea na la o ai ma Lomu e toe faatumu mai le sapalai a Lomu mai le nofoaga o le Filifili.

Na faailoa e Tua-Fruean i Leoleo, e nofo Lomu i le fale o Uepa Loe i le isi pitonu’u o Pago Pago ae faaaoga le fale o Aiava i le isi pitonu’u o Pago Pago e tulei ma faagaioi ai lana pisinisi o fualaau faasaina.

O le molimau lava fo’i lea e tasi a Loke ina ua fesiligia e Leoleo Suesue. Sa ia taua e faapea, o le paipa tioata sa i ai le aisa na maua ia te ia, o le paipa tioata na avatu e Lomu. Na taua atili e Loke e faapea, o fualaau faasaina uma lava sa maua i totonu o le ta’avale a Sitanilei, o mea uma ia a Lomu.

O le vaiaso fou lea ua fa’atulaga e faia ai ulua’i iloiloga o mataupu a i latou nei e to’a 7.