Samoa
This article was added by the user . TheWorldNews is not responsible for the content of the platform.

Toe fa’aauau i se taimi o i luma iloiloga Maota Maualuga tulaga fa’aletonu falema’i LBJ

Pago Pago - AMERIKA SAMOA

O se talanoaga faagaeetia loto na tula’i mai i le taeao o le Aso Tofia i le vaiaso ua te’a i le iloiloga a le Komiti o le Soifua Maloloina/ Falema’i a le Maota, ma na taua ai e le afioga i le ta’ita’ifono ia senetoa Tuiasina Dr. Salamo Laumoli e fa’apea, na valaau le iloiloga mo le silafia atili o fuafuaga a le falema’i o le LBJ mo le fausia o se falema’i fou.

Ae na finau isi senatoa e fa’apea, e manaʻomia muamua le suʻeina o le aʻa ma le mafuaʻaga o faʻafitauli o loʻo feagai ma le falemaʻi ae le o le taimi lenei e talanoaina ai le fausia o le falema’i fou. 

E pei ona lipotia muamua e le Samoa News, ua mae’a ona faalauiloa faalauaitele e le afioga i le ali’i kovana ia Lemanu P. S. Mauga, o le falema’i fou lea e fausia i Tafuna, ua vaaia nei e le Matagaluega o le Soifua Maloloina- e le o toe vaaia e le LBJ.

O le iloiloga a le Maota Maualuga, na au ai le ali’i foma’i sili a le LBJ, Dr Joseph Shumway ma le Sui Pule Sili-tofia, Dr. Akapusi Ledua, ma latou fa’afofoga ai i le talanoaga o lo o fa’aauau i le va o afioga i senatoa.

Sa fa’atulaga fo’i ona auai i le iloiloga o le ta’ita’ifono o le Komiti Fa’afoe a le LBJ, Dr. Malouamaua Tuiolosega, lea ua malaga vatu i fafo e auai i le fonotaga a le Asosi a Ofisa o le Soifua Maloloina a le Pasefika (PIHOA) i Honolulu.

I le amataga o le iloiloga, na fa’amatala ai e Tuiasina le fa’amoemoe, o le fa’afofogaina lea i le LBJ i fuafuaga mo le falema’i fou.

Ae na saunoa le afioga i le ali’i senatoa ia Magalei Logovi’i e fa’apea, o le fa’aauauina lea o le iloiloga talu ai ma ta’ita’i o le LBJ, e le i mae’a, e talanoaina ai fa’afitauli ma mataupu o atugaluga o lo o tula’i mai i le LBJ, atoa ai ma le auala sili e foia ai.

Na finau Magalei e fa’apea, e le o le taimi lenei e talanoaina ai se falema’i fou, ae o lo o i ai ni mataupu mamafa e tatau ona fa’amuamua i le LBJ, ma o nei mataupu na mafua mai i fa’aiuga a le komiti fa’afoe a le falema’i.

Sa ioeina e le afioga i le ali’i senetoa ia Malaepule Saite Moliga le saunoaga Magalei, ma ia faapea ai, o le fa’amoemoe o lo’o ua’i atu i le taimi nei, o fa’afitauli o lo o tula’i mai i le falema’i e tatau ona fo’ia ma e tatau ona i ai le ta’ita’ifono o le Komiti Fa’afoe faapea ai ma le ta’ita’i o tausima’i ina ia maua nisi molimau ma fa’amalamalamaga o mea o lo’o tutupu i le falemai.

Sa ia ioe fo’i ma Magalei e fa’apea, e le o le taimi lenei e talanoaina ai fuafuaga mo se falema’i fou.

Ae na saunoa Tuiasina e faapea, ua oo i le taimi e agai ai i luma ma ua auai molimau a le LBJ e tuuina atu i luma o le Senate fuafuaga mo le falemai fou. Fai mai a ia "e leai se faʻamoemoe e talanoaina le taimi ua tuanaʻi" - ae o le agai i luma.

Na saunoa isi senatoa, e tatau ona saili atili e le komiti le mafua’aga o fa’afitauli i le falema’i.

Saunoa le peresetene o le Senate ia Tuaolo Manaia Fruean e fa’apea, e taua le i ai o le ta’ita’ifono o le Komiti Fa’afoe e saili atili ai i mataupu o lo o feagai ma le LBJ i le taimi nei, ma saili ai fo’i ni fofo, ae le o se taimi e talanoa ai e uiga i le falema’i fou.

I le fa’ai’uga o nei talanoaga, na fa’ailoa ai e Tuiasina e fa’apea, e le fa’agasolo le iloiloga se’i vagana ua toe fo’i mai Dr. Tuiolosega i le teritori i le aso 10 o Aperila.

A o le’i faia le faaiuga o le iloiloga, sa tuuina atu ai e Dr. Ledua le faatoesega mai ia Dr. Tuiolosega, lea sa faatulaga e tulai i le iloiloga. Ae ona o le leai o ni nofoa o avanoa i le po o le aso Tofi o le Hawaiian Airlines i Honolulu, na malaga atu ai Dr. Tuiolosega i le vtaeao o le Aso Faraile e ui atu i Apia, Samoa e pu’e le vaalele a le Fiti Airways i Honolulu.

Dr. Tuiolosega “e momoli atu lana faatoesega ona o tulaga le manuia,” o le saunoaga lea a Dr. Ledua.