Samoa
This article was added by the user . TheWorldNews is not responsible for the content of the platform.

Tu’uaia ni ali’i i le talepe fale ma le gaoi

Pago Pago - AMERIKA SAMOA

E to’alua ni ali’i mai Petesa na pu’e faapagota e Leoleo i le masina na te’a nei ma ua molia i le tulafono, e mafua mai i le faalavelave lea na la ulufale faamalosi ai i totonu o se fale ma ave faagaoi ni meatotino sa i ai e aofia ai telefoni feavea’i, o se uati ma se tino i tupe e $640.

E pei ona taua e le malo, o le susuga a Vincent Sooula ma se ali’i e talavou i lalo o le tulafono, o i laua ia na osofaia le fale i le vaveao o le aso 20 o Aokuso, 2022 pe tusa o le itula e 5:00 i le taeao ae ave faagaoi meatotino e pei ona taua. Na muamua loka e Leoleo le susuga a le alii e ana le fale na talepe ma ave faagaoi meatotino i totonu, ona o tu’uaiga i lona faaoolima lea i le alii o Sooula.

O le afiafi o le aso lava lea na faatoa pu’e faapagota ai loa e Leoleo le ali’i o Sooula ma molia i le tulafono e tusa ai o gaioiga sa la faatinoina ma le alii e 16 tausaga na la to’alua

E le o manino mai i le tagi a le malo pe ua molia fo’i le ali’i e talavou i lalo o le tulafono i lenei mataupu pe leai fo’i. 

E pei ona taua e le malo i le latou tagi e fa’apea, i le taeao o le aso 20 o Aokuso pe tusa o le 6:00 i le taeao na vili ai e le alii e ana le fale na aafia le Ofisa o Leoleo mo se fesoasoani, i lona fale ua osofaia e ni tagata ae ave faagaoi ana meatotino sa i ai. E lei umi ona mae’a ona vili e le alii lea ia Leoleo, ae toe maua fo’i e Leoleo le isi fo’i telefoni e sau mai lava i le nofaoga lea e tasi, o le telefoni lea mai se tasi o Tina matua o le pitonu’u lava lea, e talosagaina ai se fesoasoani i se vevesi o loo tula’i mai i le latou pitonuu, lea o lo o masalomia le aafia ai ma se laau malosi.

Na taunu’u Leoleo ma feiloa’i ma le alii e ana le fale, ma ia faailoa ai loa le tulaga sa tula’i mai i lona fale. A o talanoa Leoleo ma le alii e ana le fale, na faateia Leoleo ina ua savali atu se Tina ma talosaga atu i Leoleo mo se fesoasoani, i lana tama na fasi e le alii e ana le fale.

Na taua e le alii e ana le fale i Leoleo e fa’apea, na osofa’i e ni tagata lona fale i le taeao po lava ma ave faagaoi ai ana telefoni e 2, o pea seevae faigaluega, o lana uati atoa ai ma lana ato tupe sa i ai le silia i le $600 i totonuu. Na taua atili e le alii lea i Leoleo e faapea, ua mae’a ona ia fesiligia se alii talavou e igoa ia F.T., ma ua ia faailoa atu ia te ia, o le alii o Sooula na osofaia lona fale ae ave faagaioi ana meatotino.

Na aga’i atu Leoleo i le fale o Sooula ma fesiligia loa o ia e uiga i lenei mataupu, ma ioeina ai e Sooula lo la osofaia ma lana uo o F.T. o le fale o le alii na aafia  Na taua e le ua molia i Leoleo e fa’apea, i le po o le aso 20 o Aokuso sa la eva ai ma F.T i luma o le fale o lana uo ma la talatalanoa i ni gaioiga e faia i lea po. 

Na faateia o ia ina ua fai atu F.T, e mana’o la te o e osofa’i le fale o le alii na aafia, atonu e maua ai ni mea aoga mo i laua. Na malilie alii nei e to’alua ma alu loa le la osofaiga i le fale. E le i mafai ona la tatala le faitoto’a pito i tua, ona sa loka mau mai totonu, ona faia ai loa lea e F.T.  o le tonu, o le a ia oso i le faamalama ina ia maua ai le avanoa e ulufale ai i totonu. 

E pei ona taua e le ua molia i Leoleo, o F.T na alu i totonu o le fale ae o ia na faatali atu i fafo e vaai nisi e o atu. E lei umi ona alu F.T. i totonu ae toe fo’i atu ma le faamatalaga, e i ai telefoni e 2 ma le ato o loo i ai le siaki i totonu o lo o i luga o le laulau. Na faatonu e Sooula ia F.T e au e aumai meatotino e pei ona ia taua. Na alu F.T. ma le isi telefoni, ae o le isi telefoni ma le siaki tupe na alu ma Sooula

Na uma ona fesiligia e Leoleo ia Sooula ona latou fesiligia lea o le alii laititi o F.T e uiga i lenei mataupu, ma faamaonia ai fo’i e F.T lo la osofaia ma Sooula o le fale o le alii na aafia. Sa ia taua i Leoleo e faapea, o ia e ana le tonu na fai la te osofaia le fale i se taimi o le vaveao. Sa ia taua fo’i e faapea, o ia na oso i le faamalama ma ulufale ai i totonu ina ua le mafai ona la tatalaina le faitoto’a, ae faatali atu Sooula i fafo e vaai se isi e alu atu i le fale.

Na ioe F.T., o ia na aveesea maia telefoni e 2 ma le ato o lo o i ai le siaki tupe i totonu ma ave ia Sooula, ona ave lea e Sooula o le siaki tupe ma le isi telefoni, ae o ia na alu ma le isi telefoni. Sa i ai matua o F.T i le taimi na fesiligia ai o ia e Leoleo.

Na taua atili e F.T o Sooula na faamaitea le tonu e osofa’i le fale o le alii na aafia. I le taeao o le aso na sosoo ai, na faateia ai o ia ina ua alu atu o le alii na aafia i lona fale ma valaulia o ia la te o i lona fale (fale o le alii na aafia) la te eva ai. O le taimi lava na la taunuu ai i le fale o le alii na aafia, na faateia ai loa o ia ina ua faasaga atu o le alii na aafia ua fasi o ia ma fesiligia o ia i ana meatotino sa ia gaoia, ae na ia faailoa i ai, o Sooula na osofaia lona fale.

O le masina na te’a nei na tula’i ai Sooula i luma o le Fa’amasinoga Faaitumalo. 

O lo o molia Sooula i le moliaga o le talepe fale i le tulaga 2 faapea ai ma le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, pe faasala fo’i i faasalaga uma ia e 2.

E $5,000 le vaega tupe lea ua faatulaga e tatala ai Sooula i tua mai le Toese i Tafuna. Afai ae tatala o ia i tua, e le mafai ona ia toe taumafai e faafesootai molimau a le malo e aofia ai ma le na aafia i lana mataupu. E le mafai fo’i ona ia toe solia se tulafono, a ia avea o ia ma tagatanu’u lelei e tausisi i tulafono a le malo, ma auai i soo se taimi e valaau ai lana mataupu.

O le masina fo’i na te’a nei na faataunuu ai le ulua’i iloiloga o le mataupu a Sooula i luma o le Faamasinoga Faaitumalo.

I lea iloiloga, e toatasi le molimau na valaau e le malo, o ia fo’i lea na autu i ai le suesueina o lenei mataupu. 

Na taua e le alii Leoleo Suesue i lana molimau e fa’apea, na muamua molia e le malo le alii na aafia i lona ulufale faamalosi lea i totonu o le fale a Sooula ma faaoolima ia te ia e aunoa ma se faatanaga faaletulafono. O le maea ai ona fesiligia e Leoleo o isi molimau, na faatoa molia ai loa ma Sooula i le masina lava fo’i na te’a nei.

Ina ua fesiligia e le loia a Sooula le molimau a le malo, i le mafua’aga ua ala ai ona molia Sooula i nei solitulafono mamafa, ae le i alu i o ia i totonu o le fale o le alii na aafia e na o F.T na ulufale i ai, peita’i na tali le molimau, o le lagolago ai o Sooula i gaioiga uma sa faia e F.T, o lona sao lava fo’i lea i lenei osofaiga.

Na fesili le alii Loia Fautua ma tula’i mo le ua molia i le molimau a le malo pe na toe maua telefoni feavea’i, seevale, o le uati ma le tupe na leiloa, ae na tali le molimau, e na o le uati ma le telefoni na maua, ae o le tupe na fa’aaoga e le ua molia . O meatotino na toe maua, o meatotino ia na alu ma le susuga a Sooula.

Na tete’e Sooula i moliaga faasaga ia te ia ina ua tula’i i luma o le Faamasinoga Maualuga i le 2 vaiaso talu ai mo lana ulua’i iloiloga. ma ia teena ai tu’uaiga uma faasaga ia te ia.

O le masina fou lea ua faatulaga e toe tula’i ai le ua molia i luma o le Fa’amasinoga Maualuga, i le mae’a ai lea ona ia teena o le tagi a le malo faasaga ia te ia. O lo o tumau pea ona taofia le ua molia i le Toese i Tafuna ina ua le mafai ona ia totogi le tupe sa faatulaga e tatala ai o ia i tua.