Samoa
This article was added by the user . TheWorldNews is not responsible for the content of the platform.

Tulafono taufaaofi mo suiga tulafono o mea e aveesea ona o sala

Pago Pago - AMERIKA SAMOA

O se tulafono taufaaofi a le faigamalo a Lemanu & Talauega e pei ona tuuina atu i le Fono Faitulafono e iloiloina ma pasia, e fa’alautele ai le malosiaga e aveese ai (forfeiture), ina ia aofia tupe maua mai fefaataua’iga o fualaau faasaina e ala i tulafono mo tagi-savili. 

I le faatomuaga o le tulafono taufaaofi, o lo’o fa’ailoa ai e fa’apea, o tulafono o le aveesea o aseta savili o se auupega taua e aveese ai mai tagata solitulafono mea latou te faaaoga e soli ai tulafono ma mea e maua mai ai. 

Ua le gata i lea, o tupe e maua mai le aveesea o aseta e mafai ona faaoga e tauia aii i latou na afaina ma maua ai tupe e maomia mo le faia o suesuega ma le faamasinoga o gaoioiga solitulafono.

Ma e aiaia foi i le tulafono taufaaofi le tufatufaina e aofia ai tupe totoe mai mea na aveesea i le Fono Faitulafono, ma manaomia ai le lipoti i le Fono, le Kovana, ma le Suetusi a le Teritori ina ia faalauaitele i le itulau o faasalalauga i upega tafailagi a le malo o Amerika Samoa. 

O tulafono a Amerika Samoa o lo’o i ai i le taimi nei mo le “aveeseina” (forfeiture), o lo'o ta'u mai ai i se vaega, o vaila'au fa’asaina, na gaosia, tufatufaina, tu'uina atu, fa'aulufale mai pe maua mai i le soliga o le tulafono o vaila'au fa'alotoifale e mafai ona fa'aumatia.

E fa'apea fo'i ona aveeseina o oloa ma mea faigaluega o so'o se ituaiga, o lo'o fa'aaogaina, pe fa'amoemoe mo le fa'aaogaina, i le gaosiga, fa'afefiloi, fa'agaoioiga, fa'aulufale mai po'o le fa'aulufale atu o so'o se mea fa'atonutonu.

O suiga o lo’o taua i le tulafono taufaaofi a le faigamalo, e aofia ai le fa’avaeina o se vaega fou o le tulafono lo’o i ai nei e fa’aulutala - “Avesea o Aseta Savili”.

O lo’o taua ai foi e faapea, soo se leoleo o lo o i ai le malosi e pu’e fa’apagota mai ai, e mafai ona faoa faamalosi meatotino e mafai ona faoa pe afai e i ai se mafuaaga tatau e talitonu ai le tagata ofisa e faapea o lea meatotino e mafai ona faoa i lalo o tulafono a Amerika Samoa.

Talu ai ona ua malolo le Fono Faitulafono - talu mai le aso ananafi mo le 5 vaiaso - fa’atoa faatulaga iloiloga o lenei tulafono taufaaofi pe a toe tauaofia le Fono Faitulafono i le aso 13 o Mati.