Samoa
This article was added by the user . TheWorldNews is not responsible for the content of the platform.

Tulafono taufaaofi suia ai tulafono tau lafoga i Amerika Samoa

Pago Pago - AMERIKA SAMOA

O le aso Faraile na te’a nei na fa’aulufale mai ai i luma o le Senate le tulafono taufaaofi a le malo, ua ma’ea pasia e le Maota o Sui, o loo taumafai e fa’amautinoa le tumau pea o le fua faatatau mo tuusaunoaga, toesega a le tagata lava ia, atoa ai ma tului i tulaga e 2000 o le Tulafono Lafoga a Amerika Samoa. 

Na pasia e le Maota i le aso Tofi na te’a nei.

Na fa’ailoa e le afioga i le ali’i kovana ia Lemanu P. S. Mauga i ta’ita’i o Fono i le amataga o le masina na te’a nei e fa’apea, o le mana’omia o lenei suiga i le tulafono o lafoga, na afua mai i se fa’ai’uga na faia e le Fa’amasinoga Maualuga a Amerika Samoa, i se tagi faaulu a se tagata tagata totogi lafoga fa’asaga i le malo o Amerika Samoa. 

“O suiga ua fuafuaina e aveese ai le tulaga e ono tulai mai ai isi ituaiga o tagi i le lumanai,” o le faamalamalamaga lea a le alii kovana.

Na pasia e le Maota Maualuga i le masina na te’a nei lana vaega o le pili ma o lo o fa’agasolo i luma o le Maota o Sui i le taimi nei.

O isi mataupu i le Maota Maualuga, talu ai nei na faalauiloa ai e le Peresetene o le Senate ia Tuaolo Manaia Fruean le tofiaina o isi senatoa e to’alua i le komiti o le Fono, lea o lo o gafa ma le tapenaina o le fuafuaga ma le ripoti mo le faamanatuina o le 75 tausaga o le Fono Faitulafono.

O sui fou o le afioga i le ali’i senatoa ia Utu Sila Poasa ma Ponemafua Tapeni, lea o lo o avea ma sui o le Fono a le Maota Maualuga i le komiti, lea ua ma’ea ona tofia ai sui muamua e toatolu, afioga i senetoa ia Fai’ivae Iuli Godinet,  Satele Lili’o Aliita’i, Satele Lili’o ma Malaepule Saite Moliga.

O lo o fa’amoemoe le Maota o Sui e fa’alauiloa i se taimi o i luma isi faipule e to’alua i le komiti, lea ua mae’a ona aofia ai Faipule Vailoata E. Amituana’i, Sam Meleisea ma Malaeoletalu Melesio Gurr. E to'a 10 sui o le komiti fa'amanatu, ta'i lima mai maota e lua o le Fono.

E lei tuuina mai se taimi faatulagaina poo afea e tuuina atu ai se lipoti a le komiti i le Fono. 

Na tuua e Tuaolo le teritori i le po o le aso Tofi na te’a nei mo talavai ua mae’a fa’atulaga i fafo atu o le motu. Ona sosoo ai lea ma le auai atu o ia i senatoa i Las Vegas mai le aso 15 Fepuari e oo atu i le aso 16 Fepuari, mo le fonotaga  o le Teugatupe o le Litaae a le malo o Amerika Samoa.