Samoa
This article was added by the user . TheWorldNews is not responsible for the content of the platform.

Tuuaia se alii i lona fa’aaogaina o se aga’ese e faaoolima i seisi

Pago Pago - AMERIKA SAMOA

I le vaiaso ua mavae, na agai atu ai leoleo e tali se valaau mai i Nu’uuli, lea na maua atu ai ni alii se to’afa i luma o le faleoloa, o lo o tau togafiti se alii o lo o taoto i lalo.  Na fa’afeso’otai e leoleo le vaega a le falemai mo se togafitiga.

E tusa ai ma ripoti a le ofisa a leoleo, o le Aso Lulu, Iuni 7, 2023 i le 10:00 i le afiafi, na faanatinati atu ai leoleo e tali i le valaau, ma sa o latou talatalanoa ma le na faamanu’alia ma pu’e ata o manu’a, a o faatalitali atu i le taunuu o le vaeg a le EMS mo le aveina atu o le na faamanu’alia mo nisi togafitiga.

Ma aveina atu ai le susuga o Mahoni Faitau, i le ofisa a leoleo mo a latou suesuega.  O Mahoni na valaauina leoleo ma o ia lea ua molia nei i lenei mataupu.  Sa faamatalaina e Mahoni e faapea, sa i lo latou fale ma lona uso o Jared, ina ua pasi ane le ua manu’a ma le uila a lona uso o Jared lea na gaoia i le po ua mavae.

Na faamatala e Jared lona uunaia o lona uso e la te o e su’e lana uila, ma o lea na la agai atu ai I luma o le alatele i Nu’uuli.

Na faamatala e Mahoni, o la e muamua o ia i luma ae ona vaaia le tuliloaina e lona uso o le alii lea ua manu’a.  Sa ia tamoe atu e tuliloa la’ua, ma ia maua atu lona uso ua i luga o le alii ua faamanu’alia, i luma o le faleoloa tuai a Mr. Lavalava.

Ma sa ia tamo’e atu i le uunai ese lona uso mai luga o le ua faamanualia, ae pa’u mai ai se agaese.  Ina ua tu mai i luga Jared, sa o la vaaia ua manu’a le alii o lo o taatia i lalo.  Na ta’ua e Mahoni le afaina o le itu tauagavale o le ua faamanualia ma sa ia tago loa aveese lona ofutino e o’omi ai le manu’a o lea alii.  Ma valaau loa leoleo.

Ina ua mae’a ona faatalanoaina e leoleo ia Faitau, sa amata loa ona saili e leoleo ia Jared.  Ina ua taunuu leoleo i le maota o Mahoni, na agai atu leoleo i le uso o le tua’a o lenei auuso, mo sana faamatalaga po o fea o iai le alii lea o lo o tau saili.

Sa faapea ona liliu leoleo mo le faatalanoaina o le alii na faamanualia ma sa aumai faatasi i la’ua ma si ona tina i le ofisa a leoleo mo sana faamatalaga.

E tusa ma le faamatalaga a le na faamanu’alia, na alu atu i le faleoloa o lo o faatalitali mai Jared i luma o le fale faatali pasi i Tafuna.  Ma na aga’i atu Jared ua lu’i o ia, la te fufusu.  Na la’a mai i tua ae tui o ia e le ua molia i le agaese ma sa ia taumafai e tali mai osofaiga a le ua molia.

Na faamatala e le na manu’a, ua tamoe faavave i se fale tuufua na i tua o le fale faatali pasi, ae na toe maua atu o ia e Jared ma tui lona itu tauagavale ma sa faasaga mai ua tu’i le ua molia ma ia tamo’e agai i luma ole alatele.

A’o ia tamo’e, sa ta’ua e le ua manu’a, lona vaaia le tamo’e atu o Mahoni ma sa ia manatu o lo o alu atu foi Mahoni e fasi o ia, ma ina ua taunuu I luma o le Mr. Lavalava, na pa’u ai iina.  Sa ia fai mai ia Mahoni, o lo o manu’a o ia, ma o lea na taumafai ai Mahoni e fesoasoani atu ia te ia ma valaau loa le ofisa a leoleo.

O le taeao na sosoo ai, na agai atu leoleo ma le ua faamanu’alia faatasi ma lona tino, e faasino i leoleo nofoaga tonu na tupu ai le faalavelave.  O lo o ta’ua i faamaumauga a leoleo, e 8 filo na su’I ai le tu tauagavale o le na faamanu’alima, ae 4 filo na su’i ai lona lima tauagavale.

Ua molia nei Jared Faitau i le faaoolima ma e $10,000 le tinoitupe ua faatulaga e mafai ona tatala ai I tua pe afai ae mafai ona pu’eina o ia.