«Սեպտեմբերի 13-ին ադրբեջանական զինուժի հարձակումը Հայաստանի սուվերեն տարածքի վրա ուղեկցվել է նաև մեր քաղաքացիների գույքի հափշտակություններով և թալանով»,- Ազգային ժողովում կառավարության հետ հարցուպատասխանի ժամանակ ասաց ՔՊ-ական պատգամավոր Արմեն Խաչատրյանը։
Նա հարցով դիմեց կառավարությանը՝ արդյո՞ք արդեն որոշակի առումով գույքագրվել են այդ հափշտակության վնասները, օրինակ, միայն Գորիսի Խնձորեսկ գյուղում մի քանի տասնյակ մեր հայրենակիցներ կորցրել են իրենց խոշոր և մանր անասունները, որոնք հափշտակվել են ադրբեջանցիների կողմից, իսկ մի շարք ընտանիքների համար անասնապահությունն ընտանիքի միակ եկամտի աղբյուրն է։ ՔՊ-ական պատգամավորը հետաքրքրվեց, թե ինչպիսի՞ միջոցառումներ են իրականացվում այդ գույքային վնասները փոխհատուցելու ուղղությամբ։
Փոխվարչապետ Համբարձում Մաթևոսյանն ասաց, որ կառավարությունը մի շարք ծրագրեր ունի աջակցելու Ադրբեջանի ագրեսիայի հետևանքով տուժած համայնքներին, մարզերին, այս դեպքում Վայոց ձորի, Գեղարքունիքի, Սյունիքի մարզերին։
«Մենք նախորդ կառավարության նիստում քննարկել ենք և մարզպետարաններին հատկացրել ենք գումար ֆինանսական աջակցության, սոցիալական խնդիրներ լուծելու համար»,- նշեց նա։
Մաթևոսյանի խոսքով, քաղաքաշինության կոմիտեի հետ ընթացիկ աշխատանքներ են իրականացնում այն համայնքներում, որտեղ տուժել են քաղաքացիների սեփականությունը, պետական գյույքը՝ դպրոց, մանկապարտեզ։
«Միանշանակ կաջակցենք, եթե պարզվի, որ քաղաքացիները տուժել են ագրեսիայի հետևանքով»,- ասաց նա։
