Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Այսօր Aravot.am-ն ահազանգ էր ստացել, որ Գյումրու Լևոն Մադոյանի անվան փողոցի ասֆալտապատած մայթը քանդել ու շինարարություն են ծավալում։ Ահազանգողը նշել էր, որ այդ տարածքում, ամենայն հավանականությամբ, խանութ են սարքում։
Aravot.am-ը գնաց ահազանգի հետքերով՝ պարզելով, որ շինարարություն իրականացնողը Երվանդ Խանամիրյանն է՝ Գյումրու ավագանու ՔՊ-ական անդամներից մեկը։
Նա մեր զրույցում պարզաբանեց, որ ոչ թե խանութ է կառուցում, այլ զբոսաշրջային գործունեություն իրականացնող գրասենյակ, որն առնվազն 7 աշխատատեղ է ապահովելու, և որ շինարարությունն ավարտին հասցնելուն պես՝ անմիջապես կասֆալտապատի քանդված տարածքը։
Երվանդ Խանամիրյանը դիմում է ներկայացրել քաղաքապետարան՝ շինթույլտվություն ստանալու համար, սակայն պատասխանել էին, որ դիմումին ընթացք կտրվի շահագրգիռ կառույցներից համաձայնություն ստանալուց հետո։ Նա դիմումներ է ներկայացրել «Հայաստանի էլեկտրական ցանցեր» ՓԲԸ, «Գազպրոմ Արմենիա» ՓԲԸ և «Վեոլիա ջուր» ընկերությանը, սպասում է պատասխանին։
Գյումրու գլխավոր ճարտարապետ Հենրիկ Գասպարյանը ևս պարզաբանեց, որ տվյալ տարածքում կառուցապատում իրականացնելու նպատակով դիմում է ներկայացվել, սակայն դեռ ընթացք տրված չէ, շինթույլտվություն այս պահին չի տրվել, չկա փաստաթուղթ։
Երվանդ Խանամիրյանը մեզ պարզաբանեց, որ ինքն, ըստ էության, տուժած գործարարներից մեկն է։ Տիգրան Մեծ 9/2 հասցեում ունեցել է վուլկանիզացիայի կետ, տարածքը վարձակալել է 30 տարի ժամկետով՝ քաղաքապետարանի հետ պայմանագիր կնքելով։ Սակայն Տիգրան Մեծ փողոցի կապիտալ ասֆալտապատման ժամանակ ստիպված է եղել հրաժարվել իր բիզնեսից, քանի որ այդպես էր պահանջում քաղաքի շահը։ Ըստ Երվանդ Խանամիրյանի, մոտ 5 տարի տուժել է, արդյունքում, ըստ պայմանագրի, պարտավորվելով քաղաքապետարանին վարձակալության գումար վճարել, իրականում բիզնեսը չաշխատեցնելով։
Այժմ վերոնշյալ բիզնեսի փոխարեն՝ զբոսաշրջային գործունեություն է ծավալելու Լևոն Մադոյան փողոցում, որի համար դիմում ներկայացրել քաղաքապետարան և մի քանի օր առաջ գրավադրել է իր տունը։
Նունե ԱՐԵՎՇԱՏՅԱՆ