«Պաշտպանության նախարարությունը շուրջ 2 ամիս ձևավորել է պահանջվող փաստաթղթերի փաթեթի մի մասը և այն ներկայացրել հանձնաժողովի ուսումնասիրմանը: Այն ներառում է շուրջ 3500 նմուշ օպերատիվ մակարդակի տեքստային և գրաֆիկական փաստաթղթեր՝ ընդհանուր 10 հազար էջից ավելի ծավալով, որը դեռ վերջնական չէ»,-ԱԺ-ում հայտնեց ՔՊ պատգամավոր Անդրանիկ Քոչարյանը՝ հիմնավորելով 2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով ստեղծված քննիչ հանձնաժողովի գործունեության ժամկետը երկարացնելու իր նախաձեռնությունը:
Վերջինս առաջարկեց 6 ամսով երկարացնել հանձնաժողովի աշխատանքները:
Նրա խոսով՝ նոր փաստեր և տեղեկություններ բացահատելուց հետո կարիք է առաջացել ՊՆ-ից և պետական այլ մարմիններից ստանալ դրանցից բխող կամ փոխկապակցված ևս այլ նոր փաստաթղթեր և տվյալներ:
«Կատարվելիք աշխատանքների հիման վրա հնարավոր կլինի կազմել հանձնաժողովի կողմից քննման ենթակա անձանց ցանկը և նրանց հրավիրել հանձնաժողով»,-հայտարարեց Քոչարյանը:
