Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Այսօր ԱԺ պաշտպանության եւ անվտանգության հարցերի հանձնաժողովի նիստում քննարկվեց ՔՊ պատգամավորներ Վիլեն Գաբրիելյանի, Արմեն Խաչատրյանի եւ Անդրանիկ Քոչարյանի հեղինակած «Զենքի շրջանառության կարգավորման մասին» օրենքի աղմկահարույց նախագիծը՝ երկրորդ ընթերցմամբ:
Հիշեցնենք, որ այդ նախագծով սահմանվում են քաղաքացիական, ծառայողական զենքի ներկրման, կրման թույլտվության, լիցենզիա տալու, արտոնագրից զրկելու հարցերը, զենքի շրջանառության սահմանափակումները, խստացվում է ապօրինի զենքի համար պատասխանատվությունը: Ըստ հեղինակի, այս նախագծով բարձրացնում են հասարակության պաշտպանվածությունը, նախագիծը կարգավորում է ՀՀ-ում զենքի եւ ռազմամթերքի շրջանառությունը, նպաստում է որսորդության, սիրողական եւ սպորտային հրաձգության, ինչպես նաեւ ռազմամարզության զարգացմանը, ներդրվում է զենքի հետ վարվելու մշակույթը, որն ուղղված կլինի քաղաքացիների մարտունակության բարձրացմանը:
Հրաձգության ֆեդերացիայից երեկ նախագծի հեղինակները նամակ են ստացել, որով 4 խնդիր են մատնանշել: Հիմնական զեկուցող Վիլեն Գաբրիելյանը թվարկեց. «Մեկը վերաբերում է նրան, որ երբ իրենց զենքերով գնում են դուրս ու ներս, ամբողջ աշխարհում ոստիկանությունն է թույլտվություն տալիս, բայց մեզ մոտ մաքսային մարմիններում խնդիրներ են լինում: Դա մեր դաշտում չի: Մենք թողնում ենք ներկրումն ու արտահանումը ոստիկանության թույլտվությամբ, բայց մաքսային մարմինների հետ պիտի կարգավորվի: Մյուս խնդիրը մարզական գույքի, զենք-զինամթերքի ներմուծման եւ արտահանման հարցն է, գույքի մասով նախարարության խնդիրն է, զենքի մասով մենք լիազորող նորմը տալիս ենք: Եվս մի հարց կա. մարդիկ ասում են, որ գործող «Գնումների մասին» օրենքով խնդիրներ են լինում զենք գնելիս: Դա արդեն գլոբալ խնդիր է»:
ԿԳՄՍ փոխնախարար Կարեն Գիլոյանն ասաց, որ մարզիկները արտասահմանից Հայաստան հրաժարվում են գալ մրցումների, որովհետեւ այստեղ զենք տանել-բերելը օրեր է տեւում. «Չեն կարողանում զենքը ստանալ մաքսայինից, որ մասնակցեն մրցմանը, պիտի մի շաբաթ սպասեն, հետո կրակեն: Սովորաբար մի տեղ երբ գնում են մրցման, հաջորդ օրը մասնակցում են, կրակում են ու տուն են գնում, մեզ մոտ շաբաթներով սպասում են, մինչեւ զենքը տան: Անգամ մերոնք, երբ իրենց զենքով մի տեղ գնում-գալիս են, շաբաթներ է տեւում, մինչեւ զենքը վերցնում են: Դրա համար խնդրում ենք օրենքի ուժ տալ: Ներքին պայմանավորվածություններով, ճիշտ է, երբեմն խնդիրը լուծում ենք, բայց սրանով ուղղակի հենք կստեղծենք, որ Հայաստանում կայանան միջազգային մրցումներ: Մի բան է, երբ դու ես գնում ու փող ես ծախսում, մի բան է, երբ տանտիրոջ կարգավիճակում ես, ավելի վստահ ես ելույթ ունենում ու ավելի լավ արդյունքներ ես ունենում»;
Բացի այդ, Գիլոյանը պատմեց, որ զենք արտադրող գործարաններից մեկը Հայաստանի ֆեդերացիային, հաշվի առնելով, որ ունենք Հրաչիկ Բաբայանի եւ նման այլ լավ մարզիկներ, Եվրոպայի չեմպիոն ունենք, ներուժ ունենք, զենքը մեզ տալիս է 3000 եվրո արժեքով, ընդ որում՝ ամենաժամանակակից ու լավ զենքը. «Այդ նույն զենքը այլ կազմակերպությունից վաճառում են 6000 եվրոյով: Մինչեւ մենք մաքսազերծում ենք, գալիս հասնում է, 8000 եվրո է դառնում: Եթե 3000-ով ենք կարողանում գնել, ինչո՞ւ 8000 տանք: Դրա փոխարեն մի քանի զենք կգնենք: Ֆեդերացիան 100 հատ զենք չի գնելու, որ ասեն՝ 100-ից 40 հատը ջարդվեց: Մի զենքը 10 տարի օգտագործում է, շատ-շատ՝ 1 տարում 5-6 զենք գնեն: Դրա եղածն ինչ է, որ ասեն՝ ֆեդերացիան կարող է բիզնես անի: Ինքը գնելու է կոնկրետ սպորտային նպատակներով ու սպորտի համար: Ընդ որում, եթե գործարանից ենք գնում, գործարանը բռնակից սկսած՝ ամեն ինչ հարմարեցնում է մարզիկին, ձեռքի չափին: Իսկ խանութից առածը տանում են տան պայմաններում հարմարեցնում»:
Վիլեն Գաբրիելյանը պատասխանեց, որ դա մաքսայինի խնդիրն է: Նա տեղեկացրեց, որ կառավարությունն ունի հրաձգային սպորտի զարգացման հայեցակարգ, մինչ օրս քայլեր չի արվել: Այսինքն, գնդակը նետեց կառավարության դաշտ:
Հանձնաժողովի նախագահ Անդրանիկ Քոչարյանն ասաց, որ այդ հարցն այս նախագծի մեջ չի տեղավորվում, բայց այլ կարգավորման ձեւ կգտնեն ու կառավարության հետ կաշխատեն. «Արծրուն Հովհաննիսյանը հիմա կրակում է այլ վայրերում, կիջնի, կհանձնարարենք, ձեր հետ կապի դուրս գա եւ նայենք սրա լուծումը ոնց է: Արծրուն Հովհաննիսյանին էլ առողջություն մաղթենք»:
Հռիփսիմե ՋԵԲԵՋՅԱՆ
