Սիրիայի նախագահ Բաշար ալ-Ասադը շաբաթ օրը Դամասկոսում ընդունել է Իրանի արտաքին գործերի նախարար Հոսեյն Ամիր Աբդոլլաիանին։ ՏԱՍՍ-ի փոխանցմամբ՝ այդ մասին հայտնում է Al-Ikhbariya հեռուստաալիքը։ հաղորդման համաձայն՝ Իրանի ԱԳՆ ղեկավարը աշխատանքային այցով Սիրիա է ժամանել հարևան Լիբանանից։
Դամասկոսի միջազգային օդանավակայանում իրանցի նախարարն ասել է, որ «առաջիկա բանակցությունների ընթացքում կքննարկվեն տարածաշրջանային ու միջազգային խնդիրները, ինչպես նաև երկկողմ համագործակցությունը»։
«Այցի նպատակը փոխադարձ հետաքրքրություն ներկայացնող հարցերի շուրջ դիրքորոշումների համաձայնեցումն է»,-ասել է նա։
Իրանական դիվանագիտության ղեկավարը, ուրբաթ օրը ելույթ ունենալով Բեյրութում կայացած մամուլի ասուլիսում, ողջունել է Անկարայի և Դամասկոսի միջև երկխոսության վերսկսումը, որը հնարավոր է դարձել դեկտեմբերի 28-ին Մոսկվայում կայացած ՌԴ, Սիրիայի և Թուրքիայի պաշտպանության նախարարների եռակողմ հանդիպման շնորհիվ։ «Մենք գոհ ենք սիրիա-թուրքական շփումներից և հույս ունենք, որ սկսված երկխոսությունը դրական հետևանքներ կունենա երկու երկրների համար»,-ընդգծել է նա։
