Դժվար է հավատալ, որ սով կարող է լինել նույնիսկ աշխարհի ամենահարուստ երկրում: Սակայն հենց հիմա ինը միլիոն ամերիկացի երեխա քաղցած է: Ըստ նախագահ Ջո Բայդենի, որը Սպիտակ տանը հրավիրել էր սովի և սնուցման հարցերով առաջին վեհաժողովը վերջին 50 տարիների ընթացքում, սովը այժմ մեծ խնդիր է ԱՄՆ-ի համար, գրում է «Ամերիկայի ձայն»-ը։
«Անցած շաբաթ ՄԱԿ-ում ես խոսեցի պարտավորությունների մասին, որոնք մենք ստանձնել ենք ամբողջ աշխարհի նկատմամբ՝ պարենային անապահովության դեմ պայքարելու հարցում: Աշխարհի բոլոր երկրներում և ԱՄՆ յուրաքանչյուր նահանգում, եթե ծնողը չի կարող երեխային կերակրել, նրա համար չի կարող դրանից ավելի կարևոր մեկ այլ խնդիր լինել»,- ասել է Նախագահ Ջո Բայդենը:
Սովը համաշխարհային երևույթ է: Աշխարհում Պարենային անվտանգության գլոբալ ինդեքսում ԱՄՆ-ն զբաղեցնում է 13-րդ տեղը: Ինդեքսը գլխավորում է Ֆինլանդիան, իսկ Սիրիան և Հայիթին վերջին տեղերում են։
Բայդենի վեհաժողովի նպատակն է ԱՄՆ-ում մինչև 2030 թվականը դադարեցնել սովը և նվազեցնել սննդակարգի հետ կապված հիվանդությունները: Նա հայտարարել է 8 միլիարդ դոլար պետական և մասնավոր պարտավորությունների մասին, ինչպես նաև հավելել, որ նախատեսում է ավելացնել անվճար դպրոցական սննդի հասանելիությունը:
Կոնգրեսի այս ֆինանսավորումը հեռու է երաշխավորված լինելուց, քանի որ հանրապետականները, որպես կանոն, հասարակական խնդիրների լուծումը տեսնում են ոչ կառավարական միջոցներով:
«Մեր նպատակն է մինչև 2030 թվականը վերջ դնել սովին: Դաշնային կառավարությունը կարող է անել շատ բաներ: Սակայն մեզ անհրաժեշտ են դաշնային կառավարության, նահանգային կառավարությունների, տեղական իշխանությունների, կորպորացիաների, բարեգործության և ամբողջ քաղաքացիական հասարակության համատեղ ջանքերը»,- ասել է Why Hunger-ից Նորին Սփրինգսթեդը:
