Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Հայաստանի Զինված ուժերի գլխավոր շտաբի պետի նախկին տեղակալ Հայկազ Բաղմանյանը հերքում է դատախազության տվյալները, թե ինքը Սյունիքի նախկին մարզպետ Սուրիկ Խաչատրյանից 10 միլիոն դրամի չափով փոխառություն ունի վերցրած:
«Ես չգիտեմ՝ ինչի մասին է խոսվում, նման բան չկա, ի՞նչ փոխառություն, ի՞նչ պարտք: Երեկ ես էլ եմ լսել այդ մասին, եթե նման բան կա, թող ինձ գոնե մի անգամ հրավիրեին, հարցնեին՝ կա, չկա: Ինչ-որ ասում են՝ այնտեղ փոխառության պայմանագիր կա, եթե պայմանագիր կա, ուրեմն ես պետք է ստորագրած լինեմ: Նման բաներ չկան, չգիտեմ՝ էդ ինչ նոր խաղեր են, վերջիվերջո ես անտեղյակ եմ, երեկ եմ առաջին անգամ լսել: Անունս են տալիս, գոնե մի անգամ հարցնեին՝ տեղյա՞կ ես»,-Aravot.am-ի հետ զրույցում ասաց Հայկազ Բաղմանյանը:
Գեներալը պատմեց, որ Սուրիկ Խաչատրյանը մարզպետ աշխատած տարիներին շատ բան է արել բանակի համար. «Սուրիկը շատ բան է արել Զինված ուժերի համար, բայց ես չգիտեմ՝ գումար է դա հաշվվում, կարո՞ղ է դրա մասին է խոսքը: Ես գիտեմ՝ Սիսիանի հրաձգարանը էդ մարդն իր ուժերով է սարքել, Գորիսինը, էդ գնդին է ահագին օգնել, կարող է դրա մասին է խոսքը, ես տեղյակ չեմ ընդհանրապես: Սուրիկը շատ է օգնել կայազորին»:
Հիշեցնենք, որ ըստ դատախազության տվյալների, Սուրիկ Խաչատրյանից մոտ 40 միլիոն դրամի չափով փոխառություն ունի նաեւ Սիսական ջոկատի հրամանատար Աշոտ Մինասյանը: Վերջինս մեզ հետ զրույցում չցանկացավ մեկնաբանել տեղեկությունը, ասաց, եթե պետք լիներ՝ իրեն դատարան կկանչեին:
Արփինե ՍԻՄՈՆՅԱՆ
