«Դեռևս 2020 թվականի օգոստոսին Բեյրութում տեղի ունեցած պայթյունից հետո ես հանձնարարական եմ տվել համապատասխան գերատեսչություններին, որ հավաքեն բոլոր հնարավոր օբյեկտների ընկերությունների վերաբերյալ տեղեկատվությունը, որոնք գործ ունեն պայթյունավտանգ նյութերի հետ և այն օբյեկտների վերաբերյալ, որտեղ կարող են լինել մեծ քանակի պայթյունավտանգ նյութեր»,- կառավարության այսօրվա նիստում ասաց վարչապետ Նիկոլ Փաշինյանը։
Նա նշեց, որ առաջին գործողություններից մեկը, որն արվել է «Սուրմալու» առևտրի կենտրոնում տեղի ունեցած պայթյունից հետո, փորձել է հաշվետվություն ստանալ տրված հանձնարարականի կատարման վերաբերյալ։ «Այս պահին այդ մասով տեղեկատվությունն ամփոփվում է, բայց նաև պիտի հանձնարարեմ, որ Պետական վերահսկողական ծառայությունն իրականացնի ուսումնասիրություն և ինձ զեկուցի, թե իմ տված 2020 թվական օգոստոսի հանձնարարականն ինչպես է կատարվել։ Մենք գիտենք, որ խնդրո առարկա առևտրի կենտրոնում Հրդեհային և տեխնիկական անվտանգության տեսչական մարմինը կատարել է ստուգումներ 2021 թվականի գարնանը։ Արձանագրել են խախտումներ, բայց ինձ անհրաժեշտ է խորքային ուսումնասիրություն, թե բովանդակային առումով ինչպես է կատարվել հանձնարարականը»,- ասաց նա։
