Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Խորհրդարանում քննարկվում է «Հատուկ պետական պաշտպանության ենթակա անձանց անվտանգության ապահովման մասին» օրենքում փոփոխություններ եւ լրացումներ կատարելու մասին նախագիծը: Նախագծով առաջարկվում է պետական պահպանության ծառայությունն առանձնացնել ազգային անվտանգության ծառայության մարմինների համակարգից եւ դրա հետագա գործունեությունը շարունակել որպես պետական կառավարման համակարգի մարմին: ՊՊԾ-ն սրանով այսուհետեւ լինելու է վարչապետին ենթակա մարմին․ ծառայության կառավարումն իրականացնելու է վարչապետը, իսկ անմիջական ղեկավարումը՝ ծառայության պետը, որն անմիջականորեն ենթակա եւ հաշվետու է լինելու վարչապետին:
«Հայաստան» խմբակցության քարտուղար Արծվիկ Մինասյանը հարց էր ուղղել՝ բերած կարգավորումներով, եթե վարչապետը զենքը պահի մեկի ճակատին ու ցանկանա «գյուլլել», ի՞նչ պետք է անի ՊՊԾ-ն:
ՔՊ խմբակցության ղեկավար Հայկ Կոնջորյանը իր ելույթում արձագանքեց. «Զարմանում եմ ձեր փորձառությանը՝ պետության ղեկավարների հետ շփման, այդ ի՞նչ ղեկավարների հետ եք շփվել, որ պահել են զենքը ինչ-որ մեկի վրա, կամ հրահանգել են պահել ու գյուլլել: Ես հասկանում եմ, որ ձեր վախերը գալիս են ձեր նախկին փորձառություններից, բայց վստահեցնում եմ, որ եթե մեր իշխանությունը լիներ այդպիսին, ապա այն ամենը, ինչ պատերազմից հետո տեղի ունեցավ, կբերեր այլ հետեւանքների: Ես ձեզ այլ օրինակ բերեմ՝ նոյեմբերի 9-10-ի գիշերը, երբ Արարատ Միրզոյանին գիշերը բաշիբոզուկների խուժանը մահվան դուռն էր հասցնում, ՊՊԾ-ն այդ ժամանակ գյուլլե՞ց որեւէ մեկին, չգյուլլեց: Ի՞նչ արեց ՊՊԾ-ն»:
Կոնջորյանը նաեւ հիշեցրեց, որ ընդդիմությունը, երբ նոյեմբերի 9-ից հետո փողոցներում «քյաբաբի ու խորովածի» փառատոներ էին կազմակերպում, համատեղության կարգով նաեւ բեմադրվում էր վարչապետի ընտանիքի սպանությունը. «Այ դա էր ահաբեկչությունը: Ու եթե իրոք այս երկրի ղեկավարությունը լիներ այնպես հրեշավոր, ինչպես դուք եք ներկայացնում, բոլորովին այլ հետեւանքներ կլիներ»:
Ըստ նրա, ընդդիմությունը փորձում է ստվեր գցել բարեփոխումների տանող իրենց նախագծի վրա: Կոնջորյանի դիտարկմամբ՝ ընդդիմությունը բողոքում է սուպերվարչապետական համակարգից, բայց խորհրդարանական կառավարման երկրում պակաս լծակներ չունի ԱԺ-ն, մինչդեռ ընդդիմությունը չի օգտագործում իր լծակներն ու չի գալիս նիստերի. «Հարցի քննարկման ժամանակ zoom էի անում հեռախոսի էկրանը, որ ընդդիմության հանձնաժողովի անդամ գտնեմ՝ չգտա»:
Երբ տեղից «Հայաստան» խմբակցության ղեկավար Սեյրան Օհանյանը հորդորեց նախագծի հիմնավորումներից խոսել՝ ԱԺ նախագահ Ալեն Սիմոնյանն արձագանքեց. «Է՜հ, պարոն Օհանյան, որ ձեր հիմնավորումներից սկսենք խոսել թե՛ ՊՆ-ում աշխատած ձեր ժամանակից սկսած, վերջացրած ձեր հարցազրույցներից, կարող է մի ամբողջ նստաշրջան չհերիքի»:
Հռիփսիմե ՋԵԲԵՋՅԱՆ
