ԱԺ նախկին պատգամավոր Հրանտ Խաչատրյանն այսօր խորհրդարանում հրավիրած լսումների ժամանակ ասաց, որ հայտարարում է հայ ժողովրդի ազգային ազատագրական պայքարի նոր փուլի մասին։
«Մեր առջև նետված մարտահրավերների պատասխանը կարող է լինել, եթե մենք ձև գտնենք, առիթ գտնենք, առաջնորդ գտնենք, ում շուրջ համախմբվելով՝ կարող ենք բռունցք կազմել և այդ բռունցքը սեղանին հարվածելով՝ ասել, որ հայ ժողովուրդը եկել է հավերժության խորքերից, հիմա ապրում է այդ նույն տրամաբանությամբ և գնում է դեպի հավերժություն։ Եվ ցանկացած ոտնձգություն հայ ժողովրդի նկատմամբ ոչ միայն հանցանք է մեր ժողովրդի, այլ ողջ մարդկության նկատմամբ»,- ասաց նա։
Հրանտ Խաչատրյանը հանդես եկավ առաջարկությամբ․ «Երբ ժողովուրդը երես է թեքում իշխանական մեծամասնությունից, նա հայացքը շրջում է դեպի իշխանական փոքրամասնություն։ Ես առաջարկում եմ, որ մենք 3 օր այս հայտարարության փաստաթղթի վրա աշխատելուց հետո կարող ենք դիմել հայ ժողովրդին և ստանալ այն աջակցությունը, որն ակնկալում ենք։ Առաջին հերթին դա պարտավոր է անել խորհրդարանական ընդդիմությունը։ Իմ խոսքն ուղղված է նաև խորհրդարանական մեծամասնությանը, աշխարհասփյուռ հայությանը։ Իմ առաջարկն այն է, որ վաղը հանգստանում ենք, երկուշաբթի նորից հավաքվում ենք և աշխատում ենք այս հայտարարության տեքստի վրա։ Ես այս պահին հայտարարում եմ հայ ժողովրդի ազգային ազատագրական պայքարի նոր փուլի սկիզբը»,- ասաց նա։