Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Ադրբեջանի հարցերով փորձագետ Գառնիկ Դավթյանը «Հայելի» ակումբում, անդրադառնալով Արցախի խնդրի կարգավորման ուղղությամբ Հայաստանի գործող իշխանության դիրքորոշման մասին ՌԴ ԱԳ նախարար Սերգեյ Լավրովի երեկ արած հայտարարությանը, ասաց. «Արդեն որերորդ անգամ է` ռուսական կողմը գաղտնազերծում է թուրք-ադրբեջանական տանդեմի հետ Նիկոլ Փաշինյանի կնքած պլանները: Երեկ Լավրովի հերթական խոսքն Արցախի ինքնորոշման իրավունքի եւ առհասարակ ապագայի վերաբերյալ ավելի ցցուն էր:
Ընդհանուր առմամբ՝ ամեն ինչ վաղուց էր պարզ: Սրա մասին շատերս ենք խոսել եւ քանիերորդ անգամ ասել, որ դա Արցախը հանձնելու եւ դրանով իսկ աթոռը պահպանելու Նիկոլ Փաշինյանի քաղաքականությունն է: Դրա հետ բազմաթիվ գործողություններ են արվել` սկսած նշաձողի իջեցումից, ընտրությունների ժամանակ իր ընտրողներին խաբելուց, որ Հայաստանը լինելու է Արցախի անվտանգության երաշխավորը, ամեն բան անելու է, որ Հադրութն ու Շուշին դեօկուպացնի:
Այն պրոցեսները, որ հիմա նա տանում է, նշանակում է, որ նա խաբել է ոչ միայն իր ընդդիմախոսներին, որոնք գիտեին, որ նա ստում է, այլ նաեւ իրեն ընտրողներին: Հետեւաբար, կարելի է համարել, որ առնվազն քաղաքական առումով Նիկոլ Փաշինյանը ոչ լեգիտիմ վարչապետ է: Երեկվա Լավրովի ասածը սովորական խոսակցականով եթե ասենք, հետեւյալն էր՝ ի՞նչ եք ուզում մեզանից, Արցախը դուք եք հանձնում: Որովհետեւ այն, որ Հայաստանը երկար ժամանակ է, չի խոսում Արցախի ինքնորոշման իրավունքի մասին, այլ խոսում է Ղարաբաղի հայության անվտանգության մասին, նույն ադրբեջանական թեզն է:
Ես այլեւս անիմաստ եմ համարում անընդհատ ասել, որ բացվում է Փաշինյանի դեմքը: Ով է նա իրականում, բոլորը շուտվանից գիտեն…»-ասաց Գառնիկ Դավթյանը:
Աշոտ ՀԱԿՈԲՅԱՆ
