«Ես առնվազն տարակուսանք եմ ապրել, երբ կարդացի այդ վերլուծությունը, որովհետև պնդումների հիմքում դրված է մի շատ թերի վարկած, թե կան բանվոր պայմանավորվածություններ, իսկ ի՞նչ, եթե նման պայմանավորվածություններ չկան, ապա ստացվում է, որ այդ ամբողջ վերլուծությունը անտեղի անիմաստ բառերի ամբողջությո՞ւն է»,-պատասխանելով ՀՀ ԱԳ նախկին նախարար Վարդան Օսկանյանի վերջին վերլուծական հոդվածին վերաբերող հարցին՝ ասաց Արարատ Միրզոյանը:
Նա հայտարարեց, որ բանավոր պայմանավորվածություններ չկան, որի մասին բազմիցս հայտարարել են իշխանությունները:
«Գրված, ստորագրված հրապարակված պայմանավորվածություններից բացի այլ պայմանավորվածություներ չկան: Հայաստանն որևէ այլ պայմանավորվածությունների մաս չի կազմել և չի էլ կազմելու»,-ասաց Միրզոյանը:
Վերջինս կարծիք հայտնեց, որ հոդվածի հարցը երկորդ շերտն էլ ունի, որն ամբողջությամբ ադրբեջանական նարատիվն է:
«Այն է՝ Հայաստանը ինչ-որ բան է պարտավորվել, այն չի անում և այն լեգիտիմացնում է մեր ագրեսիան նրա նկատմամաբ: Ես գոնե խորհուրդ կտայի պարոն Օսկանյանին և այլոց՝ այդպիսի մտքեր շրջանառելուց առաջ մի քիչ հարցի այդ ասպեկտին էլ ուշադրություն դարձնեն»,- հայտարարեց Միրզոյանը:
Նա անդրադարձավ նաև հայ-ադրբեջանական սահմանին դիտորդական առաքելություն տեղակայելու հնարավորության մասին հարցին:
«Կա համընդհանուր ընկալում, այդ թվում նաև միջազգային դերակատարների շրջանում, որ միայն ագրեսիայի հետևանքների վերացումը, օրինակ՝ ադրբեջանական զորքերի՝ Հայաստանի ինքնիշխան տարածքից դուրս բերումը գուցե բավարար երաշխիքներ չստեղծեն և հավելյալ երաշխիքներ պետք լինեն, օրինակ՝ Հայաստան-Ադրբեջան սահմանին որևէ միջազգային մոնիթորինգային, դիտորդական, կամ որևէ այլ մեխանիզմի առկայություն պահանջվի, սա ի թիվս այլ գործիքակազմի քննարկվում է միջազգային գործընկերների, նաև՝ Ադրբեջանի հետ»,-ասաց Արարատ Միրզոյանը և տեղեկացրեց, որ այն շատ ակտիվ քննարկվում է:
Նա հայտնեց որ կա նաև սահմանից կողմերի զինված ուժերի հետքաշման գործիքը: