«Հիշե՛ք Նիկոլ Փաշինյանի ակնհայտ անհավասարակշիռ վիճակում գտնվող անվտանգության ծառայության ղեկավար Սարգի Հովհաննիսյանի բռնությունը MediaHub-ի լրագրողի նկատմամբ` ուղիղ եթերում, բոլորիս աչքի առաջ»,-մամուլի ասուլիսում ասաց ՍԴ աշխատակազմի նախկին ղեկավար էդգար Ղազարյանը՝ թվարկելով իշխանության գործադրած բռնության դեպքերը:
Նա կարծիք հայտնեց, որ ՊՊԾ ղեկավարը տառապում է այնպիսի հիվանդությամբ, որը սահմանված է պետական ծառայության անցնելու թույլտվությունը բացառող հիվանդությունների ցանկում:
«Բացի այն, որ նա ղեկավար պաշտոն չի կարող զբաղեցնել, այլև նման հոգեվիճակով մարդը չի կաող հատուկ ծառայությունը ղեկավարել»,-հայտնեց Ղազարյանը և արձանագրեց, որ այդ դեպքով ոչ մեկը պատասխանատվության չենթարկվեց և արդյունքը եղավ այն, որ օրերս Նիկոլ Փաշինյանի թիկնազորը ծեծի է ենթարկել ծեր տղամարդուն և նրա որդուն, որոնք գտնվում են հիվանդանոցում:
ՍԴ աշխատակազմի նախկին ղեկավարը նաև հիշեցրեց Փաշինյանի թիկնազորի կողմից հղի կնոջ վրաերթի ենթարկելու և ԱԺ-ում լրագրողների նկատմամբ գործադրած բռնության դեպքերը:
Նա նաև արձանագրեց, որ Եռաբլուրում զոհված զինծառայողների ծնողների նկատմամբ ոստիկանական անհամաչափ ուժ կիրառելուց հետո ծնողների նկատմամբ նաև գործ են հարուցել:
Ըստ Էդգար Ղազարյանի՝ այդ փաստերը խոսում են այն մասին, որ Փաշինյանը վախեր ունի, մյուս կողմից էլ նման գործողություններով իշխանությունները վախի մթնոլորտ են սերմանում հասարակության մեջ:
«Ինչքան, որ հայրենիքը պաշտպանված չէ դրսից, այնքան ներսում պաշտպանված է Նիկոլ Փաշինյանը: Հայաստանում միակ պաշտպանված տարածքը Նիկոլ Փաշինյանի մարմինն է, մնացած ամեն ինչը խոցելի է: Փաշինյանն էլ այսօր կայացնում է որոշումներ, որոնք մեզ տանում է կործանման»,-ասաց Էդգար Ղազարյանը:
