Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Վայոց Ձորում ՊՆ փոխգնդապետ Արա Մխիթարյանին (լուսանկարում) ծեծի ենթարկելու դեպքով քրեական հետապնդումից ազատված Զավեն Գրիգորյանի դեմ ցուցմունք տված զինվորականների դեմ սուտ մատնության հատկանիշներով կնախաձեռնվի քրեական վարույթ: Գրիգորյանների պաշտպան Լեւոն Սահակյանը Aravot.am-ին հայտնեց, որ Վերաքննիչ դատարանը մերժել է քրեական վարույթ նախաձեռնելու վերաբերյալ առաջին ատյանի դատարանի որոշման դեմ դատախազության ներկայացրած բողոքը:
Ծեծի ենթարկված փոխգնդապետ Արա Մխիթարյանի եւ սուտ մատնության հատկանիշներ վերագրվող երեք զինվորականի ներկայացուցիչ, իրավապաշտպան Արտակ Գալստյանը մեզ հետ զրույցում ասաց. «Բացարձակապես սուտ մատնության մասին խոսք չի կարող լինել: 3 զինվորականի մոտ էլ սուտ մատնության հանցակազմ որեւէ կերպ արտահայտված չի եղել: Սուտ մատնություն առկա է այն դեպքում, երբ տեղեկությունը տրված է հստակ սխալ ու հստակ միտումնավոր… Զինվորականները տվել են ցուցմունքներ գործի հանգամանքների հետ կապված, հիմա եթե մարդն ասում է՝ տնից ժամը 8-ին դուրս եկա, մոտեցա տերմինալին լիցքավորեցի, հետո գնացի խանութ «Ջերմուկ» առա, վաղը եթե քննությամբ պարզվում է, որ ինքն առաջինը «Ջերմուկ» է առել, հետո նոր մոտեցել տերմինալին, դա դեռ չի նշանակում, որ մարդը կատարում է սուտ մատնություն: Այս կարգի տարբերությունների մասին է խոսքը: Մենք խնդիր չունենք սուտ մատնության հետ: Առավելագույնը, եթե, իրոք, հստակ ապացուցվեր, որ այդ մարդիկ կեղծ ցուցմունք են տվել, իրենց կարելի էր մեղադրանք առաջադրել կեղծ ցուցմունք տալու համար: Ամբաստանյալի կողմը, չգիտես՝ ինչու, որոշել է, որ այդ 3 զինվորականները, որոնց ցուցմունքների մի մասը դատարանում ապացուցման շեմը չեն հաղթահարել, իրենք, ի սկզբանե, դիտավորյալ սուտ մատնություն են կատարել իրենց պաշտպանյալի նկատմամբ: Այն, որ իրենց պաշտպանյալը ստացել է ամենամեղմ, տվյալ հանցագործության համար նախատեսված նվազագույն պատիժը, դրա հիմքում դրվել է հենց այդ զինվորականների ցուցմունքը, հենց այդ զինվորականների ցուցմունքների պատճառով է, որ իրենք այդքան մեղմ են ստացել: Եթե նրանք բոլորը սուտ մատնություն են արել, ամբողջ գործը պետք է վերանայվի ու Գրիգորյանի պատիժը խստացվի»:
Հիշեցնենք, որ Զավեն Գրիգորյանի դեմ ցուցմունք էին տվել Մարիամ Հունանյանը, Միքայել Մելքոնյանն ու Լեւոն Հարությունյանը:
Արտակ Գալստյանը նաեւ տեղեկացրեց, որ ծեծի ենթարկված փոխգնդապետը շարունակում է կոմայի մեջ մնալ, տեղափոխվել է Մուրացան հոսպիտալ (կենտրոնական կլինիկական զինվորական հոսպիտալ):
Արփինե ՍԻՄՈՆՅԱՆ
