Հայաստանի ֆուտբոլի ֆեդերացիայի մամուլի քարտուղար Հայկ Կարապետյանը հայտնել է, որ կազմակերպությունը չի բանակցում ռուս մասնագետ Անդրեյ Տալալաևի հետ ազգային հավաքականի գլխավոր մարզչի պաշտոնում նշանակման շուրջ։ Այս մասին գրում է Գազետա.ռու կայքը։
«Տեղեկությունը չի համապատասխանում իրականությանը։ ՀՖՖ-ն դիտարկում է Հայաստանի հավաքականի գլխավոր մարզչի պաշտոնի մի քանի թեկնածուների։ Երբ համաձայնության հասնի, մենք պաշտոնական հայտարարություն կանենք»,- Կարապետյանի խոսքերն է փոխանցում «Матч ТВ»-ն։
Metaratings.ru-ն հայտնել է, որ Գրոզնիի «Ախմատի» նախկին գլխավոր մարզիչ Տալալաևը կարող է գլխավորել Հայաստանի հավաքականը։ Ըստ հրապարակման, Հայաստանի ֆուտբոլի ֆեդերացիան (ՀՖՖ) արդեն կապ է հաստատել ռուս մասնագետի հետ և նրան պաշտոնական առաջարկ արել։ Տալալաևը ժամանակ է ուզել մտածելու համար։
Մարզչի առջև բարդ խնդիր է դրվելու՝ 2024 թ. դուրս գալ Եվրոպայի առաջնության եզրափակիչ փուլ։ Տալալաևը աշխատանքի հնարավորություն ունի նաև Ռուսաստանի Պրեմիեր լիգայում (ՌՊԼ), սակայն, ըստ աղբյուրի, նա հակված է ընդունել Հայաստանի առաջարկը։
Երևանի «Փյունիկի» նախկին գլխավոր մարզիչ Անդրեյ Տալալաևը սեպտեմբերի 11-ին հեռացել էր «Ախմատից»։
Տալալաևը «Փյունիկը» գլխավորել էր 2018 թվականի հունիսից մինչև 2019 թվականի ապրիլը:
Սեպտեմբերի 29-ին ՀՖՖ-ն հայտարարություն տարածեց, որ Հայաստանի Ֆուտբոլի Ֆեդերացիան և Հայաստանի ազգային հավաքականի գլխավոր մարզիչ Խոակին Կապառոսը երկկողմանի համաձայնությամբ դադարեցնում են համագործակցությունը. իսպանացի մասնագետն այլևս չի գլխավորի Հայաստանի ազգային հավաքականը:
