«Արտարժութային և դրամային հիպոտեկային վարկերում վերջին երեք տարում չաշխատող վարկերի դրամային կշիռը 1.5-2 % է, և 4.5-6 %-ն արտարժութային է»,- Ֆինանսավարկային և բյուջետային հարցերի մշտական հանձնաժողովում հայտարարեց ՔՊ-ական պատգամավոր Գևորգ Պապոյանը:
Վերջինս այդ վիճակագրությամբ հիմնավորեց իր հեղինակած «Արժութային կարգավորման և արժութային վերահսկողության մասին» օրենքում փոփոխություններ կատարելու մասին օրենքի նախագիծը:
Նախագծով առաջարկվում է փոփոխության ենթարկել համապատասխան հոդվածը և սահմանել, որ բանկերը և վարկային կազմակերպությունները սպառողական փոխառություններն ու վարկերը, բնակարանային հիպոտեկային կրեդիտները տրամադրում են միայն Հայաստանի Հանրապետության դրամով, իսկ ոչ ռեզիդենտ ֆիզիկական անձանց (բացառությամբ ՀՀ ռեզիդենտ համավարկառու ունենալու դեպքի) բնակարանային հիպոտեկային կրեդիտները կարող են տրամադրվել նաև արտարժույթով:
Պապոյանը նշեց, որ գործող կանոնակարգերով հիպոտեկային վարկ տրամադրվում է ոչ միայն ՀՀ դրամով, այլև դոլարով, եվրոյով և փոխարժեքների տատանումների ժամանակ մեծ ռիսկեր են առաջանում ոչ միան բանկերի այլև վարկառուի համար:
Անդրադառնալով՝ նախադեպերին ՔՊ-ական պատգամավորը հայտնեց, որ դրամական շուկայում շոկերի ժամանակ, հատկապես՝ 2014 թվականին արտարժությանի չաշխատող վարկերի մասնաբաժինը 4-% բարձրացել է 12 %, իսկ դրամային մնացել էր նույն՝ 4% մակարդակում:
«Հայաստան» խմբակցության պատգամավոր Արթուր Խաչատրյանը, նշելով, որ հիպոտեկային վարկերում արտարժութայինը կազմում է 17%, ենթադրեց, որ եթե բացառվեն արտարժույթով վարկեր տալը, ապա բանկերում կուտակված արտարժույթի միակ գնորդը կմնա պետությունը և ենթադրեց, որ օրենսդրական փոփոխությունները արվում է նրա համար որ առաջիկայում ավելացող արտաքին պարտքի մարման ծավալների մեծացման պայմաններում հեշտ լինի դրանց սպասարկումը:
