Հայաստանում կանանց տնտեսական հզորացմանը նպաստելու, ինչպես նաև հասարակական-քաղաքական կյանքի բոլոր ոլորտներում վերջիններիս ակտիվ ներգրավվածությունն ապահովելու նպատակով՝ Աշխատանքի և սոցիալական հարցերի նախարարության, Էկոնոմիկայի նախարարության և ՄԱԿ-ի Զարգացման ծրագրի (ՄԱԶԾ) համատեղ ջանքերով մեկնարկում է «Platform #5» կանանց մասնագիտական ուսուցման ծրագիրը։
Աշխատանքի և սոցիալական հարցերի նախարարությունից հայտնում են՝ ծրագրի շրջանակում հնարավորություն է տրվում աշխատաշուկայից դուրս մնացած կանանց թվային մարքեթինգի ոլորտում ձեռք բերել նոր հմտություններ և արժանապատիվ աշխատանքի հեռանկար ունենալ:
Ըստ այդմ՝ ծրագրի շահառու կարող են լինել մարզաբնակ այն կանայք, ովքեր կբավարարեն հետևյալ չափորոշիչներից որևէ մեկին՝
• ընդգրկված են ընտանեկան կամ սոցիալական նպաստի համակարգում,
• գործազուրկ են (չեն աշխատել ծրագրին դիմելուց առնվազն 3 ամիս առաջ),
• ենթարկվել են թրաֆիքինգի, ընտանեկան բռնության կամ շահագործման,
• հաշմանդամ երեխա կարգավիճակ ունեցող կամ հաշմանադմություն ունեցող չափահաս անձանց խնամակալ են,
• երեք և ավելի երեխա ունեցող մայր են:
Միջոցառման գործընկերն է «Սովորիր Օնլայն» առցանց հարթակը, որի կողմից տրամադրվող թվային մարքեթինգի դասընթացները ներառելու են ավելի քան 40 վիդեոդաս, 500-ից ավելի օնլայն թեստ, խմբային աշխատանքների հնարավորություններ և կարիերայի խորհրդատվություն:
Այս պահին ծրագիրը մասնակիցների հավաքագրման փուլում է․ առաջին փուլն անվճար է սահմանված չափանիշներին բավարարող բոլոր անձանց համար, իսկ երկրորդ փուլն անվճար կլինի միայն առավելագույն միավորներ ստացած 250 մասնակցի համար: Դասընթացների ավարտին վերջիններս կունենան պրակտիկա անցնելու հնարավորություն, ինչպես նաև աջակցություն` աշխատանք գտնելու հարցում:
Ծրագրին դիմելու համար անհրաժեշտ է ունենալ`
• սմարթ հեռախոս` համացանցին հասանելիությամբ,
• համակարգչի հասանելիություն,
• բազային թվային գրագիտություն, այդ թվում` սոցիալական հարթակներից օգտվելու կարողություն:
Ծրագրին դիմելու համար անհրաժեշտ է այցելել «Սովորիր Օնլայն» առցանց հարթակ հետևյալ հասցեով` https://sovorir.online/platform5:
