Կալուգայի մարզի նահանգապետ Վլադիսլավ Շապշան հայտնել է, որ երկուշաբթի վաղ առավոտյան շրջկենտրոնի մոտ անօդաչու թռչող սարք է պայթել։ Կալուգայի մարզը սահմանակից է Մոսկվային։
«Պարզվել է, որ առավոտյան ժամը հինգին քաղաքի մերձակա անտառում 50 մետր բարձրության վրա օդում պայթել է անօդաչու թռչող սարք», – գրել է նահանգապետն իր Տելեգրամ ալիքում, հայտնում է BBC-ն:
Նրա խոսքով, քաղաքացիական և սոցիալական օբյեկտներին վնաս չի պատճառվել, զոհեր և վիրավորներ չկան, «տեղում աշխատում են իրավապահ մարմինների ներկայացուցիչները»։
Հունվարին հայտնի դարձավ, որ Մոսկվայում տեղադրվել են հակաօդային պաշտպանության լրացուցիչ համակարգեր, այդ թվում՝ ՌԴ ՊՆ շենքի վրա։ Ռազմական ալիքներն առաջ են քաշել այն վարկածը, որ սա անօդաչու սարքերի հարձակումները հետ մղելու նախապատրաստություն է։ Լրատվամիջոցները նաեւ վարկած են հրապարակել, ըստ որ՝ դա պետք է հոգեբանական ազդեցություն ունենա եւ քաղաքացիներին արտաքին սպառնալիքի զգացում ներշնչի։
