«Սուրմալու» առևտրի կենտրոնում որոնողափրկարարական աշխատանքները ներկա պահին տարվում են ենթադրվող էպիկենտրոնային հատվածում։ Այսօր լրագրողների հետ զրույցում ասաց ԱԻ նախարար Արմեն Փամբուխչյանը։
Նա նշեց, որ ըստ տեղեկությունների՝ այնտեղ պայթյունի պահին եղել է քաղաքացի, ուստի ամբողջ ուժով տվյալ հատվածում իրականացնում են աշխատանքներ։ «Այսինքն՝ որտեղ պայթյունը սկսվել է, հենց այդ հատվածում են ուժերը կենտրոնացվել»,- ընդգծեց նախարարը։
Հարցին, թե արդյոք տվյալ շինությունն ապամոնտաժվելու է, Արմեն Փամբուխչյանը հայտնեց, որ այս պահին առաջնայինը ինժեներային աշխատանքներն իրականացնելն է, միայն որոնողափրկարարական աշխատանքների ավարտից հետո կքննարկվի շինության հետագա հարցը: «Ներկա պահին մեր առջև չկա դրված նման խնդիր, քանի որ դեռ ունենք անհետ կորած քաղաքացի, մենք շինության ապամոնտաժման մասին չենք փորձում մտածել»,- ասաց նախարարը։
Արմեն Փամբուխչյանը նշեց, որ թեև որոնման տարածքը նեղացել է, սակայն բարդություններ կան։
«Քանի որ ենթադրվում է, որ հենց այդտեղ է պայթյունի էպիկենտրոնը, որից առաջացել է թե հրդեհ, թե հարվածային ալիք, դա իր հերթին բարդություններ է առաջացնում որոնողափրկարարական աշխատանքների մասով։ Նման հարվածային ալիքից և ջերմաստիճանից հետո այստեղ նաև գոլորշիացում է տեղի ունեցել, և շանսերը հուսադրող չեն, բայց ամեն ինչ անելու ենք, որպեսզի կարողանանք բացազատել այդ հատվածը, օգտագործել մեր շներին, և մեր որոնողափրկարարական խումբը կփորձի մուտք գործել տվյալ հատված և իրականացնել աշխատանքներ»,- նշեց նախարարը։
Արմեն Փամբուխչյանը նաև հայտնեց, որ այս օրերին մարդկային ներուժի, մասնագետների, տեխնիկայի պակաս չեն ունեցել, այլ երկրներից օգնություն խնդրելու անհրաժեշտություն նույնպես չի եղել: