Ռուսաստանը կսկսի բենզին, դիզելային վառելիք և հացահատիկ մատակարարել Աֆղանստան՝ թալիբների հետ կնքված ժամանակավոր համաձայնագրի շրջանակներում։ Բոլոր ապրանքները կգնվեն զեղչով։ Համապատասխան տեղեկությունը տարածել է Reuters-ը՝ վկայակոչելով Աֆղանստանի Առևտրի և արդյունաբերության նախարարի պաշտոնակատար Հաջի Նուրուդին Ազիզիին։
Պաշտոնյան ասել է, որ թալիբներն աշխատում են իրենց առևտրային գործընկերների դիվերսիֆիկացման ուղղությամբ: Իսկ Ռուսաստանը պարզապես առաջարկում էր զեղչեր՝ համեմատած միջին համաշխարհային գների։
Ըստ Ազիզիի, համաձայնագիրը նախատեսում է տարեկան 1 մլն տոննա դիզելային վառելիք, նույնքան բենզին, 500 հազար տոննա հեղուկ գազ (LPG) և 2 մլն տոննա ցորենի արտահանում։ Նախարարը նաև պարզաբանել է, որ գործարքը կգործի անժամկետ փորձնական ժամկետով։ Եվ եթե երկու կողմերն էլ գոհ լինեն, ապա կկնքեն մշտական պայմանագիր։
Ազիզին ոչինչ չի ասել ապրանքների գների մասին։ Միեւնույն ժամանակ, ըստ ռուս փորձագետների, հնարավոր է ապրանքները մատակարարվում են անվճար՝ Կենտրոնական Ասիայում Թալիբանի չեզոքության դիմաց։
Նշենք, որ Ռուսաստանը ոչ միայն չի ճանաչել Թալիբանի կառավարությունը, այլեւ ՌԴ օրենսդրութմաբ Թալիբանը համարվում է ահաբեկչական կազմակերպություն: Սակայն իշխանության գալուց հետո Մոսկվայում բազմիցս ընդունել են թալիբների պատվիրակությանը։