Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
«Սեյրան Օհանյանի վերաբերյալ երեք միջնորդություն է ներկայացվել, որոնցից երկուսը հրապարակվել են։ Երրորդ գործը գաղտնիքի սահմանափակման պայմաններում կարող են ծանոթանալ միայն նրանք ովքեր ունեն պետական գաղտնիքի թույլտվության իրավունք։ Ցավոք, Սեյրան Օհանյանը չունի այդ իրավունքը, թեեւ դիմել է եւ ստացել մերժում։ Աբսուրդ է, որ հիմա նրա հարցն է քննարկվելու եւ ներկայացվելու է մի միջնորդություն, որին ինքն իրավունք չունի ծանոթանալու»,-խորհրդարանում լրագրողների հետ ճեպազրույցում այսօր ասաց «Հայաստան» խմբակցության պատգամավոր Արծվիկ Մինասյանը։ Հիշեցնենք, որ գլխավոր դատախազ Աննա Վարդապետյանն ԱԺ «Հայաստան» խմբակցության ղեկավար Սեյրան Օհանյանին որպես մեղադրյալ ներգրավելու համաձայնություն տալու երեք միջնորդագիր է ներկայացրել Ազգային ժողովին, որոնցից մեկը չի հրապարակվում։
Սեյրան Օհանյանն ասել է, որ գործընթացը շոու է համարում, եւ դատախազությունից իրեն չեն էլ տեղեկացրել գործերի մասին, փաստաթղթերը չեն տրամադրել։ Արծվիկ Մինասյանը կարծում է, որ այդ գործերից մեկի գաղտնի լինելը որոշել են քննչական մարմինները, ԱԱԾ-ն․ «Չեմ կարող ասել, որովհետեւ եթե ասեմ, ապա գաղտնիքը կբացահայտվի։ Միայն կարող եմ ասել, որ մամուլում հայտնի դեպքերից մեկն է։ Փորձ է արվում մեղքը բարդել հաղթած բանակի գեներալի՝ նախկին պաշտպանության նախարարի վրա։ Իրավական առումով սա անգրագիտություն է, իսկ քաղաքական առումով՝ հստակ ուղղորդում։ Այդպես է նաեւ առաջին երկու գործերի պարագայում։ Հանցակիցների մի հսկա բանակ են նրան վերագրել եւ մեղադրում են, թե նա «Դողագործ» ընկերության անշարժ գույքը հափշտակության միջոցով այլ անձի սեփականությունը դարձնելու համար ձեռնարկել է ապօրինի գործողություններ։ Այդ գույքը՝ 1,3 միլիարդ դրամ, ՊՆ-ն ձեռք է բերել՝ հետագայում 8,5 միլիարդով վաճառելու համար մասնավոր անձին․ մեղադրանքն աբսուրդ է։ Եթե իրապես նպատակը եղել է դա, միանգամից ձեռք կբերեր ու կվերջացներ, ողջ պետական համակարգն օգտագործելու իմաստը ո՞րն է»։
Մինասյանի բնորոշմամբ՝ իրավական առումով անգրագետ է նաեւ Արմեն Չարչյանի հանդեպ գործընթացը․ «Վկայակոչումները, որոնք դրված են գործի հիմքում, կապ չունեն իրականության եւ սահմանադրությամբ նախատեսված լիազորությունների իրականացման հետ։ Իբր թե կեղծ եզրակացություն է տվել՝ այն դեպքում, երբ այդ խումբը բոլոր պատշաճ փաստաթղթերի հիման վրա եզրակացություն է տվել, իսկ Չարչյանը վերապահում է արտահայտել։ Սա անտեսել են, փոխարենը տվել են չհիմնավորված կապեր, ապօրինի հարցաքննություններով եզրահանգել են, թե նա կեղծ եզրակացություն է տվել։ Չարչյանը փորձագետներից մեկն է եղել եւ շարժվել բացառապես կարգավորումներին համաձայն՝ քննիչի հանձնարարականի շրջանակներում»։
Հիշեցնենք՝ «Հայաստան» խմբակցության պատգամավոր Արմեն Չարչյանի պաշտպանական խումբը մամուլից է իմացել, որ Արմեն Չարչյանի նկատմամբ գլխավոր դատախազի կողմից խորհրդարան է ներկայացվել միջնորդագիր՝ նրան պատգամավորական անձեռնմխելիությունից զրկելու եւ քրեական հետապնդում նախաձեռնելու համար։
Արծվիկ Մինասյանն ասում է՝ ողջ գործի մեջ միայն Արմեն Չարչյանն է «սեւ կերպար», որի եզրակացությունն իբր պատճառ է դարձել ծանր հետեւանքի․ «Սեյրան Օհանյանն ու Արմեն Չարչյանը չեն կատարել արարք, որը հանցագործություն է ենթադրում եւ հրաժարվել են վաղեմության ժամկետի հիմքով քրեական գործերը չհարուցելու իրավունքից։ Սա նշանակում է, որ նրանք համարում են, որ անմեղ են։ Բայց դատախազը թքած ունի սահմանադրության վրա, նա միայն զեկուցում է իր վարչապետին։ Չենք բացառում, որ վաղը մյուս պատգամավորների համար էլ միջնորդություններ կանեն»։
Հիշեցնենք, որ Սեյրան Օհանյանի վերաբերյալ նաեւ հակակոռուպցիոն դատարանում է գործ քննվում։
Լուիզա ՍՈՒՔԻԱՍՅԱՆ
