Արարատ Միրզոյանն ու կինը՝ Գոհար Աբաջյանը, առանձնատունը գնել են 2022-ի դեկտեմբերին՝ 112 մլն դրամով։ Առանձնատունը Կոտայքի մարզի Քասախ գյուղում է։ Այն Երևանի և Կոտայքի մարզի սահմանագծին է՝ հարակից Դավթաշեն վարչական շրջանին։ Այս մասին երեկ հրապարակում էր ունեցել Սիվիլնեթը եւ նաեւ ներկայացրել առանձնատան կադրերը:
Ինչպես պարզել է լրատվամիջոցը, փաստացի Միրզոյանը «Արմսվիսբանկ»-ում գրավադրված առանձնատունը տեղափոխել և գրավադրել է «Հայէկոնոմբանկ»-ում։
Ամուսինները առանձնատունը ձեռք են բերել 112 մլն դրամով (ըստ Կադաստրի՝ շուկայական արժեքը 115 մլն դրամ է)։ Հատկանշական է, որ պայմանագրում նշված չէ վարկի տոկոսավճարը։
Ընդհանուր առմամբ, «Հայէկոնոմբանկ»-ում Միրզոյանն ու Աբաջյանը մինչև 345 մլն դրամի սահմանաչափով վարկի հնարավորություն են ստացել, որից 115 մլն-ն արդեն ուղղվել է առանձնատան ձեռքբերմանը։
Այս պայմանագիրն ու գնումը մի քանի հարցեր են առաջացնում.
Նախ ինչպես է Արարատ Միրզոյանը գնել արդեն իսկ բանկում գրավադրված տունը, ինչպես է իմացել դրա մասին:
Ինչպես է նա գնել այն առանց կանխավճարի:
Եվ առհասարակ պետք է ստուգել այս գույքի ծագումնաբանությունը:
Նկատենք՝ Արարատ Միրզոյանն այն պաշտոնյաներից էր, որ հեղափոխությունից հետո դառնալով Ազգային ժողովի նախագահ, փորձել էր ապառիկով հեռուստացույց գնել, բայց չէր ստացվել։
Այժմ նա փաստորեն իրեն կարողանում է թույլ տալ 280 հազար դոլար արժողությամբ առանձնատուն գնել վարկավորմամբ։ Ինչպես է նա պատրաստվում մարել այս վարկը, երբ ամենապարզ հաշվարկներն էլ անգամ ցույց են տալիս, որ նա ամեն ամիս պետք է մեկ մլն դրամից ավելի գումար ուղղի վարկի մարմանը, իսկ որպես նախարար Արարատ Միրզոյանը հենց 1 մլն դրամից ավելի գումար է ստանում, սակայն նրա կինը գործազուրկ է։ Այսինքն, ամբողջ աշխատավարձը Արարատ Միրզոյանը պետք է ուղղի վարկի մարմանը։
Մանրամասները՝ տեսանյութում:
