Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Տեւական ժամանակ է` Վանաձորում ջրամատակարարումը կազմակերպվում է, մեղմ ասած, անկանոն գրաֆիկով: Լինում է ժամանակ, երբ Վանաձորի տարբեր թաղամասեր օրեր շարունակ զրկված են լինում ջուր ունենալու հնարավորությունից: Այսօր վանաձորցիները հավաքվել էին Բազում թաղամասի հրապարակում` «Վեոլիա ջրից» պահանջելով լուծում տալ խնդրին. «Ճիշտ է, երբեմն ջուրը կտրել են, երբեմն տվել են, բայց գոնե նախապես զգուշացրել են, հիմա մի զգուշացում չկա: Երբ որ զանգում ենք, չեն ուզում պատասխանել, կամ էլ այնպիսի բան են ասում, որ աբսուրդ է: Մենք «Վեոլիա ջրի» հետ կնքած պայմանագիր ունենք, որի կանոնները խախտել են իրենք: Ուրեմն մենք պահանջում ենք ուրիշ ընկերություն: Թող աշխատի այն ընկերությունը, որը մեզ ջուր կտա»,- ասում է բնակչուհի Խանիսա Սահակյանը:
Խնդիրն առկա է նախորդ տարվա հոկտեմբեր ամսից: Խախտվել է ջրամատակարարման գրաֆիկը: Բողոքի ակցիայի մասնակիցներն ասում են, թե կա՛մ ջուր չեն ստանում, կա՛մ ստանում են միայն գիշերային ժամերին: Նրանց խոսքով՝ վերջին անգամ ջուր ստացել են 6 օր առաջ. «Էդ ինչո՞ւ գիշերը ջուր կա, ցերեկը՝ չկա: Կամ, եթե տալիս էլ են այնքան կեղտեր կան մեջը: Ամեն ինչ շարքից դուրս է գալիս, կաթսաները փչանում են, մինչեւ ե՞րբ դիմանանք: Սեպտեմբերից դիմանում ենք, հոգնել ենք արդեն: Մեր ջրերը սարերից են գալիս, բավական չի սարից եկած ջուրը մեզ վրա վաճառում են, հիմա էլ չեն տալիս»,- ասում են բնակիչները:
Ջրամատակարարումը դադարեցված է ոչ միայն բնակարաններում, այլ նաև ուսումնական հաստատություններում եւ այլ առաջնային հիմնարկներում. «Երեք երեխա ունեմ, որոնք դպրոց ու մանկապարտեզ են հաճախում: Մեր փոքր երեխաներին ինչպե՛ս բացատրես, որ չես կարող օգտվել զուգարանից: Չես կարող մանկապարտեզ կամ դպրոց գնալ, քանի որ կեղտոտ ես: Մանկապարտեզներում ու դպրոցներում էլ չկա ջուր: Մանկապարտեզները պետք է սկսեն կես օրով աշխատել արդեն», ասում է Մարգարիտա Ադամյանը:
Ի տարբերություն Բազում թաղամասի, քաղաքի որոշ այլ հատվածներում թեև ջուր ստանում են, սակայն այն չի հասնում բարձր հարկեր: Վանաձորցիները խնդիրը բարձրաձայնում են նաեւ սոցիալական հարթակներում: Նրանք նշում են, որ եթե խնդիրն այսպես շարունակվի, պատրաստվում են չվճարել վարձերը:
Տաթեւիկ ՂԱԶԱՐՅԱՆ
