Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
«Տեսնում ենք, որ վարորդական իրավունք ստացողներից շատերը քշել չգիտեն, խփում են, շա՛տ են խփում: Այդպիսի օր չկա, որ չտեսնենք: Ես գործուղումների գնում եմ, դուք դրսում տեսե՞լ եք, որ այդքան հարվածեն՝ իրար հետեւից: Կա՛մ հեռախոսով են շատ խոսում, կա՛մ նոր մեքենաների ու մեր ճանապարհների թողունակության խնդիր կա, կա՛մ վատ են սովորում»,- այսօր ԱԺ պաշտպանության եւ անվտանգության հարցերի հանձնաժողովի նիստում բողոքեց հանձնաժողովի նախագահ Անդրանիկ Քոչարյանը:
Ըստ նրա, պետք է խստացնել կարգը, ոչ թե քննությունից կտրվելուց հետո 3000 դրամ մուծի ու մի ժամ հետո նորից գնա քննություն տա. «Աշխարհում այդպիսի անալոգիա չկա, որ կտրվելուց հետո 3000 դրամ տաս, Եվրոպայում հասնում է 400 եվրոյի: Պիտի սաղ փուլերն անցնես, խելքդ հավաքես գլուխդ, քշել սովորես»:
Քոչարյանն առաջարկեց լուծումներ գտնել, մտածել նաեւ «գլխակեր» ճանապարհների, օրինակ՝ Սեւան-Վարդենիս ճանապարհի մասին, որովհետեւ դուրս են գալիս ճակատ ճակատի. «Մի քիչ էլ խմել սիրում են մեր այդ կողմի ժողովուրդը, դուրս են գալիս, դե գնա, հետո ասում են՝ վա՛յ, խմուկ էր: Չէ՛, եկեք խստացնենք, կամ ինչ-որ մի բան անենք, որովհետեւ օր չկա, որ սոցիալական ցանցը չբացենք ու չկարդանք՝ «զոհվեցին ընտանիքի կեսը», երկու եղբայր դիրքերից իջել էին առոք-փառոք ու…Ճանապարհները խնդիր են, որտեղ խնդրահարույց է, խստացենք հսկողությունը: Խմիչքի հետ կապված ավելի խիստ պետք է լինենք»:
Հռիփսիմե ՋԵԲԵՋՅԱՆ
