Американската разузнавачка заедница верува дека експлозијата на автомобил-бомба во која загина Дарија Дугина, ќерката на рускиот политичар и идеолог на Кремљ Александар Дугин, била одобрена во рамките на украинската влада, изјавија разузнавачки извори за Си-Ен-Ен.
Според изворите на Си-Ен-Ен, САД не биле запознаени со украинскиот план и сè уште не е јасно кој точно го потпишал убиството на Дугина. Исто така, не е јасно дали американските разузнавачи веруваат дека украинскиот претседател Володимир Зеленски бил свесен за заговорот или го одобрил.
Но, наодот на разузнавањето, првпат објавен од Њујорк Тајмс, се чини дека ги потврдува елементите од извештајот на руските власти дека бомбардирањето било планирано. Русија ги обвини Украинците дека се одговорни за нападот, што Украина остро го негираше.
Претставници на украинската влада не одговориле веднаш на барањето на Си-Ен-Ен за коментар. ЦИА, Стејт департментот и НСЦ одбиле да коментираат.
Според извори на Си-Ен-Ен, американските разузнавачи веруваат дека Дугина го возела автомобилот на нејзиниот татко вечерта кога била убиена и дека нејзиниот татко бил вистинската цел на операцијата.
Александар Дугин е руски ултранационалист и филозоф кој беше жесток застапник на војната во Украина. Пријателката на Дугина, исто така, за проруската државна новинска агенција ТАСС, непосредно по експлозијата изјави дека автомобилот што го возела му припаѓа на нејзиниот татко.
Доколку информациите со кои располагаат изворите на Си-Ен-Ен се точни, тогаш тие сигнализираат за проширување на украинските тајни операции на позната политичка личност во Москва.
До денес, украинските напади во Русија главно се ограничени на складишта за гориво и воени бази во градовите долж руско-украинската граница, како што е Белгород. Но, САД немаат добра видливост на сите планирани напади на Украина, изјавија извори за Си-Ен-Ен.
