Портпаролката на Министерството за надворешни работи, Марија Захарова, изјави дека „Вашингтон има целосна контрола“ врз водите околу Данска и Шведска, каде што од четири места тече гас од гасоводите Северен тек 1 и 2 во Балтичко Море меѓу Русија и Германија.
„Тоа се случило во трговските и економските зони на Данска и Шведска“, рече Захарова во четвртокот во интервју за провладиниот канал „Соловјев во живо“.
„Тоа се земји што се целосно под контрола на американските разузнавачки служби“, рече таа.
Данска е членка на НАТО, а Шведска се обидува да ѝ се приклучи на воената алијанса откако по руската инвазија на Украина се откажа од својата историска политика на неврзување.
Захарова не даде докази за американска контрола над Шведска и Данска. Русија често се противи на американското влијание и воената поддршка за Европа.
Европската Унија се сомнева во саботажа како причина за истекувањето на подморскиот руски гасовод кон Европа и вети „жесток“ одговор на секое намерно нарушување на нејзината енергетска инфраструктура.
Иако ниту еден од цевководите не бил во употреба во моментот на подводните експлозии, и двата биле наполнети со гас, кој истекувал во Балтичко Море, а првиот прекин беше забележан во понеделникот.