Ena siga Moniti ni macawa sa oti a qaravi ena vanua o Lutu e dua na veivakararamataki, ena gagadre ni vanua me vakabulabulataki na nodra Meke ni Yaqona na Turaga Tui Lutu.
Era lewe 45 na lewenivanua mai na Tikina o Lutu ena yasana o Naitasairi era taura na nodra sitivikiti me ivakadinadina ni nodra sa vakacavara vakavinaka na vuli macawa dua nona meke ni yaqona na turaga na Tui Lutu.
Ena siga Moniti ni macawa sa oti a qaravi ena vanua o Lutu e dua na veivakararamataki, ena gagadre ni vanua me vakabulabulataki na nodra Meke ni Yaqona na Turaga Tui Lutu.
Sa oti e 16 na yabaki na kena cuva tu na bilo ni veiliutaki ni vanua; ka ra nanuma na turaga ni vanua me sa vakabulabulataki tale na nodra meke ni yaqona na Turaga na Tui Lutu, ena vakanananu ni kena tawani tale na itikotiko ni veiliutaki e vanua.
E kalougata na vanua o Lutu nirau se bula tiko e rua na turaga se matata vei rau na meke ni yaqona ka rawa ni mai vakadewaci na vuku vakavanua qo.
Na vuli qo a veivuke kina o Peceli Sewale ena mataqali Nakorovou kei Waisale Turaganivalu ena mataqali Savukinamoto. Ka rau vakatokai me rau Radau ni vuli qo.
Era a soqoni mai vakalewe levu na turaga kei ira na cauravou ena kena cuqeni na ituvatuva qo. Era marautaka sara vakalevu na lewenivanua na kena sa lai vakabulabulataki tale na nodra meke ni yaqona vakaturaga.
E talei ni dau mai qaravi vaka oqo na kena vakabulabulataki na vuku vakavanua ni rawa ni cadra tale kina eso na itovo ka sa sega ni dau qaravi tu ena dua na gauna balavu. E basika qo ena vanua o Lutu ni mai vakabulabulataki tale ga na Meke Iri ni turaga.
Na bibi ni kena tovolei me vakadewaci na vuku itaukei vaka oqo, e dau veivuke kina na Tabana ni Vosa & iTovo Vakaviti ni Tabacakacaka iTaukei kina sasaga ni vanua me vakabulabulataka na kena iyau, cakacakaniliga, meke ni vanua kei na so tale.
Sa vakavinavinakataki na vanua o Lutu ena nodra lomasoli kina kena qaravi na vuli ni vakabulabulataki ni meke ni yaqona, ka salavata kei na veitautaunaki ni na maroroi matua na kena itovo bau kina na kena vosa ka ra vakadewataka sobu mai na noda qase, me kua sara nida beca, ni tiko kina na ivurevure ni noda kalougata.
ISIKELI TUIWAILEVU
Era lai sogota na i Vukevuke ni Minisita Isikeli Tuiwailevu ena Vakaraubuka sa oti na vuli oqo.
E vakavinavinakataka ena vuku ni yalo vinaka ni vanua vakavotui ena veiqaravi vakavanua e nodra ga na turaga na Tui Lutu.
E tomana ni sa dua dina na siga lagilagi ena loma ni yavusa e tolu, na yavusa vakaturaga o Lutu, na yavusa o Vunikavika kei na yavusa o Navitilevu. Na vanua qaqa, era vakaitikotiko kina na lewenivanua yalovata.
Na cakacaka ni vakabula vanua eraqarava ena loma ni macawa sa oti, era rogoca na nomuni qase era sa liu yani, era rogoca tale ga na luvei Lutu era na qai muri mai.
Era sa sureta tale na vuku vakavanua era a maroroa tu na qase ena veiyabaki sa oti kei na kena yalomatua.
Na matata ni bula ena loma ni vanua e tiko ga ena kena iyau vakavanua. Qo e maroroi tu ena itovo kei na ivalavala vakavanua e kilai kina na vanua vakaturaga o Lutu.
Na iyau ni vanua e wawa voli ga. E waraka toka me donu na yalo ni tamata me rawa ni qai vakatakilai koya tale mai. Na iyau ni vanua e vakavurea na yalo ni veivakaturagataki; veidokai, veirokorokorovi; na yalo ni veivakaliuci ka vakauasivi e kauta mai na yalo ni loloma. Na yalo taucoko oqori era iyau vaKalou. Era isolisoli tale ga va Karisito.
Vurevure Ni iTukutuku: TABACAKACAKA ITAUKEI
Feedback: lusiana.tuimaisala@fijisun.com.fj
