Lagt er til að stöðva allar veiðar á lunda í nýútkominni skýrslu Náttúrustofu Suðurlands vegna langvarandi fækkun fugla í stofninum. Í skýrslunni kemur fram að árlegur stofnvöxtur íslenska lundastofnsins er undir stofnvistfræðilegum sjálfbærnimörkum og allt bendi til þess að hann hafi verið það undanfarin 28 ár, eða frá árinu 1995.
Í útrýmingarhættu
Lundastofninn á Íslandi gæti minnkað um 30% ef veiðar haldast óbreyttar, miðað við veiðitölur síðustu tólf ára. Það er því mikilvægt að grípa strax í taumana áður en ekki verður aftur snúið.
Lundastofninn á Íslandi er sá stærsti í heiminum, en rannsóknir undanfarinna ára hafa sýnt mikla fækkun á lundapysjum í talningum. Lundinn er á válista Náttúrufræðistofnunar um fuglategund í bráðri hættu og eins er lundinn á heimsválista fugla í útrýmingarhættu.
Hækkun á hitastigi sjávar
Í skýrslunni kemur fram að hækkun á hitastigi sjávar skapi lundanum hættu því hún hefur áhrif á fæðumöguleika fuglsins. Hærra hitastig sjávar dregur úr vexti sandsíla á sumrin og hlýrri vetur auka orkueyðslu og ganga á fituforða sílanna.
Talið er að það verði að stöðva veiðar þar til stofnvöxtur lundans er nægilegur til að ráða við náttúruleg afföll og hóflega veiði. Í skýrslunni talið líklegt að sölubann á lunda myndi stuðla að hóflegri veiði þegar þar að kæmi.
