Паведамляецца, што інцыдэнт адбыўся 30 мая каля 9-й гадзіны раніцы.
«Падраздзяленні радыёэлектроннай барацьбы засеклі аб’ект-парушальнік дзяржмяжы. Яму трэба прыкладна тры хвіліны, каб скінуць баявыя зарады ў размяшчэнне беларускіх войскаў», — сцвярджаецца ў сюжэце, паказаным у эфіры тэлеканала «Беларусь 1».
У сюжэце паказалі вайскоўца, які цэліцца ў нейкі аб’ект. Аб’ект, паводле сцвярджэння тэлеканала, — «робат са смяротным грузам» (на відэа буйным планам паказваюць коптар, якіх-небудзь грузаў на ім не відаць).
«Робат губляе кіраванне, і смяротны груз падае ў бязлюднай мясцовасці, але не дэтануе. Хуткая і выразная праца нашых сілавікоў прадухіліла трагедыю — дрон быў узброены боепрыпасамі ад аўтаматычнага гранатамёта АГС-17», — кажа закадравы голас.
У гэты час камера паказвае аб’ект у траве, падобны на гранату.
У сюжэце сцвярджаецца, што гэта не адзінкавы выпадак, «але дзякуючы працы беларускіх сілавікоў дадзеныя правакацыі застаюцца па-за кадрам».
Ужо не ўпершыню беларускія ўлады заяўляюць пра нейкія правакацыі з боку Украіны. Там, у сваю чаргу, ўсё абвяргаюць. Да таго ж, відавочна, што Украіна вельмі зацікаўлена, каб Беларусь не ўцягнулася ў вайну. Таму, калі такія правакацыі сапраўды былі, то не зразумела чые яны і якую мелі мэту.