June 10 (Jowhar.com)- Madaxweynihii hore ee Pakistan Pervez Musharaf oo 78 jir ah ayaa xaaladiisa caafimaad laga deyrinayaa isagoo la dhigey isbitaal ku yaal magaalada Dubai xanuunsanaya Dubai.
Musharaf ayaa cusbitaalka la dhigay muddo saddex toddobaad ah sababo la xiriira xanuunkiisa, sida lagu shaaciyay farriin la soo dhigay boggiisa rasmiga ah ee Twitter-ka maanta.
Qoyska Musharaf ayaa codsaday in loo soo duceeyo iyagoo xusay in xubnaha jirkiisa ay qaarkood shaqadii gabeen.
Musharaf ayaa xukunka kula wareegay sanadkii 1999-kii, kaddib afgambi aan dhiig ku daadan, kaddib markii Ra’iisul wasaarihii xilligaas Nawaz Sharif uu isku dayay inuu xilka taliyaha ciidamada ka qaado.
Jeneraalka afarta xiddigle ah ayaa Pakistan u xukumayay sidii madax fulinta markii weeraradii 9/11 ee Maraykanka lagu qaaday.
Musharaf waxa uu si degdeg ah ula saftay Washington intii ay ku guda jirtay faragelintii milatari ee ay ku samaysay dalka deriska la ah ee Afgaanistaan, iyo intii uu xukunka hayay, Pakistan waxa ay noqotay xulafada muhiimka ah ee Maraykanka.
Waxa uu oggolaaday in NATO ay u rarto qalabka milatariga Afgaanistaan iyada oo la sii marayo Pakistan iyo in Maraykanku u isticmaalo saldhigyada hawada Pakistan si loogu taageero saadka.
In ka badan toddobo sano oo uu xafiiska joogay, waxa uu abuuray kobac dhaqaale isagoo ka hortagay ugu yaraan saddex isku day dil.
Waxa uu ku guuleystey muddo shan sano ah oo madaxweyne ah aftidii 2002-dii, laakiin wuu buriyey ballan-qaadyadii ahaa in uu ka tagayo taliyaha ciidamada ilaa dabayaaqadii 2007.
Ka dib dilkii Diseembar 2007 ee hoggaamiyaha mucaaradka Benazir Bhutto, niyadda shacabka ayaa sii xumaatay, waxaana Musharaf ka soo gaartay khasaare xoog leh burburkii xulafadiisa soo gaaray doorashooyinkii 2008 taasoo Musharaf ka dhigtay go’doon siyaasadeed.
Qorshe uu ku doonayay in uu dib ugu soo laabto xukunka 2013-kii ayaa burburtay markii laga reebay inuu u tartamo doorasho uu ku guuleystay Nawaz Sharif – ninkii uu xilka ka tuuray 1999-kii.
Musharaf ayaa ku noolaa dalka Imaaraadka tan iyo sanadkii 2016-kii, markaasoo laga qaaday xayiraadii dhanka socdaalka, waxaana loo ogolaaday inuu u safro magaalada Dubai si uu u soo daweeyo.
Saddex sano ka dib, waxaa lagu xukumay dil isagoo maqan, oo lagu eedeeyay khiyaano qaran, taasoo la xiriirta go’aankii 2007 ee uu ku soo rogay xukun degdeg ah. Si kastaba ha ahaatee, maxkamad ayaa markii dambe burisay xukunka.
