Дар Ҷамоати деҳоти «Рӯдакӣ»-и ноҳияи Вахш сохтмони мактаб-парваришгоҳ барои кӯдакони ятиму бепарастор дар арафаи анҷомёбӣ қарор дорад, хабар доданд ба АМИТ «Ховар» дар мақомоти иҷроияи ҳокимияти давлатии вилояти Хатлон.
«Мактаб-интернат аз бинои асосӣ, хобгоҳ барои 540 нафар, ошхона барои 480 нафар, меҳмонхона барои 10 нафар, бунгоҳи тиббӣ, утоқи посбонҳо, ҳуҷра барои вохӯрии волидайну тарбиятгирандагон ва майдончаи варзишии футболи хурд иборат мебошад. Синфхонаҳои муассиаи мазкур бо таҷҳизоти таълимии замонавӣ, мизу курсӣ, инчунин хобгоҳ бо рахтҳои нави хоб ва ҷиҳоз барои истироҳат таъмин гардонида мешаванд», -афзуд манбаъ.
Масоҳати ҷойгиршавии бинои таълимӣ аз 3 гектар иборат буда, атрофи бино бо гулу ниҳолҳои ороишӣ зиннат дода мешавад.
Иттилоъ дода шуд, ки мактаб-интернат аз ҳисоби маблағҳои хайриявӣ аз тарафи ташкилоти ҷамъиятии «Эҳёи Сомониён» ба маблағи 8 миллион сомонӣ барои 240 ҷойи нишаст дар як баст бунёд гардидааст.
Раиси вилоят ба масъулин дастур дод, ки иншооти сохташавандаро дар муҳлати пешбинишуда ва бо сифати баланд ба истифода диҳанд. Инчунин зикр намуд, ки то итмоми сохтмони иншоот заминҳои корами атрофашонро сарфакорона истифода бурда, кишт намоянд.
Ёдовар мешавем, ки дар даврони соҳибистиқлолӣ дар ҳудуди вилояти Хатлон аз ҳисоби ҳамаи сарчашмаҳои маблағгузорӣ 1261 бинои муассисаи таълимӣ барои 512 ҳазор хонанда ба маблағи умумии қариб 2 миллиард сомонӣ сохта ба истифода дода шудааст. Танҳо соли 2021 дар вилоят 100 бинои муассисаи таълимӣ барои 40 ҳазору 500 хонанда бунёд гардидааст.
Барои таъмин намудани рушди соҳаи маорифи вилояти Хатлон Ҳукумати мамлакат 15 лоиҳаи давлатии сармоягузориро ба маблағи 851 миллион сомонӣ татбиқ карда, ҳоло барои амалӣ намудани боз 7 лоиҳаи дигар 1,1 миллиард сомонӣ равона намудааст.
АКС: мақомоти иҷроияи ҳокимияти давлатии вилояти Хатлон
