Views: 1
ដោយៈសុផល/ភ្នំពេញ៖ លោក ពៅ ម៉ាលី រដ្ឋលេខាធិការក្រសួងសាធារណការ និងដឹកជញ្ជូន បានមានប្រសាសន៍ថា៖កំណើនចំនួនយានយន្តអគ្គិសនី ដែលបានចុះបញ្ជីគិតត្រឹមខែតុលា ឆ្នាំ២០២២ មានចំនួនសរុប ៦២៥គ្រឿង កើនប្រហែល ៥.៥៨២% ប្រៀបធៀបទៅឆ្នាំ២០២១។ជាមួយគ្នានេះ រាជរដ្ឋាភិបាលបានយល់ព្រមជាគោលការណ៍ឱ្យក្រសួងសាធារណការ និងដឹកជញ្ជូន បង្កើតនិងដឹកនាំក្រុមការងារអន្តរក្រសួង ដើម្បីតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្ត្រជាតិសម្រាប់គ្រប់គ្រង និងអភិវឌ្ឍន៍យានយន្តអគ្គិសនីនៅក្នុងកម្ពុជា។
លោក ពៅ ម៉ាលី បានថ្លែងដូច្នេះ នាថ្ងៃទី០៥ ខែធ្នូ ឆ្នាំ២០២២នេះ ក្នុងឱកាសអញ្ជើញជាអធិបតីក្នុងពិធីបើកសិក្ខាសាលាស្តីពីការប្រមូលធាតុចូលលើសេចក្តីព្រាងគោលនយោបាយអភិវឌ្ឍន៍យានយន្តអគ្គិសនី ដោយមានការ ចូលរួមពីក្រុមការងារអន្តរក្រសួងចំនួនប្រាំបួនស្ថាប័ន តំណាងអភិបាលនៃគណៈ អភិបាល២៥រាជធានី-ខេត្ត ដៃគូអភិវឌ្ឍរួមមាន៖ អង្គការ UNDP ធនាគារពិភពលោក អង្គការ UNESCAP អង្គការ GIZ និងវិស័យ ឯកជនដូចជា៖ Car4you, Onion Mobility, Very Words, Total Energy ។
លោក ពៅ ម៉ាលី បានឱ្យដឹងទៀតថា ថ្មីៗនេះក្រសួងបាននឹងកំពុងរៀបចំសេចក្តីព្រាងគោលនយោបាយជាតិស្តីពីការដឹកជញ្ជូន ផែនទីចង្អុលផ្លូវបណ្តាញស្ថានីយបញ្ចូលថាមពល យានយន្តអគ្គិសនី ដែលក្នុងនោះរួមមាន ការលើកទឹកចិត្តអ្នកប្រើប្រាស់យានយន្តអគ្គិសនី ការចងក្រងឯកសារគតិយុត្តដើម្បីគាំទ្រការកំណត់យកបទដ្ឋានបច្ចេកទេស ការរៀបចំផែនទីបង្ហាញផ្លូវក្នុងការរៀបចំហេដ្ឋារចនាសម្ព័ន្ធគាំទ្រនានា ការលើកទឹកចិត្តឱ្យមានការបង្គុំដំឡើង និងផលិតយានយន្តអគ្គិសនីនៅកម្ពុជាជាដើម។
សូមជម្រាបជូនថា៖ កម្មវិធីសិក្ខាសាលានេះបានរួមបញ្ចូលវគ្គពិភាក្សាលើការផ្តល់ធាតុចូលសំខាន់ៗ ដើម្បីរៀបចំគោលនយោបាយយានយន្តអគ្គិសនីសម្រាប់កម្ពុជាចង្វាក់តម្លៃយានយន្តអគ្គិសនី វិធានការណ៍អនុវត្តគោលនយោបាយយានយន្តអគ្គិសនី និងការឆ្លើយកម្រងសំណួរ។ ជាលទ្ធផល អង្គសិក្ខាសាលាបានចូលរួមពិភាក្សាផ្លាស់ប្តូរគំនិតយោបល់យ៉ាងផុសផុល សំដៅជំរុញឱ្យការរៀបចំចងក្រងសេចក្តីព្រាងគោលនយោបាយនេះមានប្រសិទ្ធភាព ប្រសិទ្ធផលសុក្រឹតភាពនិងនិរន្តរភាពក្នុងគោលដៅលើកកម្ពស់ការប្រើប្រាស់យានយន្តអគ្គិសនីនៅកម្ពុជាឱ្យកាន់តែទូលំទូលាយថែមទៀត៕/R
