Views: 1
ប្រែសម្រួលៈបំណង(ដេល្លីម៉េល)៖ ខ្មាន់កាំភ្លើងម្នាក់បានបាញ់ប្រហារនៅសាលារៀនមួយក្នុងប្រទេសរុស្ស៊ីភាគកណ្តាលកាលពីថ្ងៃចន្ទ ដោយសម្លាប់មនុស្ស១៧នាក់និងបង្ករបួស២៤នាក់ទៀតមុនពេលបាញ់សម្លាប់ខ្លួនឯង។
ការបាញ់ប្រហារនេះបានកើតឡើងនៅសាលាSchool No. 88ក្នុងទីក្រុង អ៊ីហ្សេវសខ៍(Izhevsk)នៅចម្ងាយប្រមាណ៩៦០គីឡូម៉ែត្រខាងកើតក្រុងមូស្គូ ក្នុងតំបន់អ៊ុតមួរសារ(Udmurtia)។
ក្រុមស៊ើបអង្កេតកំណត់ខ្មាន់កាំភ្លើងជាបុរសវ័យ៣៤ឆ្នាំឈ្មោះ អាតយ៉ូម កាហ្សាន់ត៍សេវ(Artyom Kazantsev) ជាសិស្សរៀនចេញពីសាលាកើតហេតុនេះ និងថាវាបានពាក់អាវយឺតពណ៌ខ្មៅមាន«និម្មិតសញ្ញាណាស៊ី»។
ហេតុផលនៅពីក្រោយការបាញ់នេះគេនៅមិនទាន់ដឹងនៅឡើយទេ។
រដ្ឋាភិបាលតំបន់អ៊ុតមួរសារបាននិយាយថា មនុស្ស១៧នាក់ រួមមានកូនក្មេង១១នាក់ ត្រូវបានសម្លាប់ ហើយបើតាមក្រុមស៊ើបអង្កេត មនុស្ស២៤នាក់ រួមមានកូនក្មេង២២នាក់បានរងរបួសក្នុងការបាញ់ប្រហារ។
អភិបាលតំបន់អ៊ុតមួរសារ បាននិយាយថាខ្មាន់កាំភ្លើង ដែលត្រូវបានចុះបញ្ជីថាជាអ្នកជំងឺនៅមន្ទីរពេទ្យវិកលចរិត បានសម្លាប់ខ្លួនឯងក្រោយការបាញ់ប្រហារ។
អ្នកនាំពាក្យវិមានក្រឹមឡាំងលោកឌីមីទ្រី ប៉េស្កូវ បានពណ៌នាការបាញ់ប្រហារនេះថាជា«អំពើភេរវកម្ម»មួយនិងបាននិយាយថា ប្រធានាធិបតីរុស្ស៊ីលោកវ្ល៉ាឌីមៀ ពូទីន បានចេញបញ្ជាទៅកាន់អាជ្ញាធរពាក់ព័ន្ធនិងបាន«សម្តែងការចូលរួមមរណទុក្ខចំពោះការស្លាប់មនុស្សនិងកុមារនៅសាលារៀនដែលរងការវាយប្រហារភេរវកម្ម»៕
រូបភាពថតចេញពីវីដេអូ បង្ហាញក្មេងសិស្សសាលារត់ចេញពីកន្លែងបាញ់ប្រហារនៅសាលាSchool No. 88 ក្នុងទីក្រុងអ៊ីហ្សេវសខ៍កាលពីថ្ងៃ២៦កញ្ញា
បុគ្គលិកនិងទាហានរុស្ស៊ីសែងអ្នករងរបួសក្នុងហេតុការណ៍បាញ់នៅសាលារៀនក្នុងក្រុងអ៊ីហ្សេវសខ៍
