ខេត្តព្រះសីហនុ ៖ លោក គួច ចំរើន អភិបាល នៃគណៈអភិបាលខេត្តព្រះសីហនុ នៅល្ងាចថ្ងៃទី០២ ខែធ្នូ ឆ្នាំ២០២២ បានចុះពិនិត្យវត្ថុតាង និងនាំយកថវិកា ដើម្បីលើកទឹកចិត្តដល់កងកម្លាំង នៃស្នងការដ្ឋាននគរបាលខេត្ត ក្នុងការបង្ក្រាបករណីគ្រឿងញៀន រយៈពេល០៣ថ្ងៃកន្លងមកនេះ ។
លោក គួច ចំរើន ក្នុងនាមប្រធានគណៈបញ្ជាការឯកភាពរដ្ឋបាលខេត្តព្រះសីហនុ បានថ្លែងការកោតសរសើរ និងវាយតម្លៃខ្ពស់ដល់កងកម្លាំង និងមន្ត្រីនគរបាល នៃស្នងការដ្ឋាននគរបាលខេត្តព្រះសីហនុ បានយកចិត្តទុកដាក់ខិតខំបំពេញការងារក្នុងការថែរក្សាសន្តិសុខ សុវត្ថិភាពជូនបងប្អូនប្រជាពលរដ្ឋ ក៏ដូចជាភ្ញៀវទេសចរណ៍ជាតិ និងអ្នកវិនិយោគក្នុងខេត្តព្រះសីហនុ ពិសេសក្នុងការបង្ការ បង្ក្រាបនូវរាល់បទល្មើសបានទាន់ពេលវេលា ។
លោកអភិបាលខេត្តព្រះសីហនុ ក៏បានឧបត្ថម្ភថវិការមួយចំនួន ជូនដល់កងកម្លាំងជំនាញ ក្នុងការបង្ក្រាបករណីគ្រឿងញៀន រយៈពេល០៣ថ្ងៃ គិតចាប់ពីថ្ងៃទី៣០ ខែវិច្ឆិកា ឆ្នាំ២០២២ រហូតដល់ថ្ងៃទី០២ ខែធ្នូ ឆ្នាំ២០២២ ។
សូមជម្រាបថា ដោយមានការដឹកនាំបញ្ជាពីសំណាក់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កម្លាំងជំនាញការិយាល័យនគរបាលប្រឆាំងគ្រឿងញៀន បានធ្វើការឃាត់ខ្លួនជនសង្ស័យចំនួន ០៥នាក់ ជាបន្តបន្ទាប់ រួមមាន ៖ ជនជាតិខ្មែរ០២នាក់ ជនជាតិវៀតណាម ០៣នាក់ (ស្រី០១នាក់) ។
ដោយឡែកជនជាតិវៀតណាម០៣នាក់ ដែលបានឃាត់ខ្លួននៅចំណុចសណ្ឋាគារលិជឺខាអឺទួន ស្ថិតនៅក្រុមទី៩ ភូមិ៣ សង្កាត់៤ ក្រុង-ខេត្តព្រះសីហនុ និងដកហូតថ្នាំញៀនជាង ០៣គីឡូក្រាម រួមមានឈ្មោះ ៖
១-ឈ្មោះ TRAN THI THAO ភេទ ស្រី អាយុ ៣៤ឆ្នាំ ជនជាតិ វៀតណាម ។
២-ឈ្មោះ VUONG DINH NHAM ANH ភេទ ប្រុស អាយុ ៣១ឆ្នាំ ជនជាតិ វៀតណាម ។
៣-ឈ្មោះ DANG VAN DAT ភេទ ប្រុស អាយុ ១៩ឆ្នាំ ជនជាតិ វៀតណាម ។
វត្ថុតាងដកហូត រួមមាន ៖
១-កញ្ឆាក្រៀមទម្ងន់ ១២៨,៤៨ក្រាម
២-សារធាតុញៀនប្រភេទ អ៉ិចស្តាស៊ីគ្រាប់ (MDMA) ទម្ងន់ ៣០១,៥៨ក្រាម
៣-សារធាតុញៀនប្រភេទ អ៉ិចស្តាស៊ី ម្សៅ (MDMA) ទម្ងន់ ១៤៩៨,៨១ក្រាម
៤-សារធាតុញៀនប្រភេទ កេតាមមីន (K) ២០២,៣៣ក្រាម
៥-សារធាតុញៀនប្រភេទ មេតំហ្វេតាមីន ( ICE ) ទម្ងន់ ១០៨០,១៤ ក្រាម
៦-ថ្នាំគ្រាប់ (WY) ចំនួន ៨០៥គ្រាប់ ទម្ងន់ ៧៩,៦៥ក្រាម
៧-ទូរសព្ទដៃចំនួន ៧ គ្រឿង
៨-ជញ្ជីងថ្លឹងគ្រឿងញៀនចំនួន ៨ គ្រឿង
៩-សម្ភារវេចខ្ចប់មួយចំនួន
១០-លិខិតឆ្លងដែនចំនួន ១ និងកាតធនាគារមួយចំនួន។
១១-ម៉ូតូចំនួន ០១ គ្រឿង ។
បច្ចុប្បន្នជនសង្ស័យខាងលើកំពុងធ្វើការឃាត់ខ្លួននៅស្នងការដ្ឋាននគរបាលខេត្តព្រះសីហនុ ដើម្បីធ្វើការសាកសួរតាមនិតិវិធី ៕
