Views: 9
ដោយៈ មុនីរ័ត្ន / ភ្នំពេញៈ រយៈពេល ៣ថ្ងៃ នៃថ្ងៃឈប់សម្រាកពិធីបុណ្យភ្ជុំបិណ្ឌ គឺចាប់ពីថ្ងៃទី ២៤-២៥-២៦ ខែកញ្ញា ឆ្នាំ២០២២ គ្រោះថ្នាក់ចរាចរណ៍ទូទាំងប្រទេស កើតឡើងចំនួន ៣៤ លើក បានបណ្តាលឲ្យមនុស្សចំនួន ២៧ នាក់ បាត់បង់ជីវិត និងរបួសធ្ងន់ស្រាល ចំនួន ៥៧ នាក់ ដោយក្នុងនោះរបួសធ្ងន់ ចំនួន ៣៤ នាក់ និងស្រាលចំនួន ២៣ នាក់។ នេះបើតាមការបញ្ជាក់របស់អ្នកនាំពាក្យ អគ្គស្នងការដ្ឋាន នគរបាលជាតិ នៅរសៀល ថ្ងៃទី២៦ ខែកញ្ញា ឆ្នាំ២០២២។
លោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ បានប្រាប់រស្មីកម្ពុជាថាៈ គ្រោះថ្នាក់ចរាចរណ៍ រយៈពេល ៣ថ្ងៃ នៃថ្ងៃឈប់សម្រាក បុណ្យភ្ជុំបិណ្ឌ គឺចាប់ពីថ្ងៃទី ២៤-២៥-២៦ ខែកញ្ញា ឆ្នាំ២០២២ គ្រោះថ្នាក់ចរាចរណ៍ នៅទូទាំងប្រទេស កើតឡើងចំនួន ៣៤ លើក បានបណ្តាលឲ្យមនុស្សចំនួន ២៧ នាក់ បានស្លាប់ និងរងរបួសចំនួន ៥៧ នាក់ ដោយក្នុងនោះ របួសធ្ងន់ចំនួន ៣៤ នាក់ និងរបួសស្រាល ចំនួន ២៣ នាក់។
អ្នកនាំពាក្យអគ្គស្នងការដ្ឋាននគរបាលជាតិ បានរៀបរាប់ថាៈ គ្រោះថ្នាក់ចរាចរណ៍ ទូទាំងប្រទេស នាថ្ងៃទី២៤ ខែកញ្ញា ឆ្នាំ២០២២ កើតឡើងចំនួន ៨ លើក ស្លាប់ ៨ នាក់ និងរបួស ១៤ នាក់ ដោយក្នុងនោះ របួសធ្ងន់ចំនួន ៩នាក់ និងស្រាលចំនួន ៥នាក់។ នៅថ្ងៃទី២៥ ខែកញ្ញា គ្រោះថ្នាក់ចរាចរណ៍ កើតឡើងចំនួន ១៣ លើក ស្លាប់ ១១ នាក់ និងរបួស ១៩ នាក់ ដោយក្នុងនោះ របួសធ្ងន់ចំនួន ១២ នាក់ និងស្រាលចំនួន ៧ នាក់។ នៅថ្ងៃទី២៦ ខែកញ្ញា គ្រោះថ្នាក់ចរាចរណ៍ កើតឡើងចំនួន ១៣ លើក ស្លាប់ ៨ នាក់ និងរបួស ២៤ នាក់ ដោយក្នុងនោះ របួសធ្ងន់ចំនួន ១៣ នាក់ និងស្រាលចំនួន ១១ នាក់។/V
