Views: 3
ដោយ៖ សុវណ្ណកុម្ភៈ / ភ្នំពេញ៖ ភាពតឹងតែងលើការស្នាក់នៅ ហូបចុក សម្រាប់ការទទួលប្រតិភូកីឡាស៊ីហ្គេម ឆ្នាំ២០២៣ ពេលនេះបញ្ហាទាំងនេះ បានធូរស្រាលក្នុងផែនការលម្អិតអស់ហើយ បន្ទាប់ពីពិភាក្សាត្រួតពិនិត្យ និងចែងបែកការងារ យ៉ាងច្បាស់លាស់។ នេះជាការលើកឡើងរបស់លោក វ៉ាត់ ចំរើនអគ្គលេខាធិការ គណៈកម្មាធិការជាតិរៀបចំស៊ីហ្គេមឆ្នាំ២០២៣ (CAMSOC) ក្រោយបញ្ចប់កិច្ចប្រជុំប្រចាំសប្តាហ៍ របស់គណៈអចិន្ត្រៃយ៍ CAMSOC នៅថ្ងៃទី៩ ខែសីហា ឆ្នាំ២០២២ ម្សិលមិញ ក្រោមវត្តមាន លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ CAMSOC ។
លោកអគ្គលេខាធិការ បានមានប្រសាសន៍ថាៈ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ CAMSOC បានផ្តល់អនុសាសន៍ ជូនដល់លោកបណ្ឌិត ថោងខុន ឲ្យត្រួតពិនិត្យលើគណៈកម្មការជំនាញម្តងមួយៗឡើងវិញ ដើម្បីឲ្យកាន់តែជាក់ច្បាស់សម្រាប់ដំណើរឆ្ពោះទៅទទួលរៀបចំធ្វើម្ចាស់ ផ្ទះ ការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣។
នៅក្នុងកិច្ចប្រជុំប្រចាំសប្តាហ៍ ក្នុងនោះរបៀបវារៈសំខាន់ៗ មានដូចជា ការត្រួតពិនិត្យលើផែនការដឹកជញ្ជូន និងការស្នាក់នៅ-ហូបចុក ក៏បានពិភាក្សា យ៉ាងល្អិតល្អន់ ដូចគ្នាផងដែរ។
ភាពតឹងតែងពីមុន លើផ្នែកដឹកជញ្ជូន ស្នាក់នៅ-ហូបចុកនេះ ដែលភូមិកីឡា ក្នុងផែនការ A មិនអាចទទួលបានទាន់ពេលវេលាអីនោះ គឺពេលនេះ មានពន្លឺ មានក្តីសង្ឃឹម ដោយយកផែការ A នេះ មកអនុវត្តហើយ។ ដូច្នេះ ពេលនេះ លោកបណ្ឌិត ថោង ខុន បានមានប្រសាសន៍ថាៈ យើងបានធូរទ្រូងហើយ ដែលយើងមានការកំណត់ច្បាស់លាស់។បន្ទប់ស្នាក់នៅក្នុងភូមិកីឡា មានជាង ៥.០០០ គ្រែ ដែលត្រូវបានរៀបចំនៅទីនោះរួចហើយ។ ហេតុនេះគឺយើងបានរួចខ្លួនហើយ សម្រាប់កិច្ចការទទួលប្រតិភូកីឡា មកចូលរួមប្រកួតស៊ីហ្គេម ឆ្នាំ២០២៣ នៅកម្ពុជាយើង។
នេះទាក់ទងនឹងផ្នែកដឹកជញ្ជូន ស្នាក់នៅ ហូបចុក សម្រាប់គោលដៅ ស៊ីហ្គេម ឆ្នាំ២០២៣ នេះ ត្រូវបានលោកអគ្គលេខាធិការ សង្កត់ធ្ងន់ថាៈ ប្រតិភូកីឡាស៊ីហ្គេម មិនមែនមកម្តងទាំងអស់ ក្នុងចំនួន ពី ៧.០០០ ទៅ ៨.០០០ នាក់ ក្នុងពេលតែមួយនោះទេ។ កម្មវិធីប្រភេទកីឡាណា ប្រកួតបាន គេមកប្រកួត ហើយពេលចប់ គេត្រឡប់ទៅវិញ ឬពេលប្រកួតប្រភេទកីឡាណា ប្រភេទកីឡានោះ បានមកចូលរួម។
ដូច្នេះជារួម ក្នុងពេលតែមួយ ប្រតិភូអត្តពលិកអាចស្ថិតក្នុងរង្វង់ចំនួនត្រឹម ៥.០០០ នាក់ប៉ុណ្ណោះ ដែលចំនួននេះ យើងអាចរៀបចំជូនបាន នៅក្នុងភូមិកីឡា ហើយក៏ងាយស្រួលក្នុងការដឹកជញ្ជូនដែរ។
សម្រាប់ព្រឹត្តិការណ៍អាស៊ានប៉ារ៉ាហ្គេម បន្ទាប់ពីបញ្ចប់ការប្រកួតកីឡាស៊ីហ្គេមនោះ ក៏គណៈអចិន្ត្រៃយ៍ បានពិភាក្សាលម្អិត ប្រមូលធាតុចូលបានគ្រប់ជ្រុងជ្រោយ ដើម្បីបម្រើដល់ភាពចាំបាច់របស់អត្តពលិកមានពិការភាព។ បើទោះបីជាអត្តពលិកពិការ ត្រូវស្នាក់នៅភូមិកីឡា ក្នុងបរិវេណនៃពហុកីឡដ្ឋានជាតិមរតកតេជោក្តីក៏គណៈកម្មការជំនាញ ត្រូវរៀបចំឲ្យបានល្អប្រសើរដែរ។
សម្រាប់ការត្រៀមលើព្រឹត្តិការណ៍សំខាន់ៗទាំងពីរ ក្នុងឋានៈម្ចាស់ផ្ទះជាលើកដំបូងនេះ មិនមានអ្វីជាបញ្ហា សម្រាប់ផ្នែកដឹកជញ្ជូន ស្នាក់នៅ-ហូបចុក នេះទៀតទេ។ ក្នុងនោះ ដូចជាការរៀបចំសម្អាតបន្ទប់ស្នាក់នៅ និងការផ្គត់ផ្គង់លើម្ហូបអាហារ បានប្រគល់ជូនដល់ក្រុមហ៊ុនឯកជន ដែលទទួលបានការដេញថ្លៃជាអ្នកទទួលរ៉ាប់រង។ ដូច្នេះ ការប្រកួតកីឡា មិនត្រឹមតែសម្រួចតែទៅលើបច្ចេកទេសអត្តពលិកតែមួយមុខនោះទេ ដោយលក្ខណៈហ្គេម មានកិច្ចការជាច្រើន ដែលត្រូវគិតគូរក្នុងពេលតែមួយដូចជាការដឹកជញ្ជូន ស្នាក់នៅ ហូបចុកនេះជាដើម។
ម្យ៉ាងទៀត ជាការបើកឱកាសដល់ក្រុមហ៊ុនឯកជន បានចូលរួមធ្វើកិច្ចការសំខាន់ៗទាំងអស់នេះ រួមគ្នា ដោយផ្នែកណាខ្លះ ដែលត្រូវប្រគល់ដល់ក្រុមហ៊ុន និងផ្នែកសំខាន់ៗជាច្រើនទៀត ដែលត្រូវគណៈកម្មការជំនាញ ត្រូវគ្រប់គ្រង ដឹកនាំ ដោយខ្លួនឯង៕/V