ខេត្តបន្ទាយមានជ័យ ៖ ភ្លៀងមួយមេធំមានរយៈជាងមួយម៉ោង បណ្តាលឱ្យទឹកលិចផ្លូវមួយចំនួនខណៈប្រជាពលរដ្ឋជួបការលំបាក និងប៉ះពាល់សម្ភារក្នុងផ្ទះនៅល្ងាចថ្ងៃទី០៧ ខែសីហា ឆ្នាំ២០២២ ស្ថិតក្នុងសង្កាត់ប៉ោយប៉ែត ក្រុងប៉ោយប៉ែត ។
ប្រជាពលរដ្ឋបានបញ្ជាក់ថា ទឹកភ្លៀងបណ្តាលឱ្យលិចផ្លូវមួយចំនួននៅទីប្រជុំជនក្នុងក្រុងប៉ោយ
ប៉ែត ។ ទឹកភ្លៀងបានជន់លិចរាល់ឆ្នាំ នៅពេលដែលមានភ្លៀងធ្លាក់ខ្លាំងម្តងៗ ធ្វើឱ្យជួបការលំបាកពេលឆ្លងកាត់ទៅមក និងសុំឱ្យអាជ្ញាធរក្រុងប៉ោយប៉ែត និងអាជ្ញាធរសង្កាត់ប៉ោយប៉ែតនិងមន្ត្រីជំនាញត្រូវចុះពិនិត្យសិក្សា ដើម្បីរំដោះទឹកអោយបានឆាប់ កុំអោយជួបការលំបាកបែបនេះទៀត ។
មន្ត្រីរដ្ឋាបាលសាលាក្រុងប៉ោយប៉ែតបានប្រាប់ដែរថា នៅពេលមានភ្លៀងធ្លាក់ខ្លាំង ផ្លូវនិងផ្ទះប្រជាពលរដ្ឋត្រូវជន់លិចទឹកពិតប្រាកដមែន ។ ប៉ុន្តែទឹកភ្លៀងលិចមានរយៈពេលលឿនទេ ហើយក៏ស្រកទៅវិញអស់ហើយ ។
មន្ត្រីរដ្ឋបាលសាលាក្រុងបានបញ្ជាក់ថា រយៈពេលកន្លងមក អភិបាលក្រុងប៉ោយប៉ែត លោក គាត ហ៊ុល បានខិតខំយកចិត្តទុកដាក់រៀបប្រព័ន្ធលូរំដោះទឹក ដើម្បីបញ្ចៀសការលិចលង់ដោយទឹកភ្លៀងធ្លាក់ខ្លាំង តែបណ្តាលឱ្យទឹកហូរមិនទាន់ គឺបណ្តាលមកពីប្រជាពលរដ្ឋមិនបានចូលរួមសំអាតបរិស្ថាន ដោយអ្នកខ្លះចោលសំរាមនៅពេលមានភ្លៀងធា្លក់ សំរាមហូរចូលស្ទះមានលូរំដោះទឹកទើបបណ្តាលទឹកភ្លៀងលិចផ្លូវ ដូច្នេះ សូមបងប្អូនចូលថែរក្សាអនាម័យឱ្យបានទាំងអស់គ្នា ។