Views: 1
ប្រែសម្រួលៈបំណង(ដេល្លីម៉េល)៖ ភ្នំភ្លើងម៉ោន សេម៉េរុ(Mount Semeru)របស់ឥណ្ឌូនេស៊ីបានផ្ទុះបាញ់ផេះក្តៅនិងផ្សែងដ៏ខាប់ចូលក្នុងមេឃកាលពីថ្ងៃអាទិត្យ និងបញ្ជូនកំអែភ្នំភ្លើងធ្លាក់ចុះតាមចង្កេះភ្នំ ជាហេតុនាំអោយអាជ្ញាធរចេញការព្រមានដល់កំរិតខ្ពស់បំផុត។
ការផ្ទុះភ្នំភ្លើងខ្ពស់បំផុតនេះនៅលើកោះចាវ៉ាចម្ងាយប្រមាណ៨០០គីឡូម៉ែត្រពីរដ្ឋធានីហ្សាការតានេះ បង្កអោយមានការជម្លៀសមនុស្សចេញពីភូមិជុំវិញនៅមួយឆ្នាំក្រោយការផ្ទុះដ៏ខ្លាំងរបស់វាដែលបានសម្លាប់មនុស្សរាប់សិបនាក់។
អ្នកនាំពាក្យមជ្ឈមណ្ឌលសម្រាលគ្រោះមហន្តរាយភូមិសាស្ត្រនិងភ្នំភ្លើងវិទ្យាលោក ហេនដ្រា ហ្គូណាវ៉ាន ( Hendra Gunawan)បានប្រាប់ទូរទស្សន៍មួយថា កំរិតគំរាមកើនឡើង«មានន័យថាគ្រោះថ្នាក់គំរាមដល់ភូមិប្រជាជននិងសកម្មភាពភ្នំភ្លើងកាន់តែកើនឡើង។ភក់ក្តៅហូរចុះមកបង្កជាគំនរផេះនិងរងើកភ្លើងនៅចុងភ្នំភ្លើងកំពស់៣.៦៧៦ម៉ែត្រ និងហូរចុះមកប្រៀបដូចជាទន្លេភ្លើង។
មិនមានការស្លាប់ឬរងរបួសបង្កឡើងពីការផ្ទុះនេះនៅឡើយទេ តែលោកហ្គូណាវ៉ាន បានព្រមានថាអ្នកស្រុកនៅក្បែរៗភ្នំមិនធ្វើដំណើរនៅចម្ងាយក្រោមប្រាំបីគីឡូម៉ែត្រពីមាត់ភ្នំភ្លើងទេ។លោកបានបន្តថាជម្រកបណ្តោះអាសន្នត្រូវបានរៀបចំសំរាប់ទទួលអ្នកស្រុកនៅក្បែរភ្នំដែលភៀសខ្លួន ឬត្រូវបានជម្លៀសចេញ។
រូបភាពបង្ហាញភ្នំភ្លើង ម៉ោន សេម៉េរុ ផ្ទុះបាញ់ផេះខ្មៅចូលក្នុងអាកាស
ភ្នំភ្លើងម៉ោន សេម៉េរុ បានផ្ទុះកាលពីមួយឆ្នាំមុន ដោយបានសម្លាប់មនុស្សយ៉ាងតិច៥១នាក់និងបំផ្លាញផ្ទះជាង៥.០០០។គ្រោះធម្មជាតិពេលនោះនាំអោយបណ្តាដងវិថីពោរពេញដោយភក់ម៉ដ្តនិងផ្ទះព្រមទាំងយានយន្តគ្របដោយផេះ ហើយមនុស្សជិត១០.០០០នាក់ស្វះស្វែងរកជម្រកបណ្តោះអាសន្ន៕
