Views: 1
ប្រែសម្រួលៈបំណង(វ៉េអិនអិចស្ព្រេស)៖ កាំជ្រួចប្រភេទថ្មី យន្តហោះចម្បាំង រថក្រោះនិងកាំភ្លើងត្រូវបាននាំមកដាក់តាំងក្នុងពិព័រណ៍យោធាអន្តរជាតិវៀតណាមឆ្នាំ២០២២នៅព្រលានយន្តហោះ យ៉ា ឡាំ(Gia Lam)របស់ទីក្រុងហាណូយ ចាប់ពីថ្ងៃព្រហស្បតិ៍ទី៨ដល់១០ធ្នូ។
ប្រព័ន្ធការពារដែនអាកាសឈ្មោះស្ព៉ៃឌ័រ(SPYDER)ផលិតនៅអ៊ីស្រាអែល កាំជ្រួចដេញតាមកំដៅផាយថន-ហ្វាយ(Python-5)និងកាំជ្រួចបញ្ជានាំផ្លូវទៅកាន់គោលដៅធុនដឺប៊ី(Derby)ឧទ្ធម្ភាគចក្រនិងកាំជ្រួចជាច្រើនមុខទៀតសុទ្ធតែត្រូវបាននាំមកពី៣០ប្រទេសនិងដែនដីមកដាក់តាំងក្នុងពិព័រណ៍នេះ។
ពិព័រណ៍យោធាអន្តរជាតិវៀតណាមឆ្នាំ២០២២ បើកចាប់ពីថ្ងៃ៨ធ្នូ ដល់ ១០ធ្នូ ដោយមានការចូលរួមពីក្រុមហ៊ុនផលិតនិងជួញដូរអាវុធចំនួន១៣០មកពី៣០ប្រទេសនិងដែនដី។
រថក្រោះ យន្តហោះ ឧទ្ធម្ភាគចក្រនិងប្រព័ន្ធរ៉ាដា ស្ថិតចំណោមសព្វាវុធផ្សេងៗ ដែលត្រូវដាក់តាំងបង្ហាញនៅលើទីលានមួយទំហំ២០.០០០ម៉ែត្រការ៉េ។
ទម្របាញ់និងកាំជ្រួចការពារដែនអាកាស S-125-2TM ដែលជារបស់កងទ័ពវៀតណាម អាចកំទេចគោលដៅនៅចម្ងាយ៣៥គីឡូម៉ែត្រ និងគោលដៅដែលហោះក្នុងល្បឿន៩០០ម៉ែត្រក្នុងមួយវិនាទី។
កាំជ្រួចឬគ្រាប់បែកបាញ់ចេញពីនាវាធុន533 មីលីម៉ែត្ររបស់រុស្ស៊ី អាចវាយប្រហារនាវាជាច្រើនប្រភេទ នាវាមុជទឹកនិងសំណង់បណ្តែតទឹក។
ដ្រូនធុនស្រាលVUA-SC-3G UAVផលិតឡើងដោយក្រុមហ៊ុនទូរគមនាគមន៍វៀតណាមViettel អាចហោះគ្មានឈប់បានបីម៉ោង ជាមួយនឹងល្បឿនលឿនបំផុត១២០គីឡូម៉ែត្រក្នុងមួយម៉ោងនិងរង្វង់គ្រប់គ្រងបាន៥០គីឡូម៉ែត្រ។
រថក្រោះT-90SKរបស់កងទ័ពវៀតណាមតែផលិតនៅរុស្ស៊ី ទម្ងន់៤៦,៥តោន។វាបើកបានលឿនបំផុត៦០គីឡូម៉ែត្រក្នុងមួយម៉ោងនិងបំពាក់កាណុង១២៥មីលីម៉ែត្រ ជាមួយនឹងកាំភ្លើងធុនតូចដទៃទៀត។
នៅបញ្ជពិព័រណ៍វៀតណាម កាំភ្លើងជាច្រើនប្រភេទក៏ត្រូវបាននាំមកតាំងបង្ហាញ ភាគច្រើនជាកាំភ្លើងប្រើគ្រាប់ 7.62 x 39 មីលីម៉ែត្រដែលផលិតនៅក្នុងប្រទេសវៀតណាមផ្ទាល់។
កាំភ្លើងវែងស៊ីក្លូន( Cyclone )ផលិតដោយក្រុមហ៊ុនអង់គ្លេស ទម្ងន់៦,៨៥គីឡូក្រាម ប្រវែង១.១៩ម៉ែត្រ។
កាំភ្លើងខ្លី CZ P-10 C តាំងនៅស្តង់អ៊ីស្រាអែល។
រូបគំរូនៃយន្តហោះ Su-35S ផលិតដោយក្រុមហ៊ុនរុស្ស៊ីក៏ត្រូវបាននាំមកតាំងបង្ហាញ។យន្តហោះនេះបំពាក់គ្រឿងបរិក្ខាទំនើបជាច្រើន រួមមានរ៉ាដា N035 Irbis-E ដែលអនុញ្ញាតអោយវាចាប់បាននិងវាយប្រហារលើគោលដៅ៣០នៅចម្ងាយ៤០០គីឡូម៉ែត្រ និងបំផ្លាញគោលដៅចំនួន៨ក្នុងពេលតែមួយ។
រូបគំរូយន្តហោះF-16របស់ក្រុមហ៊ុនអាម៉េរិកLockheed Martinក៏មានវត្តមានផងដែរ។F-16ត្រូវបានដាក់អោយបំរើសេវាកងទ័ពអាកាសតាំងពីទសវត្សរ៍ឆ្នាំ១៩៧០តែវាត្រូវបានកែសម្រួលជាច្រើនដងនិងនៅតែពេញនិយមសំរាប់កងទ័ពអាកាសក្នុងប្រទេសជាច្រើន។វាហោះបានលឿនបំផុត២.១២១គីឡូម៉ែត្រក្នុងមួយម៉ោងនៅកំពស់១២.០០០ម៉ែត្រនិងអាចឡើងដល់កំពស់១៨.០០០ម៉ែត្រ។វាបំពាក់កាំភ្លើងកាណុង២០មីលីម៉ែត្រនិងអាចផ្ទុកគ្រាប់៧,៧តោន។
នាយករដ្ឋមន្ត្រីវៀតណាម រដ្ឋមន្ត្រីការពារជាតិវៀតណាម ទស្សនាប្រព័ន្ធរ៉ាដានិងបច្ចេកវិទ្យាប្រឆាំងយន្តហោះរបស់ក្រុមហ៊ុនViettel។
ចាប់ពីព្រឹកថ្ងៃសៅរ៍ ប្រជាជនអាចចូលមើលពិព័រណ៍និងការសម្តែងយុទ្ធោបករណ៍ មុនពេលបិទព្រឹត្តិការណ៍ដ៏ធំនេះនៅម៉ោង៦ល្ងាចក្នុងថ្ងៃដដែល៕