Views: 1
ដោយៈ ភ្នំស្វាយ / បន្ទាយមានជ័យៈ ពលរដ្ឋ បានចោទថា មន្ត្រី និងក្រុមហ៊ុនកូណៃ បិទផ្លូវដោយដាក់ដុំថ្ម ដាំបង្គោល និង រាយលួសបន្លា ព័ទ្ធយកដីភ្នំរដ្ឋ និងដីពលរដ្ឋ ក៏ប៉ុន្តែក្រុមហ៊ុន បាននិយាយថា មិនមែនជាផ្លូវ និងដីពលរដ្ឋទេ។ ទីតាំងមានបាតុភាពនោះ ស្ថិតនៅចំណុចជួរភ្នំកងវ៉ា ក្នុងភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
មនុស្សមួយចំនួន ដែលសំអាងថា ជាពលរដ្ឋរស់នៅភូមិកងវ៉ា និងភូមិពង្រ សង្កាត់កំពង់ស្វាយ បានប្រាប់សារព័ត៌មាន ឱ្យដឹងកាលពីថ្ងៃទី៧ ខែធ្នូ កន្លងទៅថ្មីៗនេះ ថាៈ មន្ត្រីនគរបាល និងក៏ជាថៅកែក្រុមហ៊ុនកូ ណៃ (ដែលជាឈ្មោះលោក) បានបិទផ្លូវសហគមន៍ ទៅចម្ការ និងស្រែមួយកន្លែង ដោយបានយកដុំថ្មធំៗ រៀបបិទផ្លូវ ដែលពលរដ្ឋតែងធ្វើដំណើរដឹកកសិផល និងដីអាស្រ័យផល ចិញ្ចឹមសត្វ ។
ពលរដ្ឋ បានបន្តថាៈ ការធ្វើរបង ដាក់បន្លាលួស រាយដុំថ្មបិទផ្លូវ និងព័ទ្ធភ្នំនោះ ទំនងជាព័ទ្ធយកដីភ្នំរដ្ឋ ដែលគាត់បានសុំអាជ្ញាប័ណ្ណកាយដី យកប្រយោជន៍រួចហើយ មិនព្រមប្រគល់ជូនរដ្ឋ តែបែរជាព័ទ្ធធ្វើកម្មសិទ្ធិផ្ទាល់ខ្លួនថែមទៀតទៅវិញ ។ ពោលគឺ ដូចជាកាត់ផ្តាច់ដង្ហើម និងជីវភាពរស់នៅរបស់ប្រជាពលរដ្ឋ ។ ដីនោះ មានទំហំ រាប់សិបហិកតាដែរ ។
លោក សុត វឌ្ឍនា ប្រធានមន្ទីររ៉ែ និងថាមពល ខេត្តបន្ទាយមានជ័យ បានឲ្យដឹង នៅថ្ងៃទី ៧ ធ្នូនេះថាៈ ដីថ្មនៅភ្នំ ជាសមត្ថកិច្ចជំនាញរ៉ែ មែន លើដីដែលគាត់ និងអាជីវករផ្សេង បានសុំកាយអាចម៍ដី ចេញយកទៅប្រើប្រាស់តាមកម្មវត្ថុ។ ក្នុងនោះ ក្រោយកាយអាចម៍ ដី ថ្មពីភ្នំ ឬដីរដ្ឋចេញរួច ត្រូវប្រគល់ថ្នាលដីឱ្យរដ្ឋវិញ ។ ប៉ុន្តែករណីដែលថា មានបាតុភាពយកថ្មធំ ដាំបង្គោល និងរាយលួសបន្លា ព័ទ្ធបិទផ្លូវនោះ ជាសមត្ថកិច្ច ដោះស្រាយ របស់អាជ្ញាធរភូមិ សង្កាត់ ក្រុង ខេត្ត ។ ទោះជាយ៉ាងណា លោកនឹងចាត់មន្ត្រីឱ្យចុះទៅ ពិនិត្យ វាយតម្លៃ និងរាយការណ៍ នៅចំណុចទីតាំងដីភ្នំ ដែលថា មានការហ៊ុមព័ទ្ធយក ហើយបិទផ្លូវរបស់ពលរដ្ឋនោះ ។
ឯលោក ស្រេង សុផល អភិបាលក្រុងសិរីសោភ័ណ បានប្រាប់ថាៈ លោកក្តាប់មិនទាន់ បាននៅឡើយ តែលោកនឹងចាត់ឲ្យខាងភ្នាក់ងារភូមិ មន្ត្រីសង្កាត់ ចុះពិនិត្យ ដើម្បីដោះស្រាយ សំណូមពរ និងទុក្ខកង្វល់របស់ពលរដ្ឋ ។
ឆ្លើយតបការចោទប្រកាន់ ខាងលើនេះ លោក កូ ណៃ នៃក្រុមហ៊ុនកូ ណៃ បានប្រាប់ កាសែតរស្មីកម្ពុជា នៅថ្ងៃទី៧ ខែធ្នូ ថាៈ នៅម្តុំនោះ មានផ្លូវលំពីរខ្សែ ដែលពលរដ្ឋ ធ្លាប់ប្រើប្រាស់ គឺនៅខាងកើត ១ខ្សែ ដែលបង្វែរទៅជាប់ជើងភ្នំ និងផ្លូវចូលបន្ទាយ រថក្រោះ (យោធភូមិភាគ៥ ទិសបន្ទាយមានជ័យ) និង១ខ្សែទៀតនៅខាងលិច ។
លោកបានបន្តថាៈ ប៉ុន្តែអ្វីដែលពលរដ្ឋតវ៉ានោះ ជាផ្លូវនោះទេ ។ វាជាដីរបស់លោកផ្ទាល់ ដែលបានទិញពីលោក តួ ធានទឺ (ទីប្រឹក្សាថ្នាក់ដឹកនាំក្រុមប្រឹក្សាស្តារ និងអភិវឌ្ឍន៍ជនបទ និងកសិកម្ម) ដែលលោក បានកាយអាចម៍ដីភ្នំអស់ ហើយសល់រណ្តៅដី ។ ចំពោះធ្លា ឬគន្លង ដែលមានរាងដូចផ្លូវនោះ តាមពិត លោកបានឈូសឆាយពង្រាប សម្រាប់ លោកធ្វើដំណើរ តែក្នុងដីកម្មសិទ្ធិរបស់លោកប៉ុណ្ណោះ។
លោកបានបន្តទៀតថាៈ មួយទៀត នៅជើងភ្នំនោះ បន្ទាយរថក្រោះ ដូចខាងលើ បានយកដីចម្ការរបស់លោក កាលពីអំឡុងសភាពការណ៍ព្រំដែនកម្ពុជា ថៃ (ឆ្នាំ២០០៨) កន្លងមក តែឥឡូវគាត់បានប្រគល់ដីឱ្យលោកវិញ ។ ហេតុនេះ លោកក៏ឈួសឆាយ ដីនោះ និងធ្វើរបងហ៊ុមព័ទ្ធ។
ទោះជាយ៉ាងណា លោក កូ ណៃ បានទទួលស្គាល់ថាៈ ពិតជាពលរដ្ឋធ្លាប់តវ៉ា និង សម្ភាសន៍ រិះគន់លោក ដោយចុះផ្សាយនៅសារព័ត៌មានបរទេស ផ្សាយជាភាសាខ្មែរ រឿងផ្លូវចូលចម្ការរបស់ពលរដ្ឋដែរ។ មានតែម្នាក់ គឺលោកគ្រូ វ៉ន ចំរើន (អតីតចៅសង្កាត់ កំពង់ស្វាយ) ដែលតវ៉ារឿងដីធ្លី និងរឿងផ្លូវទៅចម្ការ ។ តែរឿងនោះ ត្រូវបានដោះ ស្រាយ។
ចំពោះការតវ៉ារឿងផ្លូវ ដែលចោទលោកថា បិទនាំឱ្យរាំងស្ទះពេលនេះ តាមពិត បងប្អូន មានផ្លូវសម្រាប់ចូលចម្ការ និងដីកសិផល នៅទិសខាងកើត ប៉ុន្តែដោយមិនបានថែទាំ ឬសម្រួលឱ្យប្រើប្រាស់បាន ហេតុនោះ ទើបពលរដ្ឋ បានតវ៉ា ហើយចង់ដើរមក ទិសខាងលិច កាត់ដីកម្មសិទ្ធិរបស់លោកទៅវិញ ។
ចំណែកអ្នកតាមដាន នូវអ្វីដែលពាក់ព័ន្ធនឹងករណីនេះ បាននិយាយថាៈ ដោយមានការ ចោទប្រកាន់ និងឆ្លើយតបមិនទាន់ជ្រះស្រឡះដូច្នេះ ក៏ស្នើសុំឱ្យមន្ត្រីអាជ្ញាធរ មានសមត្ថកិច្ច និងអ្នកពាក់ព័ន្ធ ចុះពិនិត្យ ដោះស្រាយ ឱ្យមានតម្លាភាព និងអាចទទួលយកបាន៕/V