Views: 11
ដោយៈ ប.ជ័យ / បន្ទាយមានជ័យៈ លោក ស្វាយ ជា អភិបាលស្រុកម៉ាឡៃ បានឱ្យដឹង នៅថ្ងៃទី៣០ ខែកញ្ញា ឆ្នាំ២០២២ នេះថាៈ ប្រជាពលរដ្ឋរងគ្រោះដោយទឹកជំនន់ ជិត ២០ គ្រួសារ ក្នុងចំណោមជិត ៧០ គ្រួសារ នៅឃុំបឹងបេង ស្រុកម៉ាឡៃ បានត្រូវជម្លៀស ចេញពីលំនៅដ្ឋាន ទៅកាន់ទីទួលសុវត្ថិភាព ។
លោកអភិបាលស្រុកម៉ាឡៃ បានរំលឹកឱ្យដឹងថាៈ កាលពីល្ងាចម្សិលមិញ លោកបានដឹក នាំកងកម្លាំង និងក្រុមការងារ ចុះផ្ទាល់តាមខ្នងផ្ទះ ប្រជាពលរដ្ឋ ដែលរងគ្រោះដោយសារ ទឹកជំនន់ទឹកភ្លៀង ចំនួន ៦៩ គ្រួសារ ក្នុងនោះ អាជ្ញាធរមានសមត្ថកិច្ច បានជម្លៀស ពលរដ្ឋចំនួន ១៧ គ្រួសារ ស្ថិតក្នុងឃុំបឹងបេង និងឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ទៅកាន់ទីទួលសុវត្ថិភាព ។
លោកវរសេនីយ៍ឯក សួង សៅ មេបញ្ជាការ វរសេនាតូចនគរបាលការពារព្រំដែនគោក លេខ ៨១៥ ដឹកនាំកម្លាំងសហការជាមួយ អាជ្ញាធរពាក់ព័ន្ធ ចេញប្រតិបត្តិការជួយ ជម្លៀសពលរដ្ឋស្រុកម៉ាឡៃ តាមព្រំដែនកម្ពុជា-ថៃ ចេញពីទឹកជំនន់ មកកាន់ទីទួល សុវត្ថិភាព នៅក្នុងភូមិសាស្ត្រស្រុកម៉ាឡៃ។ នេះជាការអនុវត្តន៍តាមបទបញ្ជា និងការចង្អុលបង្ហាញពីលោកឧត្តមសេនីយ៍ សិទ្ធិ ឡោះ ស្នងការនគរបាល ខេត្តបន្ទាយមានជ័យ ។
ឯលោក ស្វាយ ជា អភិបាលស្រុកម៉ាឡៃ បានដឹកនាំកម្លាំងចុះជួយជម្លៀសប្រជាពលរដ្ឋ ជញ្ជូនទ្រព្យសម្បត្តិ សត្វចិញ្ចឹម នៅតាមបណ្តោយអូរព្រំដែនកម្ពុជា ថៃ ក្នុងឃុំបឹងបេង និងឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ទៅកាន់ទីទួលសុវត្ថិភាពដែរ ។
ចំណែកលោក ប៉ាន់ខែម ប៊ុនថន នាយករងខុទ្ធកាល័យសម្តេចតេជោ នាយករដ្ឋមន្ត្រី ដែលបំពេញការងារដោះស្រាយទំនាស់ដីធ្លី នៅស្រុកម៉ាឡៃ នៅថ្ងៃទី៣០ ខែកញ្ញា បានទៅពិនិត្យស្ថានភាពទឹកជំនន់ នៅឃុំបឹងបេង នោះដែរ ។
សូមបញ្ជាក់ថា លំនៅឋាន និងពលរដ្ឋ ដែលរងគ្រោះ នៅឃុំបឹងបេង និងឃុំម៉ាឡៃ ស្រុកម៉ាឡៃ នាពេលនេះ បង្កពីជំនន់ទឹកភ្លៀង ស្រុងចុះពីភូមិសាស្ត្រស្រុកសំពៅលូន ខេត្តបាត់ដំបង និងមួយភាគទៀត ជាទឹកហូរធ្លាក់មកពីប្រទេសថៃ។
មន្ត្រីបានឱ្យដឹងថាៈ លុះមកដល់រសៀល ថ្ងៃទី៣០ ខែកញ្ញា ស្ថានភាពទឹកជំនន់ ពាក់កណ្តាលផ្លេកបន្ទោរនេះ បានស្រកខ្លះវិញបណ្តើរៗហើយ៕ V / N