Views: 14
ដោយ៖ ម៉េងឆៃ / ភ្នំពេញ៖ នៅក្នុងសប្តាហ៍នេះ មានព្រឹត្តិការណ៍ជាតិសំខាន់ៗ ជាច្រើន បានកើតឡើង ពិសេសគឺព្រឹត្តិការណ៍នៃកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ ដែលកម្ពុជា បានធ្វើជាម្ចាស់ផ្ទះរៀបចំកិច្ចប្រជុំ ក្នុងនាមជាប្រធានអាស៊ាន នៅឆ្នាំ២០២២ នេះ។
១-គណបក្សនយោបាយ ស្ថាប័នរដ្ឋ និងឯកជនជាច្រើន បង្ហាញការគាំទ្រចំពោះការធ្វើវិសោធនកម្មរដ្ឋធម្មនុញ្ញ លើកទី១០ នេះ
ញត្តិគាំទ្រការធ្វើវិសោធនកម្មរដ្ឋធម្មនុញ្ញជាច្រើន ត្រូវបានគណបក្សនយោបាយ ស្ថាប័នក្រសួង និងអង្គភាពនានា បានធ្វើឡើងជាបន្តបន្ទាប់។ ញត្តិគាំទ្រទាំងនោះ បានគាំទ្រ និងចាត់ទុកការធ្វើវិសោធនកម្មរដ្ឋធម្មនុញ្ញ ថាមិនមានការរាំងស្ទះដល់ដំណើរការស្ថាប័នជាតិ និងដើម្បីធានាឱ្យស្ថាប័នកំពូលរបស់ជាតិ អាចមានដំណើរការរលូន ដោយមិនជាប់គាំងនៅគ្រប់កាលៈទេសៈណាមួយឡើយ។
២-រដ្ឋមន្ដ្រីការបរទេសអាស៊ាន ចូលរួមកិច្ចប្រជុំគណៈកម្មការតំបន់គ្មានអាវុធនុយក្លេអ៊ែរ នៅអាស៊ីអាគ្នេយ៍ (SEANWFZ)
នៅរសៀលថ្ងៃទី២ ខែសីហា ឆ្នាំ២០២២ រដ្ឋមន្ត្រីការបរទេសអាស៊ាន បានចូលរួមប្រជុំ ក្នុងកិច្ចប្រជុំគណៈកម្មការតំបន់គ្មានអាវុធនុយក្លេអ៊ែរ នៅអាស៊ីអាគ្នេយ៍ (SEANWFZ)។ កិច្ចប្រជុំនេះ មានការចូលរួមពីរដ្ឋមន្ត្រីការបរទេសអាស៊ាន និងអគ្គលេខាធិការអាស៊ាន។ ប៉ុន្តែរដ្ឋមន្ត្រីហ្វីលីពីន មិនបានចូលរួមទេ ដោយសារតែបញ្ហាសុខភាព តែជំនួសដោយអនុរដ្ឋមន្ត្រីការបរទេស។ រីឯមីយ៉ាន់ម៉ា មិនបានចូលរួមទេ ក្រោយអាស៊ាន ឲ្យបញ្ជូនត្រឹមតំណាងមិនមែននយោបាយ។
៣-ប្រធានអាស៊ាន ប្តេជ្ញាបន្តដោះស្រាយបញ្ហាមីយ៉ាន់ម៉ា តែព្រមានប្រើប្រាស់វិធានការថ្មី ប្រសិនបើស្ថានការណ៍ កាន់តែអាក្រក់ជាងបច្ចុប្បន្ន
ក្នុងពិធីបើកជាផ្លូវការនៃកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ និងកិច្ចប្រជុំពាក់ព័ន្ធ កាលពីព្រឹកថ្ងៃទី៣ ខែសីហា សម្តេចតេជោ ហ៊ុន សែន នាយករដ្ឋមន្ត្រី និងជាប្រធានអាស៊ាន បានប្រកាសថា កម្ពុជាក្នុងតួនាទីជាអ្នកដឹកនាំអាស៊ាន នឹងបន្តខិតខំប្រឹងប្រែងដោះស្រាយបញ្ហាមីយ៉ាន់ម៉ា ដោយមិនឱ្យប៉ះពាល់ដល់ឯកភាពអាស៊ាននោះទេ ប៉ុន្តែក្នុងករណីដែលស្ថានភាពប្រទេសមីយ៉ាន់ម៉ា កាន់តែអាក្រក់ជាងនេះ ពិសេសក្នុងករណី ដែលមានការកាត់ទោសប្រហារជីវិតថ្មីបន្តទៀត ប្រធានអាស៊ាន បានព្រមានថា នឹងប្រើប្រាស់វិធានការថ្មី ឆ្លើយតបវិញផងដែរ។
៤-ចិន ប្រកាសជាថ្មីគាំទ្រកម្ពុជា និងចាត់ទុកលោក ហ៊ុន ម៉ាណែត បេក្ខភាពនាយករដ្ឋមន្ត្រីបន្តវេន ជាកូនសោសំខាន់នៃមិត្តភាពរវាងកម្ពុជា-ចិន
រដ្ឋាភិបាលចិន តាមរយៈលោក វ៉ាង យី រដ្ឋមន្ត្រីការបរទេសចិន បានអះអាងពីជំហរបស់រដ្ឋាភិបាលចិនសាជាថ្មី គឺគាំទ្រដោយភាពរឹងមាំចំពោះកម្ពុជា ទាំងនយោបាយផ្ទៃក្នុង និងទាំងនយោបាយការបរទេស។ បន្ថែមលើសនេះ រដ្ឋាភិបាលចិន ចាត់ទុកលោក ហ៊ុន ម៉ាណែត ដែលជាបេក្ខភាពនាយករដ្ឋមន្ត្រីបន្តវេនរបស់គណបក្សប្រជាជនកម្ពុជា គឺជាកូនសោសំខាន់នៃមិត្តភាពរវាងកម្ពុជា និងចិនផងដែរ។ ជំហររបស់មហាមិត្តចិនដូច្នេះ បានធ្វើឡើងក្នុងពេលលោក វ៉ាង យី ជួបសំដែងការគួរសម និងពិភាក្សាការងារជាមួយសម្តេចតេជោ នាយករដ្ឋមន្ត្រី ហ៊ុន សែន អំឡុងពេលប្រមុខការទូតចិន អញ្ជើញមកចូលរួមប្រជុំជាមួយរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ នៅរាជធានីភ្នំពេញ ចាប់ពីថ្ងៃទី២-៥សីហា ឆ្នាំ២០២២។
៥-សម្តេចតេជោ ហ៊ុន សែន ស្នើសហគមន៍អឺរ៉ុប ពិចារណាឡើងវិញ នូវទណ្ឌកម្មសេដ្ឋកិច្ចលើរុស្ស៊ី
សម្តេចតជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី៤ ខែសីហា បានស្នើឱ្យសហគមន៍អឺរ៉ុប ពិចារណាឡើងវិញនូវទណ្ឌកម្មសេដ្ឋកិច្ចលើរុស្ស៊ី។ ក្រៅពីនេះ ក្នុងជំនួបពិភាក្សាការងារជាមួយលោក ជូស៊េបបូរ៉ែល សង់តែល តំណាងជាន់ខ្ពស់សហគមន៍អឺរ៉ុប ទទួលបន្ទុកនយោបាយ កិច្ចការបរទេស និងសន្តិសុខ នៅវិមានសន្តិភាព ក្នុងរាជធានីភ្នំពេញ សម្តេចតេជោ ហ៊ុន សែន ក៏បានលើកឡើង និងពិភាក្សាការងារជាច្រើនជាតំណាងសហគមន៍អឺរ៉ុបផងដែរ ដូចជា បញ្ហា EBA និងរឿងមីយ៉ាន់ម៉ា ជាដើម។ លោក ជូស៊េបបូរ៉ែល សង់តែល តំណាងជាន់ខ្ពស់សហគមន៍អឺរ៉ុប បានអញ្ជើញមកកម្ពុជា ដើម្បីចូលរួមកិច្ចប្រជុំជាមួយរដ្ឋមន្ត្រីការបរទេស និងកិច្ចប្រជុំពាក់ព័ន្ធ ចាប់ពីថ្ងៃទី៤-៥ ខែសីហា ឆ្នាំ២០២២។
៦-ប្រធានអាស៊ានសម្ដេចតេជោ ហ៊ុន សែន ចង់ឃើញរុស្ស៊ី និងអ៊ុយក្រែន ដោះស្រាយបញ្ហាតានតឹង បច្ចុប្បន្ន ដោយសន្តិវិធី
សម្ដេចតេជោ ហ៊ុន សែន បានបង្ហាញជំហរបស់កម្ពុជា និងជាប្រធានអាស៊ាន ជុំវិញបញ្ហាសង្គ្រាមរុស្ស៊ី និងអ៊ុយក្រែន ដែលបច្ចុប្បន្ន បានក្លាយជាក្តីព្រួយកង្វល់រួមរួចជាស្រេចទៅហើយរបស់តំបន់ និងពិភពលោក តាមរយៈការកើនឡើងនៃវិបត្តិស្បៀង និងថាមពល។ សម្តេចប្រធានអាស៊ាន ក្នុងជំនួបពិភាក្សាការងារជាមួយលោក Sergey Lavrov រដ្ឋមន្ត្រីការបរទេសរុស្ស៊ី នៅវិមានសន្តិភាព នាថ្ងៃទី៤ ខែសីហា ដោយសម្តេចតេជោ បានបញ្ជាក់ថា កម្ពុជា ក៏ដូចជាអាស៊ានទាំងមូល ចង់ឃើញភាគីប្រឈមមុខដាក់គ្នា រុស្ស៊ី-អ៊ុយក្រែន ស្វែងរកការចរចា ដោះស្រាយបញ្ហាដោយសន្តិវិធី ជៀសវាងការបន្តប្រើប្រាស់កម្លាំង។
៧-រដ្ឋមន្ត្រីការបរទេសអាស៊ាន សម្តែងការព្រួយបារម្ភនូវភាពផុយស្រួយនៃស្ថានការណ៍តំបន់ និងអន្តរជាតិ
ក្រៅពីលើកឡើង និងពិភាក្សាក្នុងកិច្ចប្រជុំ ក្នុងរាជធានីភ្នំពេញ កាលពីថ្ងៃទី៣ ខែសីហា រដ្ឋមន្ត្រីការបរទេសអាស៊ាន បានចេញសេចក្តីថ្លែងការណ៍រួមគ្នា ស្តីពី ការវិវឌ្ឍឆ្លងច្រកសមុទ្រ ដោយបានសម្តែងការព្រួយបារម្ភពីភាពផុយស្រួយនៃស្ថានការណ៍តំបន់ និងអន្តរជាតិ ជាពិសេសការវិវឌ្ឍថ្មីៗនេះ នៅតំបន់ក្បែរអាស៊ាន ដែលរដ្ឋមន្ត្រីការបរទេសអាស៊ាន ចាត់ទុកថា អាចបង្កអស្ថិរភាពដល់តំបន់អាស៊ាន។ សេចក្តីថ្លែងការណ៍នេះ បានធ្វើឡើង ខណៈដែលភាពតានតឹង បានកើតឡើង នៅច្រកសមុទ្រតៃវ៉ាន់ បន្ទាប់ពីប្រធានសភាអាមេរិក បំពេញទស្សនកិច្ច នៅកោះតៃវ៉ាន់ កាលពីថ្ងៃទី២ និងថ្ងៃទី៣សីហា។ ចិនបានជំទាស់នឹងដំណើរទស្សនកិច្ចនេះ ហើយបានធ្វើសមយុទ្ធយោធាបាញ់គ្រាប់ពិត បាញ់រំលង និងនៅជុំវិញកោះតៃវ៉ាន់ ចាប់តាំងពីថ្ងៃទី៤ ខែសីហា។
៨-រដ្ឋមន្ត្រីការបរទសអាស៊ាន ជួបប្រជុំផ្សេងៗគ្នា ជាមួយរដ្ឋមន្ត្រីការបរទេសប្រទេសដៃគូសន្ទនា ១១ប្រទេស
នៅថ្ងៃទី៤ ខែសីហា កិច្ចប្រជុំរដ្ឋមន្ត្រីការបរទេសអាស៊ាន បានប្រជុំជាមួយរដ្ឋមន្ត្រីការបរទេស និងតំណាងប្រទេសដៃគូសន្ទនា ក្នុងកិច្ចប្រជុំដាច់ដោយឡែកៗពីគ្នា ចំនួន ១១ប្រទេស រួមមាន៖ ចិន កូរ៉េ ជប៉ុន អង់គ្លេស ឥណ្ឌា កាណាដា អូស្ត្រាលី ញូវហ្សឡេន អឺរ៉ុប អាមេរិក និងរុស្ស៊ី។ ចាប់ផ្តើមដំបូង ជាកិច្ចប្រជុំរដ្ឋមន្ត្រីការបរទេសអាស៊ាន និងរដ្ឋមន្ត្រីការបរទេសចិន។ កិច្ចប្រជុំនេះ អញ្ជើញដឹកនាំកិច្ចប្រជុំដោយផ្ទាល់ពីលោក ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា ក្នុងនាមជាប្រធានអាស៊ាន និងលោក វ៉ាង យី រដ្ឋមន្ត្រីការបរទេសចិន។
៩-សន្តិសុខសណ្តាប់ធ្នាប់ ជុំវិញកិច្ចប្រជុំរដ្ឋមន្ត្រីការបរទេសអាស៊ាន នៅភ្នំពេញ ត្រូវបានរឹតបន្តឹងយ៉ាងហ្មត់ចត់
នៅក្នុងសប្តាហ៍នេះ ទីតាំងកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ និងកិច្ចប្រជុំពាក់ព័ន្ធ គឺនៅសណ្ឋាគារ សុខា ភ្នំពេញ នៅជ្រោយចង្វារ ព្រមទាំងនៅតាមសណ្ឋាគារ ដែលទីស្នាក់នៅរបស់គណៈប្រតិភូអន្តរជាតិ ត្រូវបានរឹតបន្តឹងសន្តិសុខសណ្តាប់ធ្នាប់យ៉ាងតឹងរ៉ឹង ពីសំណាក់កងកម្លាំងសមត្ថកិច្ចកម្ពុជា។ ការពង្រឹងកិច្ចការពារសន្តិសុខនេះ គឺក្នុងគោលដៅធានាសុខសុវត្ថិភាព ជូនដល់គណៈប្រតិភូអន្តរជាតិ ដែលបានអញ្ជើញចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ និងកិច្ចប្រជុំពាក់ព័ន្ធ នៅក្នុងរាជធានីភ្នំពេញ ចាប់ពីថ្ងៃទី៣០កក្កដា ដល់ថ្ងៃទី៥ ខែសីហា ឆ្នាំ២០២២។
១០-សម្ដេច ហ៊ុន សែន អរគុណបក្សប្រឆាំង ដែលធ្វើឱ្យសម្តេច ក្លាយជាមេដឹកនាំ ដែលខ្លាំងពូកែ ហើយពលរដ្ឋស្រឡាញ់គាំទ្រច្រើន
កាលពីថ្ងៃទី៥ ខែសីហា សម្តេចតេជោ ហ៊ុន សែន បានទទួលសញ្ញាបត្របណ្ឌិតកិត្តិយសផ្នែកអភិវឌ្ឍន៍ ពីសាកលវិទ្យាល័យភូមិន្ទភ្នំពេញ។ ក្នុងពិធីនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា សត្រូវ និងដៃគូនយោបាយរបស់សម្តេច ដែលបានធ្វើសកម្មភាពប្រឆាំងគ្រប់វិធីជាមួយសម្តេច និងគណបក្សប្រជាជនកម្ពុជា នាពេលកន្លងមក បានរួមចំណែកធ្វើឱ្យសម្តេចមានភាពខ្លាំង ក្នុងការដឹកនាំ និងអភិវឌ្ឍន៍ប្រទេសកម្ពុជា ដោយក្រុមអ្នកប្រឆាំងបានបង្រៀនសម្ដេចឱ្យដឹងពីរបៀបនៃការរក្សាស្ថិរភាព និងទប់ស្កាត់បញ្ហាបង្កអសន្តិសុខក្នុងប្រទេស ដើម្បីឈានរកការអភិវឌ្ឍន៍ ការពារនូវសន្តិភាព ស្ថិរភាពនយោបាយ និងការពារជីវិតប្រជាជនកម្ពុជា។
១១-រដ្ឋមន្ដ្រីការបរទេសអាស៊ាន និងរដ្ឋមន្ត្រីការបរទេសប្រទេសដៃគូសន្ទនារបស់អាស៊ាន ចូលរួមកិច្ចប្រជុំកំពូលអាស៊ី-បូព៌ា លើកទី១២ និងវេទិកាតំបន់អាស៊ាន លើកទី២៩
នៅថ្ងៃទី៥សីហា ជាថ្ងៃចុងក្រោយនៃកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ និងកិច្ចប្រជុំពាក់ព័ន្ធ។ នាពេលព្រឹក រដ្ឋមន្ដ្រីការបរទេសអាស៊ាន និងរដ្ឋមន្ត្រីការបរទេសប្រទេសដៃគូសន្ទនារបស់អាស៊ាន បានចូលរួមកិច្ចប្រជុំកំពូលអាស៊ី-បូព៌ា លើកទី១២ និងពេលរសៀល ជាកិច្ចប្រជុំ វេទិកាតំបន់អាស៊ាន លើកទី២៩។
១២-កិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ ដែលកម្ពុជាធ្វើជាម្ចាស់ផ្ទះ បានបិទបញ្ចប់ហើយ ដោយសម្រេចបានជោគជ័យ គួរអោយកត់សំគាល់
កិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ ដែលកម្ពុជាធ្វើជាម្ចាស់ផ្ទះ នៅថ្ងៃទី៥ ខែសីហា បានបិទបញ្ចប់ហើយ ដោយនាំមកនូវជោគជ័យជាច្រើន គួរអោយកត់សំគាល់។ តាមរយៈកិច្ចប្រជុំអាស៊ាននៅកម្ពុជា ក្នុងឆ្នាំ២០២២នេះ មេដឹកនាំអាស៊ាន មេដឹកនាំតំបន់ និងពិភពលោក បានប្រើប្រាស់វេទិកានេះ ដើម្បីរិះរកមធ្យោបាយរួម ក្នុងការដោះស្រាយបញ្ហាធំៗជាក្តីកង្វល់រួម ដូចជា បញ្ហាសង្គ្រាមរុស្ស៊ី-អ៊ុយក្រែន បញ្ហាតានតឹងនៅច្រកសមុទ្រកោះតៃវ៉ាន់ បញ្ហាមីយ៉ាន់ម៉ា ការពង្រឹង និងស្តារសេដ្ឋកិច្ចពីវិបត្តិកូវីត១៩ បញ្ហាវិបត្តិស្បៀងអាហារ ក៏ដូចជាបញ្ហាប្រែប្រួលអាកាសធាតុ ជាដើម។
១៣-កម្ពុជា បញ្ជាក់ជំហរ មិនបោះបង់មីយ៉ាន់ម៉ា ក្នុងកាលៈទេសៈដែលមីយ៉ាន់ម៉ា កំពុងជួបប្រទះបញ្ហាលំបាក
បន្ទាប់ពីបញ្ចប់ដោយជោគជ័យនូវការរៀបចំកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ នៅព្រឹកថ្ងៃទី៦ ខែសីហា ឆ្នាំ២០២២ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា ក្នុងនាមជាប្រធានអាស៊ាន បានធ្វើសន្និសីទកាសែត ប្រកាសពីលទ្ធផលនៃកិច្ចប្រជុំរយៈពេល ១សប្តាហ៍នេះ។ ក្នុងសន្និសីទកាសែត លោកឧបនាយករដ្ឋមន្ត្រី ប្រាក់ សុខុន បានបញ្ជាក់ពីជំហរកម្ពុជា ក្នុងនាមជាប្រធានអាស៊ាន គឺកម្ពុជា នឹងមិនបោះបង់មីយ៉ាន់ម៉ា ក្នុងកាលៈទេស ដែលមីយ៉ាន់ម៉ា កំពុងជួបប្រទះបញ្ហាលំបាក ដោយកម្ពុជា នឹងសម្របសម្រួលដល់ភាគីទាំងសងខាង ឱ្យវិលមករកតុចរចា និងដោះស្រាយបញ្ហាដោយសន្ដិវិធី។
១៤-ជប៉ុន ផ្តល់ប្រាក់កម្ចីសម្បទានជាង ៣០០លានដុល្លារ ដើម្បីអភិវឌ្ឍន៍ផែកុងតឺន័រថ្មី នៅកំពង់ផែក្រុងព្រះសីហនុ
កាលពីព្រឹកថ្ងៃសៅរ៍ ទី៦ ខែសីហា ឆ្នាំ២០២២ សម្តេចតេជោ ហ៊ុន សែន បានអញ្ជើញជួបពិភាក្សាការងារជាមួយរដ្ឋមន្ត្រីការបរទេសជប៉ុន លោក ហាយ៉ាស៊ិ យ៉ុស៊ិម៉ាសា (HAYASHI Yoshimasa) នៅវិមានសន្តិភាព។ បន្ទាប់ពីកិច្ចប្រជុំ សម្តេចតេជោ ហ៊ុន សែន ក៏បានអញ្ជើញជាអធិបតី ក្នុងពិធីចុះហត្ថលេខា លើឯកសារសំខាន់ៗ រួមមាន៖ ១- លិខិតប្ដូរសារ និងឯកសារពាក់ព័ន្ធ ស្តីពីការផ្តល់ឥណទានសម្បទានប្រាក់យ៉េន ដែលមានទឹកប្រាក់ចំនួន ៤១,៣៨៨ប៊ីលានយ៉េន ស្មើនឹងប្រមាណ ៣៨៣,២២លានដុល្លារអាមេរិក។ សម្រាប់ការអនុវត្តគម្រោងអភិវឌ្ឍន៍ ចំណតផែកុងតឺន័រថ្មី នៅកំពង់ផែក្រុងព្រះសីហនុ ជំហានទី១ ដែលចុះហត្ថលេខារវាង លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងលោក ហាយ៉ាហ្ស៊ី យ៉ូហ៊ីម៉ាសា រដ្ឋមន្ត្រីការបរទេសជប៉ុន។ ២- កិច្ចព្រមព្រៀងឥណទានសម្បទាន សម្រាប់គម្រោងខាងលើ រវាងលោក ហែម វណ្ណឌី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោកស្រី កាមេ ហាវឺ ប្រធានតំណាង JICA ប្រចាំកម្ពុជា។ ឥណទានសម្បទាននេះ នឹងរួមចំណែកយ៉ាងសំខាន់ដល់ការពង្រីក និងធ្វើទំនើបកម្មកំពង់ផែស្វយ័តក្រុងព្រះសីហនុ និងដើម្បីប្រែក្លាយកំពង់ផែនេះ ទៅជាកំពង់ផែទឹកជ្រៅស្នូល សម្រាប់ប្រទេសកម្ពុជា និងក្នុងតំបន់ ស្របតាមការប្តេជ្ញាចិត្តរបស់នាយករដ្ឋមន្ត្រី នៃប្រទេសទាំងពីរ កាលពីដើមឆ្នាំនេះ៕