Views: 1
ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីតួកគីលោក រីស៊ីប ថាយយីប អឺដូហ្គាន (Recep Tayyip Erdogan)បានទៅបំពេញទស្សនកិច្ចនៅប្រទេសរុស្ស៊ីកាលពីថ្ងៃសុក្រទី៥សីហាសម្រាប់កិច្ចពិភាក្សាជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន ដោយផ្តោតលើកិច្ចព្រមព្រៀងគ្រាប់ធញ្ញជាតិដែលសម្របសម្រួលដោយតួកគីនិងអង្គការសហប្រជាជាតិ ទស្សនវិស័យសម្រាប់កិច្ចពិភាក្សាស្តីពីការបញ្ចប់អរិភាពក្នុងប្រទេសអ៊ុយក្រែន ស្ថានភាពនៅក្នុងប្រទេសស៊ីរី និងទំនាក់ទំនងសេដ្ឋកិច្ចលូតលាស់រវាងទីក្រុងមូស្គូនិងទីក្រុងអង់ការ៉ា។
ថ្លែងនៅពេលចាប់ផ្តើមកិច្ចប្រជុំនៅឯលំនៅដ្ឋានរបស់ពូទីននៅសមុទ្រខ្មៅក្នុងទីក្រុងសូជី (Sochi) លោកអឺដូហ្គានបាននិយាយថា ការចរចារបស់ពួកគេនឹងជួយ”ដាក់ចេញនូវតួនាទីដែលតួកគីនិងរុស្ស៊ីកំពុងដើរតួនៅក្នុងតំបន់”។ លោកបានចាត់ទុកការពិភាក្សានេះថាមានសារៈសំខាន់ ដោយនិយាយថា ពួកគេកំពុងត្រូវបានពិភពលោកមើលយ៉ាងដិតដល់។
លោកអឺដូហ្គានបាននិយាយថា “ថ្ងៃនេះ ពិតណាស់ ភ្នែករបស់ពិភពលោកគឺសម្លឹងមើលទីក្រុងសូជី។ ពួកគេកំពុងតាមវាដោយឆ្ងល់ថាតើអ្វីកំពុងត្រូវបានពិភាក្សានិងសម្រេចបាននៅសូជី”។
កាលពីខែមុន តួកគីនិងអ.ស.បបានជួយសម្រួលឱ្យមានកិច្ចព្រមព្រៀងរវាងរុស្ស៊ីនិងអ៊ុយក្រែន ដើម្បីបើកផ្លូវសម្រាប់អ៊ុយក្រែនក្នុងការនាំចេញផលិតផលកសិកម្មចំនួន ២២លានតោនដែលជាប់គាំងនៅក្នុងកំពង់ផែសមុទ្រខ្មៅរបស់ខ្លួន ចាប់តាំងពីទីក្រុងមូស្គូបានបញ្ជូនទាហានចូលប្រទេសនេះកាលពីជាង ៥ ខែមុន។ កិច្ចព្រមព្រៀងនេះក៏អនុញ្ញាតឱ្យរុស្ស៊ីនាំចេញគ្រាប់ធញ្ញជាតិនិងជីរគីមីផងដែរ។
កប៉ាល់បីគ្រឿងទៀតដែលផ្ទុកពោតរាប់ពាន់តោនបានចាកចេញពីកំពង់ផែអ៊ុយក្រែនកាលពីថ្ងៃសុក្រ។ កប៉ាល់ដំបូង ដែលចេញដំណើរក្រោមលក្ខខណ្ឌនៃកិច្ចព្រមព្រៀងនេះ បានចាកចេញពីអ៊ុយក្រែនកាលពីដើមសប្តាហ៍។
លោកពូទីនបានថ្លែងអំណរគុណចំពោះលោកអឺដូហ្គានសម្រាប់ការជួយចរចាកិច្ចព្រមព្រៀងគ្រាប់ធញ្ញជាតិដែលត្រូវបានត្រួតពិនិត្យក្នុងទីក្រុងអ៊ីស្តង់ប៊ុលដោយមន្ត្រីមកពីអ៊ុយក្រែន រុស្ស៊ី តួកគីនិងអ.ស.ប។ កប៉ាល់ដឹកទំនិញត្រូវបានអមដោយនាវាអ៊ុយក្រែនសម្រាប់ការឆ្លងកាត់ដោយសុវត្ថិភាព ដោយសារតែគ្រាប់មីនពង្រាយពេញសមុទ្រខ្មៅ។
មេដឹកនាំរុស្ស៊ីបានកត់សម្គាល់ពីសារៈសំខាន់នៃកិច្ចព្រមព្រៀងនេះសម្រាប់ប្រទេសជាច្រើនជុំវិញពិភពលោកដែលពឹងផ្អែកលើការនាំចេញរបស់រុស្ស៊ី និងអ៊ុយក្រែន ដើម្បីចិញ្ចឹមប្រជាជនរបស់ពួកគេ និងដាំដុះដំណាំផ្ទាល់ខ្លួនរបស់ពួកគេ។ លោកបានបន្តថា “វាជាបញ្ហាធ្ងន់ធ្ងរសម្រាប់ប្រទេសកំពុងអភិវឌ្ឍជាច្រើនដែលប្រឈមនឹងបញ្ហាធំជាមួយអាហារនិងជី”។
នៅក្នុងសេចក្តីថ្លែងការណ៍ដែលបានចេញផ្សាយបន្ទាប់ពីកិច្ចពិភាក្សាដែលមានរយៈពេលបួនម៉ោង លោកពូទីននិងលោកអឺដូហ្គានបានសង្កត់ធ្ងន់អំពី “ភាពចាំបាច់នៃការបំពេញពេញលេញនៃកិច្ចព្រមព្រៀងជាកញ្ចប់ដែលបានសម្រេចនៅទីក្រុងអ៊ីស្តង់ប៊ុល … រួមទាំងការនាំចេញគ្រាប់ធញ្ញជាតិ និងជីរបស់រុស្ស៊ីដោយគ្មានការរារាំង”។
ពួកគេក៏បានកត់សម្គាល់ផងដែរអំពី “សារៈសំខាន់នៃទំនាក់ទំនងដ៏ស្មោះត្រង់ និងជឿជាក់រវាងរុស្ស៊ីនិងតួកគីសម្រាប់ស្ថិរភាពក្នុងតំបន់និងពិភពលោក”៕
លោកពូទីនទទួលលោកអឺដូហ្គាននៅលំនៅដ្ឋានគាត់ក្នុងទីក្រុងសូជីកាលពីថ្ងៃសុក្រ