Views: 2
ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតី វ្ល៉ាឌីមៀ ពូទីន កាលពីថ្ងៃចន្ទ បានផ្តល់សញ្ជាតិរុស្ស៊ីដល់អ្នកទម្លាយព័ត៌មានសញ្ជាតិអាម៉េរិក អេដវ៉ាដ ស្នូដិន (Edward Snowden) ដែលបានលាតត្រដាងព័ត៌មានចារកម្មដ៏ធំរបស់ទីភ្នាក់ងារសន្តិសុខជាតិអាម៉េរិក (NSA)លើជនជាតិអាម៉េរិក ហើយបន្ទាប់មកបានស្វែងរកការជ្រកកោននៅក្នុងប្រទេសរុស្ស៊ី។
ក្រឹត្យរបស់ប្រធានាធិបតី ដែលបានចេញផ្សាយនៅថ្ងៃចន្ទនេះ បានរួមបញ្ចូលស្នូដិននៅក្នុងបញ្ជីនៃពលរដ្ឋរុស្ស៊ីដែលទើបនឹងទទួលបានសញ្ជាតិថ្មីនៅពេលដែលទំនាក់ទំនងរវាងរដ្ឋាភិបាលក្រុងវ៉ាស៊ីនតោននិងក្រុងមូស្គូស្ថិតក្នុងកម្រិតទាបជាប្រវត្តិសាស្ត្រជុំវិញជម្លោះនៅអ៊ុយក្រែន។
អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ បានប្រាប់ទីភ្នាក់ងារសារព័ត៌មាននានាថា ស្នូដិនបានទទួលសញ្ជាតិរុស្ស៊ីជាលទ្ធផលនៃសំណើផ្ទាល់ខ្លួនរបស់គាត់ ដែលបានធ្វើឡើងក្នុងឆ្នាំ ២០២០ដើម្បីធ្វើឱ្យវាកាន់តែងាយស្រួលសម្រាប់ភរិយាអាម៉េរិករបស់គាត់ ឈ្មោះ លីនសេ មីល (Lindsay Mills) ក្នុងការធ្វើដំណើរទៅមក។
ស្នូដិនបានសរសេរនៅលើ Twitter ថា “បន្ទាប់ពីបែកគ្នាពីឪពុកម្តាយជាច្រើនឆ្នាំ ប្រពន្ធខ្ញុំនិងខ្ញុំគ្មានបំណងចង់បែកពីកូនប្រុសរបស់យើងនោះទេ”។
រូបគេបាននិយាយថា “បន្ទាប់ពីការរង់ចាំពីរឆ្នាំនិងការនិរទេសខ្លួនជិតដប់ឆ្នាំ ស្ថិរភាពតិចតួចមួយនឹងធ្វើឱ្យមានការផ្លាស់ប្តូរសម្រាប់គ្រួសាររបស់ខ្ញុំ”។
រំលឹកថា អតីតបុគ្គលិកស៊ើបការណ៍សម្ងាត់ជាប់កិច្ចសន្យារបស់អាម៉េរិកអាយុ ៣៩ ឆ្នាំរូបនេះបានទម្លាយឯកសារសម្ងាត់ទៅកាន់ប្រព័ន្ធផ្សព្វផ្សាយក្នុងឆ្នាំ ២០១៣ ដោយបង្ហាញថា ទីភ្នាក់ងារ NSA កំពុងប្រមូលទិន្នន័យមេអំពីទំនាក់ទំនងនិងព័ត៌មានផ្សេងទៀតជាច្រើនអំពីពលរដ្ឋអាម៉េរិក ដោយរំលោភលើសិទ្ធិឯកជនភាពតាមរដ្ឋធម្មនុញ្ញរបស់ពួកគេ។
ការលាតត្រដាងអំពីកម្មវិធីចារកម្មសម្ងាត់របស់ NSA បាននាំឱ្យមានច្បាប់និងបទប្បញ្ញត្តិនានាហាមឃាត់សកម្មភាពបែបនោះ ហើយបន្ទាប់ពីលាតត្រដាងអាថ៌កំបាំងទាំងនោះ ស្នូដិនបានស្វែងរកការជ្រកកោនក្នុងប្រទេសរុស្ស៊ី។ គាត់បានរៀបការជាមួយមិត្តស្រីយូរអង្វែង នាងមីល នៅទីក្រុងមូស្គូក្នុងឆ្នាំ ២០១៧។
បីឆ្នាំក្រោយមក ពួកគេមានកូនប្រុសម្នាក់ ហើយស្នូដិនបាននិយាយថា គាត់នឹងស្វែងរកសញ្ជាតិរុស្ស៊ី ដើម្បីបង្កភាពងាយស្រួលដល់គ្រួសាររបស់គាត់ក្នុងការនៅជាមួយគ្នាជាពិសេសដោយសារតែការរឹតបន្តឹងការធ្វើដំណើរទាក់ទងនឹងជំងឺរាតត្បាតកូវីដ១៩។
ប៉ុន្តែគាត់បាននិយាយថាគាត់ចង់រក្សាសញ្ជាតិអាម៉េរិករបស់គាត់។
គាត់បាននិយាយនៅពេលនោះថា “លីនសេនិងខ្ញុំនឹងនៅតែជាជនជាតិអាម៉េរិក ដោយចិញ្ចឹមកូនប្រុសរបស់យើងជាមួយនឹងតម្លៃទាំងអស់របស់អាម៉េរិកដែលយើងស្រឡាញ់រួមទាំងសេរីភាពក្នុងការនិយាយគំនិតរបស់គាត់។ ហើយខ្ញុំទន្ទឹងរង់ចាំថ្ងៃដែលខ្ញុំអាចត្រឡប់ទៅសហរដ្ឋអាម៉េរិកវិញ ដូច្នេះគ្រួសារទាំងមូលនឹងអាចជួបជុំគ្នាវិញ”។
ប្តីប្រពន្ធនេះមានកូនប្រុសទីពីរនៅដើមឆ្នាំនេះ។
មេធាវីរបស់ស្នូដិន លោក អានណាតូលី គូឆឺរីណា (Anatoly Kucherena) បានប្រាប់ទីភ្នាក់ងារសារព័ត៌មានរដ្ឋរុស្ស៊ី RIA Novosti ថា នាងមីលក៏នឹងដាក់ពាក្យសុំសញ្ជាតិរុស្ស៊ីផងដែរ៕
ស្នូដិនទទួលបានសញ្ជាតិរុស្ស៊ី
